Aksi Boksu

◼ Fu san ede a bun te den arkiman e luku den tekst di a takiman aksi den fu luku te a e hori wan lezing?

A e anga fu a tori di a takiman e taki fu en, omeni tekst a sa aksi den arkiman fu leisi makandra nanga en. So srefi a e anga fu a taki di a musu taki fu ibri vers fu wan pisi fu a Wortu fu Gado te a e hori a lezing.

A de prenspari fu hori na prakseri taki wán reide fu san ede wi e leisi bijbeltekst, na fu sori taki den sani di e taki, skrifi na ini Bijbel trutru (Tori. 17:11). Wan tra reide fu san ede wi e leisi den tekst, na fu ondrosuku a buweisi di Bijbel e gi fu horibaka gi den sani di e tyari kon na fesi na ini a lezing, so taki dati kan tranga a bribi fu den arkiman. Efu den arkiman srefi e si san skrifi na ini a Bijbel te a takiman e leisi wan prenspari tekst, dan dati sa abi moro tranga krakti na tapu a frustan fu den. Boiti taki wi e luku den tekst, a bun tu fu meki notisi èn fu tan skinskin nanga den difrenti idea di e tyari kon na fesi.

Ala di a schema fu a Genootschap kan abi furu bijbeltekst fu meki a tori waka, toku den de fu yepi a takiman te a e sreka a lezing fu en. Den bijbeltekst disi kan yepi a takiman fu kon sabi moro fu wan tori èn a kan yepi en tu fu kon frustan den Bijbel gronprakseri di abi fu du nanga a tori èn so srefi a e yepi en fu kon sabi fa a tori e waka. A takiman e bosroiti sortu tekst a sa gebroiki fu meki a lezing waka bun èn a e aksi den arkiman fu luku a tekst tu te a e leisi èn te a e fruklari den tekst disi. A takiman kan leisi noso taki fu tra tekst di abi fu du nanga a tori, ma te a e du dati dan a no de fanowdu taki den arkiman e luku den.

Te a takiman e leisi bijbeltekst, dan a musu leisi den na ini a Bijbel srefi. A no musu leisi bijbeltekst di skrifi na tapu papira nanga yepi fu computer. A takiman musu taki krin sortu Bijbel buku, sortu kapitel, nanga sortu vers, te a e aksi a publiki fu leisi den tekst makandra nanga en. Te a takiman e wakti pikinso baka di a kari a tekst, fu di a poti wan aksi noso fu di a taki syatu fu a reide fu san ede den sa leisi a tekst, dan dati e yepi den arkiman fu feni a bijbeltekst. Te a takiman e taki ete wan tron sortu tekst a wani leisi, dan dati sa yepi den arkiman tu fu memre en. Toku, a moro bun fu no kari a bladzijde fu a Bijbel pe a tekst skrifi, fu di den bladzijde fu den difrenti sortu Bijbel di den sma e gebroiki no de a srefi. Te den arkiman e luku den tekst di a takiman aksi den fu luku, dan dati e yepi den fu kisi wini fu a krakti fu a Wortu fu Gado, soleki fa a takiman e fruklari dati na ini a lezing.—Hebr. 4:12.