¿Yu E Du wan Sani Tapu a Lobi Di Krestes Sori?
1 Di na apostel Yohanes ben e prakseri fu a fasi fa en Masra ben e libi, dan a ben skrifi: „Yesus, fu di a ben lobi den wan fu en di ben de na grontapu, ben lobi den te na a kaba” (Yoh. 13:1). Na ini a ten disi fu a Memrefesa, wi e prakseri fu a moro moi fasi fa Krestes ben sori lobi. Wi kan du wan sani tapu a lobi dati di a sori fu di wi e sori taki wi e bribi na ini a lusu-paiman, fu di wi e teki prati na a preikiwroko fayafaya èn fu di wi e horidoro „te na a kaba”, leki fa Yesus ben du.—Mat. 24:13; 28:19, 20; Yoh. 3:16.
2 A Du Di Wi E Du wan Sani Tapu a Lobi Di Krestes Sori: Yesus ben du furu na ini a lasti wiki fu en libi na grontapu (Mat. 21:23; 23:1; 24:3). Leki sma di e waka na baka na eksempre fu Yesus, dan so srefi lobi e meki taki wi e „span wisrefi bun tranga” na ini a diniwroko fu Yehovah (Luk. 13:24). ¿Yu sa gebroiki den okasi bun di seti fu gi moro kotoigi na ini april, fu di yu e wroko moro langa na ini a diniwroko?
3 A yari disi na Avondmaal fu Masra sa de na dridewroko mofoneti 19 april. ¿Omeni sma sa kon na a prenspari okasi disi? Moro furu, disi abi fu du nanga san wi e du. ¿Yu skrifi den nen kaba fu den sma di yu wani gi wan kari — den bijbelstudenti fu yu èn tra sma di abi belangstelling, yu famiri, sma di yu e du bisnis nanga den èn skoromati? ¿Yu taki nanga den èn yu gi den wan fayafaya kari kaba? ¿Yu kan gi den wan kari baka wan tu dei bifo a Memrefesa o hori? ¿Den abi a yepi fu yu fanowdu fu go na a Memrefesa? Den owruman e gi den sma di no e preiki moro, wan kari tu. Taki a Memrefesa no sa hori na a kaba fu a wiki ma na netiten fu wan dei mindri wiki, no wani taki dati a no de so prenspari taki ala sma kon na a Memrefesa.
4 Kon Srekasreka: A prenspari srefisrefi taki wi e sreka wisrefi èn taki wi abi a yoisti fasi fu denki te wi e kon na a Memrefesa. Paulus ben frumane kompe-bribiman fu hori na prakseri taki na okasi disi trutru na wan seryusu sani (1 Kor. 11:20-26). Kande yu ben sa kan leisi kapitel 13 te nanga 17 fu na Evangelie fu Yohanes te yu osofamiri bijbelstudie e hori èn kande yu ben sa kan meki ibri memre fu na osofamiri fruteri san na srakti-ofrandi fu Yesus wani taki gi en. ¡No frigiti fu leisi Bijbel ibri dei tu gi a wiki fu a Memrefesa!
5 A lobi di wi lobi Krestes tranga srefisrefi èn dati no e tapu kwetikweti na 19 april. ¡Wi abi a fasti bosroiti fu sori a lobi fu wi gi en fu têgo! A Memrefesa fu a yari disi sa yepi wi fu tranga a bosroiti dati.