San Yu Sa Taigi wan Atheïst?
1 „Mi na wan Atheïst”, wan professor fu Polen ben taigi wan zendeling na Afrika. Ma toku a sisa ben man abi wan takimakandra nanga na uma èn ben gi en a buku Leven—Hoe is het ontstaan? Door evolutie of door schepping? (Libi—Fa A Du Kon? ¿Nanga Yepi fu Evolutie Noso fu di Gado Kria Sani?) Di a zendeling ben go baka a tra wiki, a professor ben taigi en: „¡Mi a no wan Atheïst moro!” A ben leisi a heri Schepping-buku èn now a ben aksi fu wan bijbelstudie. San yu kan du fu abi bun bakapisi ini a gi di yu e gi kotoigi na den sma di e taki dati den no e bribi na ini Gado? Na a fosi presi, luku den difrenti reide fu san ede sma e taki dati.
2 Sani Di E Meki Sma No E Bribi: A no ala Atheïst ben kweki so. Wan fasi fu anbegi ben abi krakti na tapu furu fu den èn wan dei den ben bribi na ini Gado. Ma seryusu problema nanga a gosontu noso osofamiri problema noso onregtfardikifasi di den ben ondrofeni, ben swaki a bribi fu den. Den sani di trawan fu den Atheïst ben leri tapu skoro ben abi wan takru krakti tapu a fasi fa den e si Gado. Luku den eksempre di e kon now, fu Atheïst di te fu kaba safrisafri ben kon abi wan tranga bribi na ini Yehovah Gado èn ben kon tron Kotoigi fu en.
3 Wan uma na ini Parijs ben gebore nanga wan bonyo siki di e swaki sma. Ala di a ben dopu leki wan Katoliksma, toku a ben taki dati a de wan Atheïst. Di a ben aksi den non fu san ede Gado ben gi pasi taki a ben gebore nanga so wan mankeri na skin fasi, dan a piki fu den ben de: „Fu di a lobi yu.” A ben weigri fu teki na onreidelek idea dati. So srefi, luku wan yongu sma na Fensikondre di datra ben taki fu en taki a abi wan siki na den titei fu en di no man dresi, èn a ben musu tan na ini wan lolosturu. En mama ben tyari en go na wan man fu a Pinkstergemeente di ben taki dati a e dresi sma. Ma a no ben man dresi a sma na wan wondru fasi. Leki bakapisi fu dati, a yonkuman ben lasi belangstelling na ini Gado èn ben tron wan Atheïst.
4 Wan man na ini Honduras ben kweki leki wan Katoliksma, ma ben studeri Sociaal filosofia nanga atheïsme. Fu di na universiteit leri ben overtoigi en taki libisma kon nanga yepi fu evolutie, meki a ben tapu fu bribi na ini Gado. Na a srefi fasi, wan uma na ini den Verenigde Staten ben kweki leki wan Methodistsma. Na hei skoro a ben teki leri fu psychologie. Fa disi ben abi krakti tapu a bribi fu en? A ben taki: „Na ini wán zomer den leri disi ben pori ala bribi di mi ben abi na ini relisi.”
5 Doro den Ati fu Den Sma Di De Opregti: Furu sma di e taki dati den no e bribi na ini Gado ben sa warderi en fu sabi efu wan lusu de gi den problema fu wan takru gosontu, kesekese na ini osofamiri, onregtfardikifasi èn so moro fara. Den abi opregti belangstelling fu feni piki tapu aksi soleki: ’Fu san ede ogridu de?’ ’Fu san ede ogri sani e pasa nanga bun sma?’ èn ’San a libi wani taki?’
6 Wan man nanga en wefi di e libi na ini Switserland, den ben kweki den alatu leki Atheïst. Di den ben yere a fosi leisi fu a waarheid, dan den ben weigri fu teki en. Ma den ben abi seryusu osofamiri problema èn den ben prakseri fu brokotrow. Di a Kotoigi ben fisiti den agen, dan a ben sori a trowpaar nanga yepi fu a Bijbel fa fu lusu den problema fu den. A trowpaar ben fruwondru fu a bun rai di de fu feni na ini den Buku fu Bijbel èn den ben agri fu teki wan bijbelstudie. A trowlibi fu den ben kon bun srefisrefi, den ben go na fesi na yeye fasi èn den ben teki dopu.
7 San Yu Kan Taigi wan Atheïst?: Te wan sma e taigi yu taki en na wan Atheïst, dan meki muiti fu kon sabi fu san ede a e taki dati. ¿A de fu a skoroleri ede di a kisi, den problema di a ondrofeni, noso fu a hoigrifasi fu relisi nanga falsi leri di a si? Yu ben sa kan aksi en: „¿Na so yu ben denki ala ten?” noso „San meki yu tron wan Atheïst?” A piki fu en sa yepi yu fu si san yu musu taki. A buku Is er een schepper die om u geeft? (¿Wan Kriaman De Di E Broko En Ede Nanga Yu?) kan de yoisti a sani di de fanowdu te sma e aksi krakti buweisi fu yu.
8 Yu ben sa kan bigin nanga wan takimakandra nanga wan Atheïst fu di yu e aksi:
„Yu aksi yusrefi oiti: ’¿Efu wan Gado de, dan fu san ede someni pina nanga onregtfardikifasi de na grontapu?’ [Gi okasi fu piki] ¿Mi mag sori yu fa Bijbel e si a tori disi?” Leisi Yeremia 10:23. Te yu leisi en kaba, dan aksi a sma fa a e denki fu a tekst. Dan sori en bladzijde 16 nanga 17 na ini a brochure Zal er ooit een wereld zijn zonder oorlog? (¿Wan Ten Sa Kon Pe Orloku No De Moro?). Noso, na presi fu dati, yu kan gebroiki kapitel 10 fu a Schepper-buku. Aksi en efu a ben sa wani teki a buku èn leisi en. Efu yu wani kisi moro rai, dan luku a Redeneren-buku, bladzijde 177-179
9 Ma wi musu taki tu taki a no ala Atheïst sa teki a waarheid. Ma furu fu den sma disi wani fu luku wan tra fasi fu si sani. Gebroiki wan yoisti fasi fu rideneri, gebroiki na overtoigi di yu man overtoigi sma, èn moro furu a krakti fu Gado Wortu fu yepi den fu si san na a waarheid.—Tori. 28:23, 24; Hebr. 4:12.