Opziener e teki fesi — A sekretarsi
1 A gemeente sekretarsi e plèi wan prenspari ròl foe djaranti taki „ala sani feni presi na wan fasi di fiti èn leki fa sani seti” (1 Kor. 14:40). Leki wan memre foe a dienstkomte foe a gemeente, a e sorgoe gi a skrifi foe brifi gi a gemeente èn prenspari papira tori. Ala di ala sma no man si den wroko di a e doe, so leki den man si di foe den tra owroeman, tokoe den wroko foe en de fanowdoe srefisrefi èn wi e warderi den srefisrefi toe.
2 Te brifi e doro di komoto na a Genootschap noso na tra sma, dan a sekretarsi e poti prakseri na den èn a e sorgoe foe skrifi wan piki te a de fanowdoe. A e sorgoe taki den brifi di kon na ini a gemeente e waka lontoe foe a wan owroeman go na a trawan èn baka ten a e poti den na ini gemeente map foe den kan loekoe den baka ten. A e loekoe den tijdschrift nanga boekoe bisteri formulier èn e seni den go na a Genootschap. A e teki a tiri abra den sma di e sorgoe foe moni afersi nanga abonnement èn so srefi toe gi ala afersi di abi foe doe nanga kongres.
3 Foe di a sekretarsi moesoe seni na ibrimoen velddienst bericht foe a gemeente go na a Genootschap bifo a di foe siksi dei foe a moen, dan leki a fosi sani wi alamala moesoe meki a raport foe wi velddienst leti na a kaba foe ibri moen. Baka dati a e skrifi den dienstbericht tapoe a Bericht foe den gemeente preikiman. Iniwan preikiman mag aksi foe si en eigi preikiman bericht karta.
4 Te wan preikiman e froisi kon na ini a gemeente noso te a e froisi gowe foe a gemeente, dan a sekretarsi e aksi den owroeman foe a tra gemeente foe seni wan brifi noso a e seni wan gi den makandra nanga a Bericht foe a gemeente preikiman dati. — Bediening-boekoe, bladzijde 106, 107.
5 A sekretarsi e loekoe na aktiviteit foe den pionier sjatoe baka, èn a e froeteri den owroeman, èn spesroetoe a dienstopziener, iniwan problema di den pionier kande e ondrofeni. A e poti a prakseri foe gemeente boekoestudieleider tapoe preikiman di no e go ibri moen na ini a preikiwroko. A sekretarsi èn so srefi a dienstopziener e teki fesi na ini na orga foe sorgoe gi den wan di de inaktief. — Wi Kownoekondre Dienst foe december 1987, bladzijde 2.
6 Di wi abi wan moro boen warderi gi den wroko foe a sekretarsi, dan meki a de so taki wi e doe san wi man foe jepi en so taki a wroko foe en leki opziener de moro makriki gi en foe doe. — 1 Kor. 4:2.