Preiki a Bun Nyunsu Nanga Tranga Overtoigi

¹ Fruku na ini a fosi yarihondro, Yesus Krestes ben komanderi den bakaman fu en fu preiki a bun nyunsu fu a Kownukondre èn fu „meki disipel fu sma fu ala nâsi” (Mat. 24:14; 28:19, 20). Yehovah Kotoigi ben gi yesi na den komando fu en na wan seryusu fasi, so taki na a kaba fu a di fu 20 yarihondro, a Kresten bradafasi fu wi gro kon tron moro leki 5.900.000 disipel na ini 234 kondre. ¡Disi na bun furu sten di e prèise wi hemel Tata!

² Now wi doro a di fu 21 yarihondro. A Gensman fu wi e pruberi na wan bedrigi fasi fu hendri a prenspari wroko fu wi fu preiki a Kownukondre èn fu meki disipel. A e gebroiki druk fu a seti fu sani disi fu puru wi prakseri na sani, fu nyan wi ten èn fu meki wi kon weri nanga furu sorgu nanga afersi di no de prenspari. Na presi fu gi a seti disi pasi fu fruteri wi san de prenspari na ini a libi, wi e ondrosuku gi wisrefi san Gado Wortu taki de prenspari — fu du a wani fu Yehovah (Rom. 12:2). Dati wani taki dati wi musu gi yesi na a frumane fu Bijbel fu ’preiki a wortu na ini bun ten èn na ini muilek ten, èn fu du a diniwroko fu wi dorodoro’.—2 Tim. 4:2, 5.

³ Meki Yu Overtoigi Kon Moro Tranga: Krestensma musu „tanapu dorodoro èn nanga tranga overtoigi na ini a heri wani fu Gado” (Kol. 4:12). A wortu „overtoigi” wani taki „wan tranga bribi; a de di wan sma de seiker fu wan sani”. Wi leki Kresten musu abi a tranga overtoigi taki a profeiti wortu fu Gado no e misi èn taki wi de bun fara now na ini a ten fu a kaba. Wi musu abi wan bribi di tranga neleki di fu na apostel Paulus, di ben taki dati a bun nyunsu ’fu taki en leti, de a krakti fu Gado fu frulusu ibriwan sma di abi bribi’.—Rom. 1:16.

⁴ Didibri e gebroiki godelowsu sma nanga bedrigiman, di Didibri e kori so srefi, fu abi krakti tapu trawan èn fu kori trawan (2 Tim. 3:13). Fu di wi kisi warskow na fesi fu disi, meki wi e du sani fu tranga wi overtoigi taki wi abi a waarheid. Na presi fu meki den sorgu fu a libi meki wi lasi a faya fu wi, wi e tan poti Kownukondre afersi na a fosi presi (Mat. 6:33, 34). So srefi wi no wani lasi na prakseri a tranga fanowdu fu a ten, noso wi no wani abi a firi kande taki a kaba fu a seti disi de bun fara. A kaba e kon krosibei moro nanga moro (1 Petr. 4:7). Ala di wi kan firi kande taki a prati di wi e prati a bun nyunsu no abi so furu bun bakapisi ini son kondre te wi e luku a fasi fa kotoigi ben gi kaba, toku a wroko fu warskow sma musu go doro.—Esek. 33:7-9.

⁵ Den prenspari aksi na ini a lati ten disi na: ’¿Mi e teki seryusu a komando fu Yesus fu meki disipel? ¿Mi e sori a tranga overtoigi taki a Kownukondre na wan trutru sani te mi e preiki a bun nyunsu? ¿Mi abi a fasti bosroiti fu teki prati so furu leki a kan na ini a diniwroko disi, di kan kibri sma libi?’ Fu di wi sabi o fara wi de na ini a ten fu a kaba, dan wi musu poti prakseri na wisrefi èn na a wroko di wi abi fu preiki èn fu gi trawan leri. Te wi du disi, dan wi sa kibri a libi fu wi èn fu den sma di e arki wi (1 Tim. 4:16). ¿Fa wi alamala kan tranga na overtoigi di wi leki bedinari abi?

⁶ Waka na Baka den Tesalonikasma: Di na apostel Paulus ben memre a tranga wroko fu den brada na ini Tesalonika, a ben taigi den: „A bun nyunsu di wi e preiki no ben kon na unu nanga wortu wawan, ma so srefi nanga krakti èn nanga santa yeye èn tranga overtoigi, fu di un sabi sortu sma wi ben tron fu unu ede; èn unu tron sma di e waka na wi baka èn na baka Masra, fu di unu ben teki a wortu na ondro furu banawtu èn nanga prisiri fu a santa yeye” (1 Tes. 1:5, 6). Iya, Paulus ben prèise a gemeente fu den Tesalonikasma fu di den ben preiki nanga faya èn nanga wan tranga overtoigi, ala di den ben kisi fu du nanga furu tesi. ¿San ben yepi den fu du disi? A ben de moro furu a faya nanga na overtoigi di den ben si na ini na apostel Paulus nanga den kompe-wrokoman fu en di ben abi wan bun krakti na den tapu. ¿Fa so?

⁷ A libi srefi fu Paulus nanga den kompe fu en di ben reis, ben kotoigi taki den ben abi a santa yeye fu Gado na den tapu èn taki den ben bribi nanga a heri ati fu den san den ben preiki. Bifo den ben kon na Tesalonika, dan sma na ini Filipi ben handri Paulus nanga Silas na wan syen fasi. Sondro taki sma ben hori wan krutu, den ben fon Paulus nanga Silas, ben poti den na ini strafu-oso èn ben fasi den futu fu den na ini blok. Ala di na ondrofeni disi ben hati den, toku a no ben meki den lasi a faya di den ben abi gi a bun nyunsu. Gado ben sorgu taki den ben kon fri, taki wan waktiman nanga en osofamiri ben drai den libi èn taki den brada disi ben man go doro ini a diniwroko fu den.—Tori 16:19-34

⁸ Paulus ben kon na Tesalonika na ondro a krakti fu Gado en yeye. A ben wroko drape fu kisi den sani di ensrefi ben abi fanowdu èn baka dati a ben gi ensrefi krinkrin fu leri den Tesalonikasma a waarheid. A no ben draidrai fu meki na bun nyunsu bekènti na ibri okasi (1 Tes. 2:9). A preiki di Paulus ben preiki nanga wan tranga overtoigi ben abi so wan bigi krakti tapu den sma di ben libi drape, taki sonwan fu den ben drai baka gi na anbegi fu kruktu gado di den ben abi fosi èn ben tron futuboi fu a tru Gado, Yehovah.—1 Tes. 1:8-10.

⁹ Frufolgu no ben tapu den nyun bribiman fu preiki a bun nyunsu. A nyun bribi di den Tesalonikasma ben feni ben pusu den, èn na overtoigi di den ben abi dorodoro taki den ben sa kisi blesi di e tan fu têgo, ben buweigi den fu meki a waarheid bekènti di densrefi ben teki na wan faya fasi. A gemeente dati ben wroko so tranga taki a nyunsu fu a bribi nanga a faya fu den ben panya go na pisi fu Masedonia èn srefi na ini Akaya. So bun, di Paulus ben skrifi en fosi brifi gi den Tesalonikasma, dan sma ben sabi a bun wroko fu den heri bun kaba (1 Tes. 1:7). ¡Fa disi na wan kefalek moi eksempre!

¹⁰ Lobi gi Gado èn gi Libisma Ben Buweigi Den: Fa wisrefi kan tan hori wan tranga overtoigi te wi e preiki a bun nyunsu na ini a ten disi, neleki fa den Tesalonikasma ben du dati? Paulus ben skrifi fu den: „Doronomo wi e tan prakseri a wroko di unu du na wan getrow fasi èn a tranga muiti di unu e du nanga lobi” (1 Tes. 1:3, futuwortu). A de krin fu si taki den ben abi wan dipi lobi nanga den heri ati gi Yehovah èn gi den sma di den ben preiki gi. A ben de a srefi lobi disi di ben buweigi Paulus nanga den kompe fu en fu prati nanga den Tesalonikasma „no wawan a bun nyunsu fu Gado . . . , ma so srefi [den] eigi sili”.—1 Tes. 2:8.

¹¹ Na a srefi fasi, a dipi lobi di wi abi gi Yehovah èn gi den kompe-libisma fu wi e buweigi wi fu wani abi wan prati dorodoro na ini a preikiwroko di Gado gi wi fu du. Fu di wi abi a lobi disi, wi e erken taki a de wan frantwortu di wisrefi abi èn di Gado gi wi fu prati a bun nyunsu. Te wi e prakseri na wan bun fasi èn nanga warderi fu ala den sani di Yehovah du gi wi fu tyari wi go na „a trutru libi”, dan disi e buweigi wi fu fruteri trawan den srefi tumusi moi waarheid di wisrefi e bribi nanga wi heri ati.—1 Tim. 6:19.

¹² Te wi abi furu fu du na ini a preikiwroko, dan wi lobi gi Yehovah èn gi libisma musu tan gro. Efu disi de so, dan dati sa pusu wi fu meki wi prati na ini na oso-fu-oso diniwroko kon moro bigi èn fu feti na baka ala tra fasi fu gi kotoigi di opo gi wi. Wi sa meki bun gebroiki fu okasi di de fu gi okasi kotoigi na famiriman, birtisma nanga sabiman. Ala di furu sma sa trowe kande a bun nyunsu di wi e pristeri èn sonwan sa pruberi fu hendri a meki di wi e meki a Kownukondre bekènti, toku wi e ondrofeni prisiri di e kon fu inisei. Fu san ede? Fu di wi sabi taki wi du ala san wi man fu gi kotoigi fu a Kownukondre èn fu yepi sma kisi frulusu. Èn Yehovah sa blesi den muiti di wi e du fu feni reti-ati sma. Wi kan tan hori a tranga overtoigi fu wi èn a faya di wi abi fu gi trawan kotoigi, so srefi te wi e kisi fu du nanga a hebi druk fu a libi èn nanga a muiti di Satan e du fu meki a prisiri fu wi kon moro mendri. Te wi alamala e du a prati fu wi, dan disi sa abi tranga, faya gemeente leki bakapisi, neleki a gemeente na ini Tesalonika.

¹³ No Gi Abra Noiti na Ondro Tesi: Wan tranga overtoigi de fanowdu tu te wi kisi fu du nanga difrenti tesi (1 Petr. 1:6, 7). Yesus ben tyari kon na krin gi den disipel fu en taki efu den ben sa waka na en baka, den ben sa tron „sani di no wan nâsi no wani si na ai” (Mat. 24:9). Paulus nanga Silas ben ondrofeni disi di den ben de na ini Filipi. A tori ini Tori fu den Apostel kapitel 16 e taki dati den ben fringi Paulus nanga Silas go na ini na bakasei strafu-oso èn den ben fasi den futu fu den na ini blok. Moro furu, a moro prenspari strafu-oso ben de wan opo presi di wan tu oso ben lontu en, noso wan pasi, di lontu a lanki fu en, yu ben abi cel di ben kisi leti nanga winti. Ma ini na strafu-oso di ben de na mindrisei sani no ben seti fu kisi leti èn furu winti no ben de. Na ini a mofina presi disi pe den ben sroto Paulus nanga Silas, den ben abi fu du nanga a dungru di a ben dungru, a waran di a ben waran èn a tingi di a ben tingi. ¿Yu kan prakseri a pen di den ben musu firi di den ben fasi den futu fu den na ini blok furu yuru langa, ala di den baka fu den ben abi soro èn ben brudu fu a krawasi di den ben krawasi den?

¹⁴ Ala di den tesi disi ben de, toku Paulus nanga Silas ben tan getrow. Den ben sori wan overtoigi di ben komopo na a ati fu den, èn disi ben gi den a krakti fu dini Yehovah awansi den ben kisi tesi. Krakti e poti tapu na overtoigi fu den na ini vers 25 fu kapitel 16, di e taki dati Paulus nanga Silas ben „e begi èn ben e prèise Gado nanga singi”. ¡Te yu luku en bun, dan ala di den ben de na ini na inisei strafu-oso, den ben singi tranga nofo so taki tra strafuman ben kan yere den, fu di den ben de seiker taki den ben abi a bun-ati fu Gado! Na ini a ten disi wi musu abi a srefi overtoigi te wi e kisi fu du nanga tesi tapu a bribi fu wi.

¹⁵ Didibri e tyari furu tesi kon na wi tapu. Sonwan e kisi fu du nanga frufolgu di e kon fu a sei fu famiri fu den. Furu fu den brada fu wi abi fu du nanga tyalensi fu a sei fu wet. Sma di fadon komoto na bribi kan gens wi. Wi kan broko wi ede nanga hebi problema na moni sei èn fa fu sorgu gi sani di wi abi fanowdu na ini a libi. Yongu sma abi fu du nanga druk di e kon fu a sei fu speri fu den na skoro. Fa wi kan kakafutu gi den tesi disi na wan bun fasi? San wi abi fanowdu fu sori na overtoigi fu wi?

¹⁶ Na a fosi presi, wisrefi musu tan abi wan krosibei matifasi nanga Yehovah. Di Paulus nanga Silas ben de na ini na inisei strafu-oso, den no ben gebroiki a ten dati fu kragi fu a fasi fa sani ben de nanga den noso den no ben firi sari nanga densrefi. Wantewante den ben go na Yehovah na ini begi èn den ben prèise en nanga singi. Fu san ede? Fu di densrefi ben abi wan krosibei matifasi nanga a hemel Tata fu den. Den ben frustan taki den ben pina fu regtfardikifasi ede èn taki Yehovah ben de a sma di ben kan frulusu den.—Ps. 3:8.

¹⁷ Te wi kisi fu du nanga tesi na ini a ten disi, wi musu luku go na Yehovah. Paulus e gi wi leki Kresten tranga fu ’meki Gado kon sabi den faya begi fu wi; èn a vrede fu Gado, di e pasa ala prakseri, sa kibri wi ati nanga wi krakti fu denki’ (Fil. 4:6, 7). ¡Fa a de wan sani di e trowstu wi fu sabi taki Yehovah no sa libi wi wawan te wi e kisi fu du nanga tesi! (Yes. 41:10). A de ala ten nanga wi so langa wi e dini en nanga tru overtoigi.—Ps. 46:7.

¹⁸ Wan tra prenspari sani di sa yepi wi fu sori overtoigi de fu abi ala ten furu fu du na ini a diniwroko fu Yehovah (1 Kor. 15:58). Den ben fringi Paulus nanga Silas na ini strafu-oso fu di den ben preiki a bun nyunsu. ¿Den ben tapu nanga preiki fu di den ben kisi fu du nanga tesi? Nôno, srefi di den ben de na ini strafu-oso den ben tan preiki, èn baka di den ben kon fri, den ben reis go na Tesalonika èn den ben go na ini a snoga fu den Dyu fu ’rideneri nanga den komoto fu den Buku’ (Tori. 17:1-3). Te wi abi wan tranga overtoigi noso bribi na ini Yehovah èn wi de seiker fu en taki wi abi a waarheid, dan noti „sa man prati wi fu a lobi fu Gado, di de na ini Krestes Yesus, wi Masra”.—Rom. 8:35-39.

¹⁹ Eksempre fu a Ten fu Wi Di E Sori wan Tranga Overtoigi: Furu kefalek moi eksempre de fu sma na ini a ten fu wi di ben sori wan tranga overtoigi, neleki fa Paulus nanga Silas ben du dati. Wan sisa di ben pasa na Auschwitz konsentrâsi kampu libilibi ben fruteri fu a tranga bribi nanga tranga overtoigi di den brada nanga sisa di ben de drape, ben sori. A e fruteri: „Wan dei di den ben poti aksi, dan wan fu den srudati ben kon na mi ala di a tai en kofu. ’San wi e go du nanga unu?’ a ben taki. ’Efu wi e kisi unu, dan unu e sori mi-no-ke fasi. Efu wi e seni unu go na strafu-oso, dan unu no e broko ede nanga dati srefisrefi. Efu wi e seni unu go na konsentrâsi kampu, dan a no e hati unu kwetikweti. Efu wi e gi unu dedestrafu, dan unu e tanapu drape neleki unu no abi bisi nanga dati. San wi e go du nanga unu?’” ¡Fa a e tranga wi bribi trutru fu si a bribi di den brada fu wi ben sori na ondro den takru situwâsi dati! Doronomo den ben luku go na Yehovah fu yepi den fu horidoro.

²⁰ Seiker wi sa memre na overtoigi fu furu fu den brada fu wi, di den ben kisi fu du nanga bita-ati di ben sori ensrefi ini a tori fu ras na ini den yari di no pasa so langa ete. Ala di den ben de na ini kefalek situwâsi, toku brada di abi frantwortu ben abi na prakseri fu sorgu taki den brada nanga sisa fu den e kisi nyanyan na yeye fasi. Den alamala e tan getrow nanga na tranga overtoigi taki ’no wan fetisani di den sa meki teige den sa abi bun bakapisi’.—Yes. 54:17.

²¹ Furu fu den brada nanga sisa fu wi di abi wan trowpatna di no de na bribi e sori tranga bribi nanga horidoro tu. Wan brada na ini Gwadelup ben kisi fu du nanga tranga gens di ben kon fu a sei fu en wefi di no ben de na bribi. Fu di a wefi disi ben wani meki en masra lasi-ati èn fu di a ben wani hendri a fisiti di a ben fisiti den Kresten konmakandra, dan a no ben bori gi en èn a no ben wasi, triki noso nai den krosi fu en di ben priti. Wan bun langa ten a no ben wani taki nanga en. Ma fu di a brada ben sori wan overtoigi ini a dini fu Yehovah di ben komoto na a ati èn fu di a ben go na Yehovah ini begi fu aksi yepi, meki a brada disi ben man horidoro na ondro ala den tesi. ¿O langa? So wan 20 yari langa — èn baka dati na ati fu en wefi ben kon kenki safrisafri. Te fu kaba a brada ben kan prisiri trutru fu di en wefi ben teki a howpu fu Gado Kownukondre.

²² Leki wan lasti sani, meki wi no frigiti a tranga overtoigi fu den yongu brada nanga sisa fu wi di e go na skoro ibri dei èn di abi fu du nanga druk fu a sei fu speri fu den èn nanga tra tyalensi. Wan yongu umapikin di de wan Kotoigi e taki fu a druk fu de na skoro soleki fa den tra skoropikin de: „Te yu de na skoro, dan ala sma e gi yu deki-ati ala ten fu meki opruru pikinso. Den pikin abi moro lespeki gi yu efu yu e du wan sani di e sori taki yu wani meki opruru.” ¡Den yonguwan fu wi e kisi fu du nanga druk srefisrefi! Den musu teki a fasti bosroiti ini den frustan nanga den ati fu kakafutu gi tesi.

²³ Na wan bun fasi furu fu den yonguwan fu unu e hori a soifri retifasi fu den ala di tesi de. Wan eksempre na di fu wan yongu sisa di e libi na ini Fransikondre. Wan dei baka brekten nyanyan wan tu boi ben dwengi a sisa disi fu a bosi den, ma a ben begi tranga èn a ben kakafutu tranga gi den, so taki den boi ben gowe libi en. Baka ten, wan fu den boi ben kon baka na a sisa èn a ben fruteri en taki a ben warderi a deki-ati di a ben sori. A sisa ben man gi a boi disi wan moi kotoigi fu a Kownukondre, èn a ben man tyari kon na krin den hei markitiki di Yehovah e poti gi ala den sma di wani kisi den blesi fu a Kownukondre. Na ini a skoro yari dati, a sisa ben tyari a bribi fu en kon na krin tu gi a heri klas.

²⁴ ¡Fa a de wan warti grani gi wi fu de na mindri den wan di nanga prisiri Yehovah e gebroiki den fu taki nanga tranga overtoigi fu a wani fu en! (Kol. 4:12) Boiti dati, wi abi na moi okasi fu sori a soifri retifasi fu wi te a Gensman fu wi, Satan Didibri, di e tyari ensrefi leki wan lew, e opo kon fu du wi ogri (1 Petr. 5:8, 9). No frigiti noiti taki Yehovah e gebroiki a Kownukondre boskopu fu tyari frulusu kon gi wi di e preiki a boskopu èn gi den sma di e arki wi. Meki wi sori nanga den bosroiti di wi teki èn nanga wi ala dei libi taki wi poti a Kownukondre na a fosi presi. ¡Meki wi go doro fu preiki a bun nyunsu nanga tranga overtoigi!