¿Yu E Si Soso a Fasi fa Wan Sma De na Dorosei?
1 Te wi e du wi publiki diniwroko, dan kande a fosi idea di wi e kisi te wi e si son sma e meki taki wi e draidrai fu prati a bun nyunsu nanga den. Fu eksempre, fa yu ben sa handri efu wan man di e luku na wan atibron fasi, ala ten ben luku yu leki a no ben frutrow yu, ibritron te yu ben go na a sma di e libi na en sei èn di ben sori belangstelling gi a waarheid? Wan pionier sisa di ben ondrofeni disi ben bosroiti fu go na a man èn taki nanga en. A man ben taki en odi na wan grofu fasi. Ma a sisa ben fruwondru di a man ben arki a boskopu fu Bijbel èn nanga prisiri ben agri fu studeri. Fu di a sisa no ben krutu a fasi fa a sma ben de na dorosei, meki a pasi ben opo gi a man disi nanga en wefi fu leri a waarheid.
2 Wan tra sisa ben frede na ini a bigin di a ben si wan yonkuman nanga langa wiwiri, ma a ben tan gi en kotoigi syatu ibritron te a ben kon na ini a wenkri pe a sisa ben wroko. A muiti di a ben du ben abi bun bakapisi, èn a yonkuman de wan dopu Kotoigi now. San sa meki taki wi no e taki tumusi esi dati den sortu sma disi no sa arki wi?
3 Waka Na Baka na Eksempre fu Yesus: Yesus ben sabi taki a ben o gi en libi gi ibri sma. So bun, a no ben lasi-ati te a ben si a fasi fa trawan ben de na dorosei. A ben frustan taki srefi den wan di ben abi wan takru nen ben sa wani kenki efu den ben kisi a yoisti yepi èn efu den ben abi bun reide (Mat. 9:9-13). A ben pruberi fu yepi den guduwan nanga den pôtiwan na a srefi fasi (Mat. 11:5; Mark. 10:17-22). Meki a de so, taki wi no e krutu sma di wi e miti na ini a diniwroko na a fasi fa den de na dorosei, fu di na so fasi wi no sa si taki kande na ati fu den bun (Mat. 7:1; Yoh. 7:24). San kan yepi wi fu waka na baka a tumusi aparti eksempre fu Yesus?
4 Nanga yepi fu wi studie fu Bijbel, wi kon frustan taki a Wortu fu Gado abi a krakti fu kenki a denki fu sma, a fasi fa den e tyari densrefi nanga a persoonlijkheid fu den (Ef. 4:22-24; Hebr. 4:12). Fu dati ede, ala di wi e luku bun, wi musu abi wan positief fasi fu denki èn libi ala tra sani na ini na anu fu Yehovah, a Sma di e si fa na ati fu libisma de.—1 Sam. 16:7; Tori. 10:34, 35.
5 Meki a de so, taki a prati di wi e prati a bun nyunsu na ala sortu sma sondro fu teki sma partèi, awansi fa a fasi fu den de na dorosei, e meki taki a bigi kotiwroko e go na fesi na ini den lasti dei disi.—1 Tim. 2:3, 4.