Poti Prakseri na den Wondru Wroko fu Gado
1 Dri dei langa wi prisiri srefisrefi, fu di wi ben kon makandra na a „Duman fu a Wortu fu Gado” Distrikt Kongres. Wi ben poti den aladei sorgu fu a libi na wan sei èn wi ben poti prakseri na den wondru wroko fu Yehovah. A programa ben abi leki marki fu meki wi kisi wan moro tranga bribi na ini Gado èn na ini a Wortu fu en. A programa so srefi ben de fu yepi wi fu tranga a matifasi di wi abi nanga Gado èn fu meki wi wroko nanga moro faya na ini a diniwroko. Fa wi e kisi wini fu den sani di wi ben leri?—Yoh. 13:17.
2 Osofamiri E Gi Yesi na a Wortu fu Gado: A symposium „Gi Yesi na a Wortu fu Gado” ben yepi wi fu si fa den osofamiri fu wi tan na yeye fasi. Pikin-nengre lobi fu leri sani. So bun, papa nanga mama di gi densrefi na ini a dini fu Gado ben kisi deki-ati fu abi wan osofamiri bijbelstudie di e yepi na osofamiri fu kon tranga na yeye fasi. Furu edeman fu osofamiri e studeri a nyun brochure Yu Kan De Gado Mati! nanga den yongu pikin fu den. Disi sa yepi den fu kweki wan koloku èn bun matifasi nanga Yehovah. Papa nanga mama, leri den pikin fu yu fu abi den firi fu Gado na prakseri. Sori den fa fu du dati fu di yusrefi e sori a lobi di yu abi gi En èn gi den sani di A e du (Ps. 103:2). Wroko makandra fu poti èn fu doro marki na yeye fasi èn so srefi fu dini Yehovah dorodoro.
3 A Wortu fu Gado E Leti Wi Pasi: Wi ben breiti di wi kisi a nyun buku A Profeititori fu Yesaya—Leti gi a Heri Libisma Famiri I. Yu bigin kaba fu leisi a fosi pisi? A buku Yesaya e taki na fesi fu den takru krutustrafu di den godelowsu nâsi sa kisi èn so srefi a e taki na fesi fu den moi Kownukondre blesi gi a pipel fu Gado (Yes. 34:2; 35:10). So srefi a e meki wi kisi moro bribi nanga frutrow na ini Yehovah èn na ini a fasi fa a e du sani.—Yes. 12:2-5.
4 Te yu e leisi A Profeititori fu Yesaya I, dan yu kan frustan heri esi fa Yesaya ben man hori en soifri retifasi na Yehovah, ala di takrudu ben de na en lontu. Di a ben kisi a kari fu tron boskopuman fu Yehovah, dan Yesaya piki: „Dya mi de! Seni mi” (Yes. 6:8). Te yu e denki dipi fu a de di Yesaya ben de klariklari fu dini Yehovah, dan dati sa gi yu deki-ati fu tan preiki a bun nyunsu èn fu tan abi wan prati dorodoro na a gi di wi e gi „kotoigi na ala nâsi”.—Mat. 24:14.
5 Te wi e poti prakseri na den wroko fu Yehovah, dan dati sa gi glori na a bigi di a bigi. Fu dati ede, tan warderi a grani fu de duman fu a wortu fu Gado!