Sorgoe gi den goedoe foe a Masra
1 Na ini bijbel ten, wan basja ben abi wan posisi pe den ben froetrow en nanga boen foeroe sani. Abraham ben gi en basja a wroko foe feni wan wefi gi a boi foe en, Isak (Gen. 24:1-4). Leki wan bakapisi foe dati, a basja ben abi a frantiwortoe foe meki seiker taki a geslakti foe Abraham ben o go doro. Dati ben de wan bigi frantiwortoe srefisrefi! Foe dati ede, a no de foe froewondroe taki na apostel Paulus ben taki: „San den e froewakti foe den basja na taki den moesoe de getrow”! — 1 Kor. 4:2.
Kresten basjawroko
2 Bijbel e taki foe son sani foe a kresten diniwroko, leki basjawroko. Foe eksempre, na apostel Paulus ben taki nanga den Efeisesma foe „a basjawroko foe a no-froedini boen-atifasi foe Gado, di ben gi na mi nanga oenoe na prakseri” (Ef. 3:2; Kol. 1:25). A ben si a komando foe en foe tjari a boen njoensoe gi den nâsi leki wan basjawroko, di a ben moesoe doe na wan getrow fasi (Tori 9:15; 22:21). Na apostel Petrus ben skrifi den salfoe brada foe en: „Lobi foe ontfanga makandra boen sondro foe knoroe. Akroederi a presenti di ibriwan sma kisi, gebroiki en foe dini makandra leki boen basja foe a no-froedini boen-atifasi foe Gado di sori na difrenti sortoe fasi” (1 Petr. 4:9, 10; Heb. 13:16). Awansi san den fosi jarihondro kresten ben abi na materia sei, dati ben de leki wan bakapisi foe a no-froedini boen-atifasi foe Jehovah. Foe dati ede, den ben de basja foe den sani dati èn den ben moesoe gebroiki den sani dati na wan kresten fasi.
3 Na ini a ten disi, Jehovah Kotoigi e si den afersi na a srefi fasi. Den gi densrefi abra na Jehovah Gado èn ala sani san den abi — den libi, den krakti na skinfasi, den materia sani di den abi — den e si den leki froktoe foe „a no-froedini boen-atifasi foe Gado di sori na difrenti sortoe fasi”. Leki boen basja, den e firi taki den moesoe gi frantiwortoe na Jehovah Gado foe a fasi fa den e gebroiki den sani disi. Boiti dati, den kisi wan sabi foe a boen njoensoe. Disi toe na wan froetrow sani di den wani foe gebroiki na a moro boen fasi leki den kan: foe gi glori na Jehovah nen èn foe jepi trawan kisi sabi foe a waarheid. — Mat. 28:19, 20; 1 Tim. 2:3, 4; 2 Tim. 1:13, 14.
4 Fa Jehovah Kotoigi e doe den frantiwortoe foe den leki basja? A raport foe ibri jari e sori taki, a jari di pasa wawan, na heri grontapoe den ben gi moro leki wán miljard joeroe foe preiki a „boen njoensoe foe a kownoekondre” èn den ben hori moro leki 4.500.000 oso bijbelstudie na sma di ben abi belangstelling (Mat. 24:14). A getrowfasi foe den leki basja foe Jehovah, den ben sori toe foe di den ben lobi foe gi bijdrage gi a wroko na heri grontapoe èn foe sorgoe gi den Kownoekondre zaal foe a gemeente foe den, foe di den ben ontfanga den opziener di e rèis èn trawan boen, èn foe di den ben sori na aparti switifasi foe den pasa marki gi den wan di de ini bigi nowtoe — soleki den wan di e pina sondro taki den doe wan sani foe a feti di sma e feti nanga gon. Leki wan groepoe, troe kresten e sorgoe boen gi den goedoe foe a Masra.
„A getrow basja, a koniwan”
5 Basjawroko no de wawan ini a tori foe aparti sma, ma so srefi ini a tori foe wan organisâsi. Jesus ben kari a salfoe kresten gemeente na grontapoe „wan getrow basja, a koniwan” (Luk. 12:42). A frantiwortoe di a „getrow basja” disi abi, na foe gi „njanjan . . . di den abi fanowdoe” èn foe teki fesi na ini a preiki wroko na ala nâsi (Opb. 12:17). Wan tra sani di abi foe doe nanga disi, na taki a getrow basja groepoe, di a Tiri Skin e teki presi gi den, abi wan frantiwortoe di komoto foe Gado foe sorgoe boen èn na wan joisti fasi gi den „talenti” foe en na materia sei èn na jeje sei (Mat. 25:15). Ini wánfasi nanga na eksempre foe „a getrow basja”, dan ibriwan foe den corporatie foe den bijkantoro e meki ala moeiti foe gebroiki ala moni bijdrage na wan frantiwortoe fasi, foe meki Kownoekondre afersi go na fesi. Ala den sortoe bijdrage disi, e gi foe di sma e froetrow den, èn „a getrow basja, a koniwan” abi a frantiwortoe foe sorgoe taki den e gebroiki den bijdrage disi gi a marki gi san a ben gi èn taki den e wroko nanga koni, sondro foe froemorsoe, èn nanga boen bakapisi.
6 Wan eksempre foe a koni fasi fa den e gebroiki den bijdrage di den kisi, de foe si ini a gro foe a wroko foe Jehovah Kotoigi foe druk poeblikâsi na ini a di foe 20 jarihondro. A prati foe bijbel èn so srefi bijbel poeblikâsi — tijdschrift, boekoe, brochure, pikin brochure, traktaat, nanga Kownoekondre njoensoe — prèi wan prenspari ròl ini a prati foe „a boen njoensoe” na ini „den lasti dei” disi (Mark. 13:10; 2 Tim. 3:1). Èn a Waktitoren tijdschrift de wan prenspari wrokosani foe gi „njanjan na a reti ten” na ’a osofamiri foe Gado’ nanga den kompe foe den, a „bigi ipi” foe „tra skapoe”. — Mat. 24:45; Ef. 2:19; Opb. 7:9; Joh. 10:16.
7 Na ini a bigin, ala den poeblikâsi foe Jehovah Kotoigi ben meki nanga jepi foe drukkerij di e wroko gi moni. Ma na ini den jari 1920 te nanga 1929, a bosroiti ben teki dati a ben sa moro boen èn ben sa tjari winimarki na jejefasi, efoe den foetoeboi foe Jehovah ben o doe den eigi drukwroko. Den ben bigin druk pikinpikin na ini 1920, èn safrisafri a drukwroko ben gro na Brooklyn, New York, te leki a ben kon bigi srefisrefi. Di 1967 ben e doro, den drukkerij ben de na ini fo gebow foe a foto. So srefi na tra kondre den brada ben seti sani foe druk poeblikâsi, ma na ini moro foeroe foe den kondre dati, a di foe Toe Grontapoefeti ben meki a drukwroko tapoe.
8 Ma ala di a drukwroko ben gro foeroe na Amerkankondre, tokoe noiti a ben bigi nofo foe sorgoe gi heri grontapoe. Foe dati ede, na ini den jari di ben kon baka a feti, den brada ben seti sani foe a drukwroko doe noso ben e seti sani kaba foe kan go na foeroe tra kondre, so srefi Deinsikondre, Grikikondre, Ingrisikondre, Kanada, West-Doisrikondre, Zuid-Afrika, nanga Switserland. Na ini 1970 te nanga 1975 Australia, Brasjonkondre, den Filippijnen, Fensikondre, Gana, Japan, nanga Nigeria ben kon tapoe a lijst disi toe. Son wan foe den kondre disi ben meki boekoe toe. So srefi na ini 1970 te nanga 1975, Gilead zendeling ben kisi leri ini a bekwaamfasi foe druk sani èn ben seni go na wan toe foe den kondre disi foe jepi den brada drape nanga a drukwroko.
9 Na ini 1980 te nanga 1989 a nomroe foe kondre pe tijdschrift ben e druk, ben doro wan heimarki foe 51.a Fa disi ben tron wan moi fasi foe gebroiki den goedoe foe a Masra! Fa disi ben de wan tranga boeweisi taki a Kownoekondre wroko ben e gro! Èn fa disi ben de wan krakti boeweisi taki miljoenmiljoen Kotoigi foe Jehovah ben lobi foe gi sani èn den ben ’gi Jehovah grani nanga den warti goedoe foe den’! (Odo 3:9) So boen, den ben boeweisi gi densrefi taki den ben de boen basja foe den sani di Jehovah ben blesi den nanga dati na difrenti fasi.
A sani di den e poti prakseri na tapoe, a kenki
10 Na ini 1970 te nanga 1985, a technologie foe druk ben go foeroe na fesi, èn Jehovah Kotoigi ben e teki moro njoen teknik foe druk. Fosi dati, den ben gebroiki a letterdrukpers fasi, di sma gwenti foe gebroiki, foe druk. Safrisafri disi ben kenki di den ben bigin gebroiki den moro njoen disiten offset fasi foe druk. Leki wan bakapisi foe dati, moi poeblikâsi e meki di abi kloroe prenki, na presi foe a toe-kloroe (blaka nanga ete wan tra kloroe) di den owroe letterdrukpers ben man meki. Moro fara, a computer technologie ben kenki a heri prepress wroko (a sreka foe sani fosi a drukwroko). Jehovah Kotoigi ben meki a Multilanguage Electronic Phototypesetting System (MEPS), wan sistema di e wroko nanga computer èn di now e horibaka gi a drukwroko na ini moro leki 370 difrenti tongo. No wan programa di e meki foe wroko moni, e doro a sani di MEPS e doe na ini so foeroe tongo.
11 Tangi foe MEPS computer technologie èn a gebroiki di den brada ben gebroiki tra njoen fasi, soleki electronische post, meki wan tra bigi go na fesi ben meki ini a meki foe njanjan na a reti ten. Fosi dati, di den ben gebroiki moro owroe technologie, dan den bodoi di ben de foe feni na ini den Ingrisitongo tijdschrift ben de foe feni wan toe moen baka dati na ini den tijdschrift di no de na ini Ingrisitongo. Now, A Waktitoren e kon na ini 115 difrenti tongo na a srefi ten, èn Ontwaakt! na ini 62 tongo. Disi wani taki dati na heri grontapoe moro leki 95 procent foe den wan di e fisiti na ala wiki Waktitoren-studie foe Jehovah Kotoigi e poti prakseri tapoe a srefi materiaal na a srefi ten. Disi na wan blesi srefisrefi! Foe troe a ben de wan moi fasi foe bigin gebroiki den goedoe foe a Masra foe gebroiki ala den goedoe dati foe a njoen technologie!
Difrenti sani di na organisâsi abi fanowdoe
12 Den njoen sistema disi ben kenki den sani di na organisâsi ben abi fanowdoe foe doe a drukwroko foe Jehovah Kotoigi na heri grontapoe. Foe druk nanga bigi lolo papira moro gaw leki den owroe letterdrukpers, ma den e kostoe boen foeroe moro moni toe. Computer sistema di e horibaka gi tra wroko di abi foe doe nanga disi, soleki skrifi, vertaal, teken, nanga grafisch wroko, èn ala di nanga den sistema disi wan sma kan doe moro sani leki nanga den owroe sistema, dan tokoe den sistema disi e kostoe moro moni toe. Heri esi a ben kon de krin foe si taki a no boen gi den kostoe, foe druk tijdschrift na ini 51 difrenti kondre. Foe dati ede, na ini den jari baka 1990, „a getrow basja” ben ondrosoekoe a tori ete wan tron. San ben de a bosroiti?
13 Den ondrosoekoe ben sori taki den „warti sani” di Jehovah Kotoigi nanga den mati foe den ben gi, ben sa kan gebroiki moro boen efoe a drukwroko ben doe na wán presi. So boen a nomroe foe bijkantoro di e doe drukwroko, ben kon moro mendri safrisafri. Doisrikondre ben teki a drukwroko foe tijdschrift abra gi foeroe kondre foe Owstoe-Europa nanga West-Europa, so srefi wan toe foe den kondre di fosi dati ben druk den eigi tijdschrift. Italia e jepi foe druk tijdschrift nanga poeblikâsi gi wan toe kondre foe Afrika nanga kondre na zuidowstoe sei foe Europa, so srefi Grikikondre nanga Albania. Na ini Afrika, soso Nigeria nanga Zuid-Afrika e doe a drukwroko. Na heri grontapoe a srefi fasi disi ben seti foe meki a drukwroko doe na wán presi.
Wan toe sani foe prakseri boen
14 Na a ten foe juli 1998, dan a wroko foe druk tijdschrift no sa doe moro na wan toe kondre foe Europa soleki: Bakrakondre, Deinsikondre, Fransikondre, Grikikondre, Oostenrijk nanga Switserland. A hebi wroko foe druk na ini Europa sa doe na Bretania, Doisrikondre, Fensikondre, Italia, Spanjorokondre, nanga Sweden. Na so fasi, den brada no sa meki kostoe di no de fanowdoe, èn den bijdrage sa gebroiki moro boen gi a wroko na heri grontapoe. Sortoe sani den brada ben hori na prakseri foe teki a bosroiti sortoe kondre ben o druk èn sortoe wan foe den no sa druk moro? Foe tan hori densrefi na wan koni fasi na a komando foe sorgoe gi den goedoe foe a Masra, „a getrow basja” ben loekoe o praktis a de foe druk sani na ibri presi.
15 A moro bigi reide foe san ede den brada no ben druk moro na son kondre èn doe a drukwroko na tra presi, ben de foe di dati ben de praktis. Foe meki wán kondre druk den poeblikâsi gi difrenti tra kondre ben de moro boen èn de wan moro boen fasi foe gebroiki diri wrokosani. A drukwroko e doe now na presi pe den kostoe moro lagi, èn pe a situwâsi boen foe seni den poeblikâsi go na tra presi. So boen, den goedoe foe a Masra e gebroiki na wan joisti fasi. A no de foe taki, dati foe stòp nanga drukwroko na wan kondre no wani taki na a presi drape a preikiwroko sa stòp. A sa tan so taki bogo-bogo sani di druk sa de foe kisi ete, èn den hondrohondro doesoen Kotoigi foe Jehovah na ini den kondre dati sa tan froeteri den sma na den sei „a boen njoensoe foe vrede” fajafaja (Ef. 2:17). Boiti dati, na orga di sani orga tra fasi, ben tjari tra winimarki.
16 Foe kari wán foe den winimarki, foeroe foe den disiten drukpers foe Bakrakondre, Deinsikondre, Grikikondre nanga Switserland den ben seni go na Nigeria nanga den Filippijnen. Bekwaam drukpers-wrokoman foe Bethel foe den kondre foe Europa ben teki a kari foe go nanga den drukpers èn leri den brada drape fa foe wroko nanga den wrokosani disi. Dati meki den kondre dati e kisi now a srefi hei kwaliteit tijdschrift di den tra kondre abi.
17 Loekoe wan tra winimarki: Den kostoe foe druk tijdschrift de now tapoe wan toe kondre pe a drukwroko e go doro. Leki wan bakapisi foe dati, dan na ini den kondre pe a drukwroko kon tapoe, den kan gebroiki a moni gi tra sani now, soleki foe bow Kownoekondre zaal èn foe jepi foe sorgoe gi den sani di den brada na moro pôti kondre abi fanowdoe. So boen, sorgoe boen gi den goedoe foe a Masra wani taki dati den wortoe di Paulus taigi den Korentesma kan fiti moro boen na foeroe kondre foe grontapoe: „Ma mi no e taki dati a moesoe de makriki gi trawan, ma hebi gi oenoe; ma foe meki sani kon de a srefi, na abi di oenoe abi toemoesi foeroe now kan tapoe a mankeri di den e mankeri sani now, . . . na so fasi sani kan meki kon de a srefi.” —2 Kor. 8:13, 14.
18 Leki wan bakapisi foe a moksi kon na wan disi, Jehovah Kotoigi na heri grontapoe e tai na makandra moro leki oiti bifo. A no de wan problema gi den Kotoigi ini Deinsikondre foe meki Doisrikondre druk den tijdschrift gi den, ala di den kotoigi na Deinsikondre ben gwenti foe druk den eigi tijdschrift. Den de nanga tangi na ati gi den wroko foe den Doisri brada foe den. A de so taki Jehovah Kotoigi na Doisrikondre e hori na ati taki den bijdrage foe den e gebroiki foe meki bijbel poeblikâsi gi Deinsikondre — noso gi Oekraini, Rosia, nanga tra kondre? Kwetikweti! Den breiti foe sabi taki den bijdrage foe den brada drape ini den kondre dati kan gebroiki now gi tra sani di de fanowdoe.
Sorgoe gi den goedoe
19 Na ini ibri Kownoekondre zaal foe Jehovah Kotoigi na heri grontapoe, wan bijdrage boksoe de pe skrifi: „Bijdrage gi a wroko foe a Genootschap na heri grontapoe — Mateus 24:14”. Friwani bijdrage di gi èn poti ini den boksoe dati, de foe jepi awansi pe a de fanowdoe. Fa den bijdrage disi e gebroiki, dati na „a getrow basja” nanga ibriwan foe den corporatie foe den bijkantoro teki a bosroiti. Foe dati ede, pe lanti wet e gi pasi foe dati, dan moni di poti na ini wan bijdrage boksoe ini wan kondre kan jepi den wroko foe Jehovah Kotoigi ini tra kondre doesoendoesoen kilometer moro fara. Bijdrage ben gebroiki na ini wan toe kondre foe gi wantewante jepi na kompe bribiman di ben pina foe sani soleki orkan, tornado, gronseki, nanga feti na mindri borgoe. Èn den sortoe bijdrage disi e gebroiki foe jepi den zendeling na moro leki 200 kondre.
20 Na den gemeente foe Jehovah Kotoigi, leki wan algemeen lin, moni tori e taki soso wán leisi wan moen — èn dati wan toe miniti nomo. Den no e piki moni na ini den Kownoekondre zaal noso na den bigi konmakandra. No wan papira foe aksi moni e seni go na aparti sma. No wan sani foe meki moni e hori. Leki fa a gwenti de, dan iniwan jari soso wán artikel foe A Waktitoren e tjari kon na krin fa den wan di wani gi bijdrage kan doe dati na a Watch Tower Bible and Tract Society foe jepi a wroko na heri grontapoe. Na ini na Ontwaakt! a no de a gwenti foe taki moni tori foe a Genootschap. Ma dan, fa a boen bigi wroko na heri grontapoe ben doe foe preiki a boen njoensoe, bow Kownoekondre zaal di de fanowdoe, sorgoe gi den wan na in spesroetoe foeroeten diniwroko, èn jepi den kresten di abi dati fanowdoe? Jehovah blesi en pipel na wan toemoesi moi fasi nanga wan jeje di lobi foe gi sani (2 Kor. 8:2). Wi e teki na okasi disi foe taki ala sma tangi di ben abi wan prati na a ’gi den ben gi Jehovah grani nanga den warti sani foe den’. Den kan de seiker taki „a getrow basja” sa go doro foe sorgoe gi den goedoe foe a Masra. Èn wi e begi taki Jehovah sa go doro foe blesi ala den seti di meki foe a wroko gro na heri grontapoe.
[Foetoewortoe]
a Na ini seibi foe den kondre disi, drukkerij di e wroko moni ben doe a drukwroko.