„Mi E Tanapu Kánkan! Mi E Tanapu Kánkan! Mi E Tanapu Kánkan!”
1 Den wortu disi fu wan getrow Kresten di ben pasa a Holocaust libilibi e tan meki sma yere a fasti bosroiti fu dusundusun Kotoigi — libiwan noso dedewan — di ben hori tranga na a bribi fu den, awansi den Nazi tiriman ben du ogri-ati sani nanga den (Ef. 6:11, 13). Ini wan video di e naki sma ati, den e fruteri a tumusi moi tori fu a deki-ati fu den èn fu a wini di den ben wini den Nazi tirimakti. A video disi nen Jehovah’s Getuigen — Standvastig onder nazi-terreur. Ala sma na ini a gemeente e kisi deki-ati fu luku a video disi èn fu taki nanga makandra fa den ben feni en.
2 Meki den aksi disi yepi yu fu frustan a video moro bun: (1) Fu san ede Yehovah Kotoigi ben kakafutu trutru teige den Nazi tiriman? (2a) Sortu difrenti denki ben de fu wan odi èn fu san ede? (2b) Fa dati ben abi krakti tapu den osofamiri fu Kotoigi? (3) Omeni Kotoigi den ben seni go na strafuman kampu; fa sma ben sabi taki den na Kotoigi èn fa den Gestapo (srudati fu Doisrikondre na a pisi ten dati) ben handri nanga den? (4) San den brada nanga sisa fu wi no ben wani du fu kan kon fri? (5a) Fa èn o ten den Kotoigi fu Yehovah ben taki nanga deki-ati na publiki fu a fasi fa den ben e denki fu a kefalek takru ogridu di a tirimakti fu Hitler ben e du? (5b) San Hitler du baka dati? (6) Fa a wánfasi fu Yehovah en pipel ben sori fu de wan sani di ben kibri a libi nanga a yeyefasi fu den èn di fu trawan? (7) Sortu Kownukondre singi den ben meki na ini a strafuman kampu? (8) Sortu eksempre fu getrow man, uma nanga yonguwan e gi yu deki-ati fu hori yu soifri retifasi na Yehovah, awinsi san e pasa? (Luku so srefi a Jaarboek 1999, bladzijde 144-147.) (9) Leki wan Kotoigi fu Yehovah, dan fa a video disi e meki yu denki fu a tori taki wi no de wan pisi fu grontapu?
3 Den bun eksempre fu Yehovah Kotoigi di den e taki fu en ini a video di nen Jehovah’s Getuigen — Standvastig onder nazi-terreur kan yepi yonguwan, srefi efu den no de Kotoigi, fu kakafutu gi prenspari problema soleki te sma no e frudrage a kerki fu den èn te den abi fu du nanga a druk fu speri. A video kan yepi den so srefi na ini tori di abi fu du nanga a konsensi fu den. Efu yu de wan yonguwan èn yu e go na heiskoro, yu kan gi den skoromisi noso skoromeester fu yu na okasi fu gebroiki a tori disi na ini a klas? Kande yu kan gi den wan video èn fruteri den taki a e taki fu wan historia tori di furu sma no sabi. Yu kan fruteri den tu taki a de wan felem di e sori sma fa fu tyari densrefi.
4 A Standvastig-video na wan tumusi bun wrokosani di e sori fa a leri fu Gado e gi wi a yeye krakti fu plisi En èn fu tan tanapu kánkan gi san bun (1 Kor. 16:13). Meki ala sma di wani sabi moro fu a waarheid, si a video.