„Hori pasensi”
1 Now di wi e si a kaba foe na owroe seti foe sani foe Satan e kon so krosibei, a de prenspari taki wi e „hori pasensi” ala di wi e wakti a dei di Jehovah o tjari froeloesoe kon. Spesroetoe now di a kaba de so krosibei, den ogri feanti abi a fasti bosroiti foe poeroe wi prakseri foe a moro prenspari strei di abi foe doe nanga a soevereiniteit foe Jehovah èn foe tesi wi foe meki den foeroe afersi foe wi poeroe wi prakseri. Na a fasi disi Satan wani kisi wi foe tapoe a Kownoekondre-preikiwroko noso foe doe en moro safrisafri (Jak. 5:7, 8; Mat. 24:13, 14). Na sortoe fasi wi kan sori a pasensi disi di de so tranga fanowdoe?
2 Te wi e hori wisrefi: Te wi e miti mi-no-ke fasi noso gens na ini wi diniwroko, dan wi sa man horidoro na ini a preikiwroko te wi e hori wisrefi. Wi no sa meki sma e tapoe skreki gi wi so makriki noso atibron te sma di wi e miti e handri na wan fasi di wi no ben froewakti noso te den no e handri nanga switifasi (1 Petr. 2:23). Na inisei krakti disi kan tapoe wi foe taki na wan negatief fasi foe den sma na ini wi kontren di e sori wan mi-no-ke fasi noso di abi feantifasi gi a wroko foe wi, foe di wi e froestan taki den sortoe sani disi di wi e taki kan meki wi lasi-ati èn so srefi den wan di e wroko nanga wi na ini a diniwroko.
3 Te wi e horidoro nanga pasensi: A kan aksi foeroe pasensi foe wi baka te wi ben abi wan boen takimakandra na ini a velddienst, wi no man feni a sma di ben abi belangstelling na oso baka. Na so a de toe te den sma di wi e studeri nanga den no e go esi na fesi noso no e teki sei gi a waarheid. Ma te wi e horidoro nanga pasensi, dan nofo tron wi e kisi boen bakapisi (Gal. 6:9). Wan sisa ben tjari foeroe gobaka na wan jongoe oema bifo a ben bigin troetroe nanga wan bijbelstudie. Na den fosi feifi fisiti, na oema ben abi tra sani foe doe. Na a di foe siksi leisi di a ben proeberi baka, a sisa ben nati srefisrefi na ini wan bigi alen, èn tokoe no wan sma no ben de na oso. Ma tokoe, foe di a sisa ben abi a fasti bosroiti foe gi na oema ete wan tjans, meki a ben fisiti na oema baka èn ben feni en klariklari foe studeri. Na baka dati, a studenti ben tan go na fesi èn baka wan sjatoe ten a ben gi en libi abra na Jehovah.
4 Wi sabi taki a dei foe Jehovah no sa kon lati. Foe dati ede wi e wakti fa a sa meki sani waka, èn wi sabi taki a pasensi foe Gado sa abi boen bakapisi (Hab. 2:3; 2 Petr. 3:9-15). Wi moesoe hori pasensi neleki Jehovah èn no tapoe foe doe a diniwroko. „Nanga bribi èn pasensi”, howpoe tapoe Jehovah di sa pai joe gi joe tranga wroko.—Hebr. 6:10-12.