San Kan Yepi Wi fu Tanapu Kánkan na ini a Bribi?
1 ¡Sensi di wi ben bigin bumui nanga Yehovah en organisâsi, a ben kon na krin taki a go di wi ben go na fesi na yeye fasi ben de wan sani di ben gi wi prisiri! Ma toku efu wi wani tan ’meki rutu, èn bow wisrefi, èn kon stanfaste na ini a bribi’, dan a de fanowdu taki wi e tan gro na yeye fasi (Kol. 2:6, 7). Ala di moro furu sma gro na yeye fasi, toku son wan drifi gowe fu di den no ben „tanapu kánkan na ini a bribi” (1 Kor. 16:13). Wi kan sorgu taki disi no e pasa nanga wi. Fa?
2 Tan Du Sani na Yeye Fasi Doronomo: Abi wan fasti gwenti fu du sani na yeye fasi ini Yehovah en organisâsi. Dyaso wi e kisi bogobogo san wi abi fanowdu na yeye fasi. Den gemeente konmakandra, den bigi konmakandra nanga den kongres e gi wi deki-ati fu gro na yeye fasi èn fu kon de stanfaste, ma soso te wi de ala ten na den konmakandra fu kisi den wini (Hebr. 10:24, 25). Te wi abi wan fasti gwenti fu leisi Bijbel, den Waktitoren nanga Ontwaakt! tijdschrift, èn den buku di e taki fu a tranga nyanyan na ini Gado Wortu, dan wi sa meki taki den rutu fu wi na yeye fasi sa gro go sidon dipi èn den sa kon tranga (Hebr. 5:14). Te yu e poti marki na yeye fasi gi yusrefi èn yu e wroko fayafaya fu doro den, dan yu sa kisi têgo wini fu disi.—Fil. 3:16.
3 Kisi Yepi fu Lepi Sma: Pruberi fu bumui nanga moro sma ini a gemeente di lepi na yeye fasi. Leri sabi den owruman, fu di moro furu den na den sma di kan tranga wi (1 Tes. 2:11, 12). Teki iniwan rai di den ben sa kan gi yu (Ef. 4:11-16). Dinari ini a diniwroko wani yepi trawan tu so taki den disi e kon tranga na ini a bribi, fu dati ede frutrow tapu den brada disi fu gi yu deki-ati.
4 ¿Yu abi yepi fanowdu ini a diniwroko? Taki nanga den owruman, èn aksi den yepi. Kande den kan poti yu tu ini a programma Pionier E Yepi Trawan. ¿Yu no dopu so langa ete? Te yu e studeri a Bediening-buku èn yu e du san skrifi na ini, dan dati sa yepi yu fu gro so taki yu e kon lepi na yeye fasi. ¿Yu na wan papa noso wan mama? Tranga a yeye fasi fu den pikin fu yu doronomo.—Ef. 6:4.
5 Te wi e meki rutu na ini a bribi èn wi de stanfaste, dan wi sa abi wan krosibei matifasi nanga Yehovah èn wan switi matifasi nanga den brada fu wi. Disi e meki taki wi kan kakafutu gi den ogri di Satan wani du wi, èn a e tranga a howpu di wi e howpu tapu wan têgo tamara.—1 Petr. 5:9, 10.