Sori retidu neleki fa Yehovah e du dati
1 „Yehovah na wan sma di lobi retidu” (Ps. 37:28). Sobun, aladi Yehovah teki a bosroiti fu pori na onregtfardiki grontapu disi, toku a seti sani fu warskow sma fosi dati feni presi (Mark. 13:10). Disi e gi sma na okasi fu sori berow èn fu tan na libi (2 Petr. 3:9). Wi e du muiti fu sori retidu neleki fa Yehovah e du dati? Den broko-ede fu a libisma famiri nanga a pina di den e pina, e pusu wi fu prati a Kownukondre howpu nanga trawan? (Odo 3:27) Te wi lobi retidu, dan dati sa pusu wi fu abi wan fayafaya prati na a preikiwroko.
2 Preiki gi ala sortu sma: Te wi de klariklari fu fruteri ala sortu sma san Gado abi na prakseri, dan wi e „du san reti” (Mika 6:8). Wi musu kakafutu gi a sondu firi di wi abi di e meki taki wi e krutu sma te wi luku den nomo (Yak. 2:1-4, 9). Yehovah „wani taki ala sortu sma musu kisi frulusu èn kon kisi wan soifri sabi fu waarheid” (1 Tim. 2:4). A waarheid fu Gado Wortu kan meki taki sma e tyari bigi kenki kon na ini den libi (Hebr. 4:12). Te wi e frustan a tori disi, dan dati kan pusu wi fu tan go na sma sondro fu tweifri, awansi den no ben wani arki na ini a ten di pasa.
3 Wan man ben gwenti fu kon na ini a wenkri pe wan sisa e wroko, ma a heri fasi fa a man disi ben de, ben e meki a sisa disi frede pikinso. Ma toku, di a kisi na okasi, a pruberi fu fruteri a man fu a Paradijs di Gado pramisi. Sondro fu draidrai a man piki en taki a no e bribi na ini anansitori èn a ben taki dati a e gebroiki drugs. Ma a sisa no ben lasi-ati. Wán dei a man ben aksi a sisa fa a e denki fu a langa wiwiri fu en, dan na wan koni fasi a sisa fruklari san Bijbel e taki fu a tori (1 Kor. 11:14). A tra dei a sisa ben fruwondru fu si taki a man ben koti en barba puru èn taki a ben koti en wiwiri! Di a man aksi fu studeri Bijbel, dan a sisa ben seti sani so taki wan brada di ben de klariklari, ben kan studeri nanga en. A man ben go na fesi te leki a gi ensrefi abra na Gado èn teki dopu. Neleki a man disi, furu sma di e dini Yehovah na ini a ten disi de nanga tangi fu di den wan di prati a Kownukondre boskopu nanga den, ben tan meki muiti èn ben de klariklari fu taki nanga ala sortu sma.
4 Heri esi, Yehovah sa figi onregtfardikifasi puru na heri grontapu (2 Petr. 3:10, 13). Meki wi gebroiki a pikinso ten di tan abra, fu sori retidu neleki Yehovah fu di wi e gi ala sma na okasi fu lowe komoto fu na onregtfardiki grontapu fu Satan di sa kisi pori.—1 Yoh. 2:17.