Teki Prati na a Kotiwroko Dorodoro
1 Den profeiti fu Yehovah fu owruten èn Yesus Krestes so srefi ben taki fu wan wroko fu tyari sma kon makandra (Yes. 56:8; Esek. 34:11; Yoh. 10:16). So wan sortu wroko e du now te sma e preiki a bun nyunsu fu a Kownukondre na heri grontapu (Mat. 24:14). A difrenti mindri den wan di e dini Gado èn den wan di no e dini en de fu si krinkrin (Mal. 3:18). San dati wani taki gi wi?
2 Wi Eigi Frantwortu: Wi kan leri fu na eksempre fu Paulus, di ben teki fesi na ini a Kresten diniwroko dorodoro. A ben firi taki a ben musu fu preiki, so taki ala sma ben o kisi na okasi fu yere a bun nyunsu èn taki den ben o kisi frulusu tu. Disi ben gi Paulus a deki-ati fu wroko doronomo gi den (Rom. 1:14-17). Te wi e luku na ogri situwâsi fu a libisma famiri na ini a ten disi, dan wi no e firi taki wi abi wan moro bigi frantwortu srefi fu preiki gi den wan ini a gebied di wi kisi fu wroko?—1 Kor. 9:16.
3 A Ten fu Du wan Tumusi Prenspari Wroko: Wi kan teki a preikiwroko gersi nanga wan wroko pe yu e suku èn e frulusu sma di de na ini kefar. Wi musu feni den sma èn yepi den bifo a lati tumusi. Ten no de fu draidrai. A libi fu sma de na ini kefar! A no de fu fruwondru taki Yesus ben gi den disipel fu en deki-ati fu „begi a Masra fu a kotiwroko fu seni wrokoman go na ini a kotiwroko fu en”.—Mat. 9:38.
4 Fu di furu Kownukondre preikiman si o prenspari a wroko disi de na ini a ten disi, meki den du moro fu teki prati na a wroko disi fu frulusu sma. Wan tini di nen Hirohisa ben libi nanga èn mama wawan, makandra nanga fo moro yongu brada nanga sisa. Fu yepi en osofamiri fu feni moni, a ben opo dri yuru mamanten fu tyari koranti gi sma. Ala di a ben abi a wroko disi, toku Hirohisa ben wani du moro ini a diniwroko, so bun a ben bigin nanga a gewoon pionierwroko. Na sortu fasi yu kan du moro na ini a wroko disi di noiti o du baka?
5 „A ten di tan abra kon syatu” (1 Kor. 7:29). So bun, meki a de so taki wi e du ala san wi man fu du a moro prenspari wroko disi di e du na grontapu na ini a ten disi. A wroko disi na fu preiki a Kownukondre bun nyunsu èn fu meki disipel. Yesus ben teki a diniwroko disi gersi nanga wan kotiwroko (Mat. 9:35-38). Te wi e teki prati na a kotiwroko dorodoro, dan wan fu den sani di wi man du tu, na taki wi man yepi wan sma fu kon tron wan memre fu a bigi ipi anbegiman di kari na ini Openbaring 7:9, 10.