Taki nanga overtoigi

TE WAN sma e taki nanga overtoigi, dan trawan e si taki a e bribi trutru san a e taki. A fasi fa Paulus ben du a diniwroko fu en, ben sori krin taki a ben abi so wan overtoigi. Gi den wan di ben tron bribiman na ini Tesalonika, a ben skrifi: „A bun nyunsu di wi e preiki, no ben kon na unu nanga wortu wawan, ma sosrefi nanga . . . tranga overtoigi” (1 Tes. 1:5). Na overtoigi dati ben de krin fu si na a fasi fa Paulus ben taki, ma sosrefi na a fasi fa a ben libi. Te wi e pristeri den tru tori fu Bijbel gi trawan, dan den musu si krin taki wi abi wan tranga overtoigi.

Efu wan sma e taki nanga overtoigi, dan dati no wani taki dati a de seiker fu san a e taki, nomo fu di en e bribi dati. Dati no wani taki tu dati a sma feni taki en abi leti, sondro taki a abi buweisi gi san a e taki, èn a no wani taki tu dati a e meki bigi. Na presi fu dati, te wan sma e taki nanga overtoigi fu den sani di skrifi na ini Gado Wortu, dan a e du dati na so wan fasi taki a e sori wan tranga bribi.​—Hebr. 11:1.

Okasi pe yu kan taki nanga overtoigi. A de prenspari fu taki nanga overtoigi te yu de na ini a preikiwroko. Furu tron te sma e arki a boskopu fu yu, dan na a srefi ten den e yere tu fa yu e taki a boskopu. Den kan si fa yusrefi e firi trutru fu den sani di yu e taki. Na overtoigi di yu abi, kan du moro leki den wortu nomo di yu e gebroiki fu taki, bika na overtoigi dati kan sori trawan taki trutru yu abi wan warti sani fu fruteri den.

A de fanowdu tu fu taki nanga overtoigi te yu e taki nanga sma di abi a srefi bribi leki yu. Nanga a krakti fu santa yeye, na apostel Petrus ben skrifi en fosi brifi „fu gi deki-ati èn wan fayafaya kotoigi, taki disi na trutru a bun-ati fasi fu Gado”. Na ini a brifi disi a ben gi den brada deki-ati fu „tanapu kánkan” (1 Petr. 5:12). Di na apostel Paulus ben skrifi a gemeente na ini Rome, dan a ben taki nanga overtoigi èn dati ben tyari wini gi den. A ben skrifi: „Mi abi na overtoigi taki nowan dede noso libi, nowan engel noso tiri, nowan sani di de now noso wan sani di musu kon ete, nowan makti, nowan hei noso dipi, nowan tra mekisani sa man prati wi fu a lobi fu Gado, di de na ini Krestes Yesus, wi Masra” (Rom. 8:38, 39). Paulus ben skrifi nanga overtoigi tu di a skrifi taki a de fanowdu fu preiki gi tra sma, èn a faya di ensrefi ben abi gi a preikiwroko ben sori krinkrin taki a ben bribi trutru taki a preikiwroko de prenspari (Tori. 20:18-21; Rom. 10:9, 13-15). Na ini a ten disi Kresten owruman musu abi wan srefi sortu overtoigi te den e leri trawan a Wortu fu Gado.

Te papa nanga mama e studeri nanga den pikin fu den, dan den musu taki nanga overtoigi. Ala ten den musu abi a srefi overtoigi disi te den e taki nanga den pikin fu a bribi. Disi wani taki dati papa nanga mama musu kweki lobi gi Gado èn gi den fasi fu en na ini den eigi ati. Efu den e du dati, dan den sa man taki nanga overtoigi komoto fu na ati te den e taki nanga den pikin fu den, „bika a sani di furu na ati, na dati mofo e taki” (Luk. 6:45; Deut. 6:5-7). Te papa nanga mama abi so wan overtoigi, dan dati sa gi den deki-ati tu fu de wan eksempre fu ’bribi sondro hoigrifasi’.​—2 Tim. 1:5.

Spesrutu te tra sma e aksi yu fu a bribi fu yu, dan a de tumusi prenspari fu taki nanga overtoigi. Wan skoromati, wan skoromeester, noso wan mati fu yu na wroko, kan fruwondru taki yu no e hori wan spesrutu fesa nanga den. Te yu piki en nanga krakti, èn te yu e taki-go-taki-kon moi nanga en, dan dati kan yepi en fu lespeki a bribi di yu abi na ini Bijbel. Fa a de nanga lei, gebroiki drugs, noso fu du hurudu? San yu kan du te wan sma wani kisi yu fu go du den fowtu sani disi? A de prenspari fu sori krin taki yu no sa du den sani disi kwetikweti, èn taki a sma no abi fu pruberi srefi fu kenki yu prakseri, bika dati no sa man. Disi wani taki dati yu musu taki nanga overtoigi te yu e sori a sma, taki yu no sa du den sani dati. Di a wefi fu Potifar ben suku Yosef fu du hurudu, Yosef no ben wani du dati. Ne Yosef taki nanga krakti taki: „Fa mi kan du a bigi ogri disi èn trutru sondu na Gado?” Di a wefi ben go doro fu suku Yosef, dan Yosef lon gowe fu na oso.​—Gen. 39:9, 12.

Fa wi kan sori taki wi de seiker fu den sani di wi e taki. Den wortu di yu e gebroiki, kan du furu fu sori wan sma taki yu de seiker fu den sani di yu e taki. Na furu okasi bifo Yesus ben taki wan prenspari sani, dan a ben taki fosi: „Fu tru mi e taigi unu” (Yoh. 3:3, 5, 11; 5:19, 24, 25). Wan sma kan si na den wortu di Paulus ben taki dati a ben de nanga overtoigi, di a ben taki sani soleki „Mi abi na overtoigi”, „Mi sabi èn mi de seiker na ini Masra Yesus”, èn „Mi e taki tru, mi no e lei” (Rom. 8:38; 14:14; 1 Tim. 2:7). Di Yehovah ben wani sori fa den wortu fu en o kon tru, dan sontron a ben meki den profeiti fu en skrifi krakti wortu, soleki: „A sa kon tru sondro fu misi” (Hab. 2:3). Te yu e sori go na den profeititori disi, dan yu kan gebroiki den srefi sortu wortu tu. Efu yu no e poti frutrow tapu yusrefi, ma tapu Yehovah, èn efu yu e taki na wan lespeki fasi nanga tra sma, dan yu sa taki sani di e sori taki yu abi a srefi sortu overtoigi èn taki yu abi wan tranga bribi tu.

Yu kan sori tu taki yu de nanga overtoigi te yu e taki na wan seryusu fasi èn nanga faya. A fasi fa yu e poti yu fesi èn den sani di yu e meki nanga yu anu, kan yepi trawan fu si taki yu de seiker fu san yu e taki. Toku ibri sma abi en eigi fasi fa a e du den sani disi. Srefi efu yu e syensyen noso efu yu e taki nanga wan safu sten, toku te yu de seiker taki den sani di yu e taki na tru sani èn taki trawan musu yere den, dan ala sma sa si krin taki yu de nanga overtoigi.

A no de fu taki, dati wi musu de opregti te wi e sori taki wi e bribi trutru san wi e taki. Efu trawan firi taki wi no e taki komoto fu wi ati, dan den kan si a boskopu fu wi leki wan boskopu di no de so bun gi den. Fu dati ede, moro leki ala tra sani, yu musu de yusrefi. Efu yu e taki nanga wan bigi grupu fu sma, dan kande yu sa musu taki moro tranga leki fa yu gwenti taki, èn kande yu sa musu taki nanga moro faya. Ma ala ten yu musu pruberi fu taki nanga yu heri ati èn yu musu pruberi fu tan yusrefi.

Sani di kan yepi yu fu taki nanga overtoigi. Te yu e taki nanga overtoigi, dan dati e sori fa yu e firi fu a tori fu yu. Fu dati ede a de prenspari fu yu sreka yusrefi bun. Efu yu wani taki nanga overtoigi, dan a no nofo fu teki wan sani fu wan buku èn fu leisi dati gi den arkiman nomo. Yu musu frustan a tori fu yu krinkrin, èn yu musu man taki en nanga yu eigi wortu. Yu musu de seiker srefisrefi taki a sani di yu e taki, na wan tru sani, èn taki a warti trutru gi den arkiman fu yu. Disi wani taki dati te yu e sreka yu lezing, dan yu e hori na prakseri sortu sani e miti den arkiman fu yu, san den sabi kaba fu a tori, noso fa den e firi fu a tori.

Te wi e hori wi lezing grati, dan dati e meki en moro makriki gi trawan fu firi taki wi de nanga overtoigi. Fu dati ede, boiti taki yu e sreka yu lezing bun, dan yu musu wroko tranga fu hori yu lezing bun tu. Luku spesrutu den pisi fu yu lezing pe yu musu taki moro seryusu, so taki yu kan taki den nanga yu eigi wortu, èn yu no abi fu leisi dati fu yu papira. Noiti frigiti fu begi Yehovah fu a blesi den muiti di yu e meki. Na a fasi disi yu sa „teki deki-ati nanga yepi fu wi Gado”, so taki yu sa taki nanga overtoigi fu yu boskopu di de tru èn di de prenspari.​—1 Tes. 2:2.