„Umasma Di E Wroko Tranga ini Masra”
1 Paulus ben gebroiki den wortu disi fu taki fu Trifeina nanga Trifosa, tu sisa di ben wroko tranga ini a gemeente fu Rome. Fu Persis, wan tra sisa, a ben taki: „A ben wroko furu ini Masra.” A ben taki moi sani tu fu Feibe, di ben de „wan sma di yepi furu sma” (Rom. 16:2, 12). Na ini Bijbel, den ben taki fu Dorkas taki a ben de wan sma di „ben du furu bun sani èn [di] ben abi furu presenti fu sari-ati di a ben gi sma” (Tori. 9:36). ¡Fa den uma disi di abi yeye fasi de wan blesi gi a gemeente!
2 ¿Wi e warderi den sisa di e wroko tranga ini a gemeente fu wi? Den e du a moro bigi pisi fu a preikiwroko, moro furu fu den bijbelstudie den e hori, èn furu fu den nyun sma na den uma disi e yepi den. Den e gi bun furu ten tu fu yepi pikin fu go na fesi na yeye fasi. Kresten uma e du san den man fu yepi taki moro lobi, prisiri, vrede nanga a faya fu du sani de ini a gemeente. Den e gi yepi na furu fasi, so taki den masra fu den nanga tra osofamiri memre kan du moro ini a diniwroko fu Yehovah.
3 Sisa ini a Furuten Diniwroko: Na mindri den wan di e wroko bun tranga gi Masra yu abi den sisa di de zendeling, èn di furu fu den yepi fu meki a wroko na tra kondre go na fesi. Ini den gemeente di a masra fu den e fisiti, den wefi fu den opziener di e reis abi furu fu du ini a velddienst, ala di den e gi furu sisa deki-ati. Wi no musu frigiti den sisa na Bethel, di e du santa diniwroko fayafaya fu horibaka gi na organisâsi fu Yehovah. Èn den gewoon pionier sisa fu wi, fu di den e du muiti na wan getrow fasi fu prèise Gado, e yepi dusundusun sma fu leri a waarheid.
4 Den getrow uma disi abi trutru satisfaksi ini a fasi fa den e libi fu gi densrefi (1 Tim. 6:6, 8). Den warti fu wi prèise den èn fu wi gi den ini wan deki-ati nanga yepi di wi man gi den.
5 Kresten uma na wan warti gudu gi Yehovah en organisâsi, fu di den e du getrow diniwroko di de wan blesi gi ala sma. Meki wi tan warderi den uma disi èn begi taki a blesi fu Yehovah sa de nanga den, ala di den e go doro fu „wroko tranga ini Masra”.