„Mi Musu Froisi?”
1 Futuboi fu Yehovah di gi densrefi abra na en e arki a komando fu Yesus fu „go . . . meki disipel fu sma fu ala nâsi”. Dati meki furu fu den froisi fu go dini pe moro wrokoman de fanowdu (Mat. 28:19). Den e du san Paulus ben du, di ben arki a kari: „Abra kon na Masedonia èn yepi wi” (Tori. 16:9). Fa wan sma kan du dati na wan bun fasi?
2 Teki En Safrisafri: Yu gemeente abi kontren di den e wroko wanwan leisi nomo? Efu dati de so, dan yu ben sa kan poti prakseri na den kontren dati. Bifo yu teki a bosroiti fu go dini na wan tra presi, dan aksi den owruman fu yu gemeente efu den si taki yu o man du dati trutru. Yu ben sa kan aksi yu kringopziener efu a sabi wan gemeente krosibei pe yu ben sa kan du moro ini a diniwroko fu yu. Ma na a tra sei, baka di yu sidon teri den kostu bun, dan kande yu wani luku efu yu ben kan yepi na ini wan tra pisi fu a kondre noso na ini wan tra kondre. Efu dati na a sani di yu winsi fu du, dan makandra nanga a skin fu owruman fu yu gemeente yu musu skrifi wan brifi go na a bijkantoro fu a presi pe yu wani go dini. A brifi musu fruteri fu a nen di yu bow na ini na organisâsi. A ben o de wan koni sani fu go luku a kontren bifo yu teki a bosroiti fu froisi go libi drape trutru noso fu no du dati.
3 Luku Bun Bifo Yu E Froisi Go Libi na wan Tra Kondre: Moro nanga moro brada fu wi e froisi go libi na tra kondre, bika den e suku wan moro betre libi noso den e suku yepi fu di sma e kwinsi den. Ala di den e du dati, dan son wan fu den fadon na ini a trapu fu kruka sma di ben pramisi taki den o yepi den fu tan drape na ini a nyun kondre. Ma a wan-enkri sani di den kruka sma disi e du, na taki den e teki den moni èn e gowe libi den. Na ini son kefal, den kruka sma disi e pruberi srefi fu dwengi sma di froisi go libi na tra kondre, fu du takrudu. Te den e weigri fu du dati, dan den kruka sma disi e libi den sondro taki den man yepi densrefi na ini a kondre pe den go libi. So bun, a situwâsi fu den sma di froisi go libi na wan tra kondre, kon moro ogri leki fa a ben de na ini den eigi kondre. Kande den musu aksi tra brada srefi fu yepi den nanga wan tanpresi èn nanga tra sani. Na so fasi den e poti wan hebi na tapu tra Kresten osofamiri di abi den eigi problema kaba. Memre fu son osofamiri no e libi na wán presi makandra moro, èn osofamiri kon swaki srefi na yeye fasi fu di den no ben kisi bun rai bifo den froisi.—1 Tim. 6:8-11.
4 Efu yu wani froisi fu yu eigi bun ede, hori na prakseri taki, awinsi pe yu e libi, yu o abi fu du nanga problema. A moro makriki fu wini problema te yu de na wan presi pe yu sabi taki a tongo èn pe yu sabi a kulturu kaba, na presi fu bigin wan tra libi na wan presi di yu no sabi.