Ondrofenitori
◼ Australia: John, wan man di kisi bun skoroleri ben gwenti go na kerki di a ben pikin, ma bakaten a no ben e bribi srefisrefi taki wan Gado de. Wan pionier gi en wan brochure di e taki dati wan Gado de di meki ala sani (Is het leven geschapen?) Wan tra leisi a gi John a brochure di e taki fa a libi bigin (Vijf belangrijke vragen over het ontstaan van het leven). Fu yepi John, dan a pionier tan tyari den moro nyun tijdschrift gi en èn a ben e poti prakseri na den artikel di e taki fu den sani di Gado meki èn fu den Bijbel profeititori. Di a pionier si taki John ben wani kon sabi moro, dan a gi en a buku De bijbel — Gods woord of dat van mensen? (Bijbel—A wortu fu Gado noso di fu libisma?) Baka di John leisi a buku disi, a kon si taki kande wan Gado de. A pionier sori John a Bijbel leri-buku, paragraaf 8 na tapu bladzijde 20 nanga paragraaf 13-16 na tapu bladzijde 23, 24. Den Bijbeltekst na ini a buku ben naki na ati fu John so te èn a taki: „Kande mi musu go luku baka san Bijbel e leri.”
◼ Meksikow: Wan man ben taigi wan preikiman taki a no e bribi taki Gado skrifi Bijbel. A preikiman aksi a man efu a kan sori en taki Gado skrifi Bijbel trutru. Baka di a taki wan tu leisi nanga a man, dan den sani di a leri fu Bijbel bigin naki en ati. A ben naki en ati spesrutu di a kon leri sabi den wèt fu Gado. A man taigi a preikiman: „Na a bigin di mi nanga yu ben leisi Bijbel a ben gersi iniwan tra buku èn a no ben abi krakti na mi tapu. Ma te wi e leisi Bijbel now, dan spesrutu den rai di e sori wi fa wi musu tyari wisrefi, e naki mi ati.”
◼ Amerkankondre: Wan trowpaar di ben e du a spesrutu preikiwroko pe furu sma de, ben miti wan uma fu Taiwan di ben bribi na ini Gado, ma di ben si Bijbel leki wan buku gi den bakra. Na uma kon na a buku tafra fu a trowpaar. Aladi a ben abi wan bun libi, toku a no ben de koloku. A ben howpu taki Bijbel ben o yepi en fu man sabi san fu du nanga a libi fu en. A trowpaar bigin studeri a Bijbel leri-buku èn sosrefi a brochure di e taki fa fu de koloku na ini a libi (Lasting Peace and Happiness—How to Find Them). Na presi fu studeri kapitel 2 fu a Bijbel leri-buku, den taki fu a pisi na ini a brochure „Wan buku di e yepi ala sma fu kisi blesi”. Baka di den taki fu den fosi siksi paragraaf na ini a pisi disi, na uma ben e fruwondru taki Bijbel de so aparti te yu e teki en gersi nanga tra kerki buku. Baka di den taki fu den Bijbel profeititori di kon tru, a taki: „Mi no sabi nowan tra buku di e taki sani so soifri leki Bijbel!”
◼ Yapan: Aladi wan ososma ben taigi wan preikiman taki a no e bribi na ini Gado, toku a preikiman ben tan go baka na en fu taki syatu fu wan tu artikel di nen „Toeval of ontwerp?” na ini na Ontwaakt! Te fu kaba, a man kenki a fasi fa a ben denki èn a bigin taki dati kande wan Mekiman de. Now a e bribi taki wan Gado de. A preikiman e studeri a brochure Gado abi bun nyunsu gi wi! nanga en.
◼ Kanada: Di wan uma komoto na ini en oso fu go na en wagi, dan a teki wan tijdschrift di wan sisa gi en. Di a sisa go baka na en, na uma taigi en krin taki a no wani arki èn a no e bribi na ini Gado. A sisa tan pruberi èn a tyari a brochure Een voldoening schenkend leven — Hoe u dit kunt bereiken. (Fa yu kan kon abi wan koloku libi?) Di a sisa miti na uma na oso, dan a taigi en taki a ben e prakseri en, aladi na uma ben taigi en taki a no e bribi na ini Gado. A sisa ben prakseri en fu di a sabi taki na uma ben e sorgu en pikin en wawan. A sori na uma paragraaf 6 tapu bladzijde 4 fu a brochure, di e sori pe wi kan feni bun rai. Baka dati a gi en deki-ati fu leisi den rai na ini lès 2 di e taki fa fu kweki pikin. Na uma ben wani a brochure trutru.