¿Yu Kan Yepi Den?
1 Na apostel Paulus ben frumane den memre fu a gemeente fu „sorgu gi makandra na a srefi fasi” (1 Kor. 12:25). Fu dati ede wi musu sori taki wi abi persoonlijk belangstelling gi makandra èn de klariklari fu gi yepi na wan lobi fasi te disi de fanowdu. Leki wán eksempre: wan tu fu den sisa fu wi na yeye fasi di de na wi mindri, e kweki den pikin fu den na ini waarheid den wawan. Den sisa disi e tyari ala frantiwortu fu gi den pikin fu den leri na yeye fasi. Fu tru, den warti fu wi gi den deki-ati na wan switi fasi nanga praktisch yepi „akruderi san den abi fanowdu” (Rom. 12:13a). Yu kan yepi den?
2 Fasi fa Yu Kan Yepi Den: Efu wi e aksi den wan di musu go nanga bus noso taxi fu rèi nanga wi fu go na den konmakandra noso na den bigi konmakandra, dan dati kan yepi a famiri dati furu fu kibri moni. Te wi e yepi wan mama fu luku den nyofi pikin fu en na den konmakandra, dan a mama kan kisi moro winimarki fu a programa. So srefi, a kan frulekti a mama te wi e yepi en te a e tyari den pikin go na a velddienst. Te wi e sori taki wi abi opregti belangstelling gi den pikin—de mati fu den—dan dati kan abi wan bun krakti tapu den yonguwan fu wi. Efu wanwan leisi wi e kari wan osofamiri di abi soso a papa noso soso a mama fu abi wan prati nanga wi na wi osofamiri studie, dan dati kan gi den kowru-ati na yeye fasi.
3 Gebroiki Koni: Wi musu luku bun taki wi no wani nomonomo fu gi wan sma yepi di feni taki a no abi yepi fanowdu. Èn ala di wi e gi wan sma yepi, wi no ben sa wani fu go bumui na ini den persoonlijk afersi fu en, sondro taki a aksi wi fu dati. A no de fu taki, dati a ben sa moro bun taki sisa nanga trowpaar e yepi wan sisa di abi yepi fanowdu.
4 Ala Kresten e kisi a deki-ati fu „waka a pasi fu lobi fu ontfanga sma bun” te den abi fu du nanga makandra (Rom. 12:13b). Wan fu den furu fasi fa wi e sori a lobi di Krestes ben sori èn di wi abi na wi mindri, na te wi e yepi wi brada nanga sisa na yeye fasi.—Yoh. 13:35.