Sreka Yusrefi fu Studeri a Profeititori fu Yesaya!
1 „Getrow anbegiman kan abi a frutrow taki Yehovah . . . no sa meki a grontapu fu Satan tan wan dei moro langa leki san fiti retidu.” Disi na wortu di e gi sma deki-ati trutru! Fu pe den komoto? Fu A Profeititori fu Yesaya—Leti gi a Heri Libisma Famiri I. A profeititori fu Yesaya e gi wi reide fu abi so wan deki-ati? Iya! Ini a Bijbel buku dati a prenspari tori fu frulusu e kon na fesi krinkrin (Yes. 25:9). Fu dati ede meki a o gi wi furu deki-ati te wi e studeri a pisi disi fu Gado Wortu na a Gemeente Bukustudie. Wi o de drape ibri wiki fu nyan bun fu en? San meki wi musu de drape?
2 Ini Yesaya 30:20 den e kari Yehovah wi „Gran Leriman”. Ibri Kresten musu arki bun te Yehovah e gi wi leri fu di a e gebroiki en Wortu èn fu di a e gebroiki Bijbel publikâsi di „a getrow èn koni srafu” sreka (Mat. 24:45; Yes. 48:17, 18). Sondro tweifri disi de so tu nanga a buku A Profeititori fu Yesaya I. Fa yu kan kisi den moro bun winimarki te yu e studeri en?
3 Sreka Yusrefi fu Teki Prati: Poti nofo ten na wan sei ibri wiki fu sreka yusrefi gi a bukustudie. Leisi ala den paragraaf di poti gi a wiki dati. Prakseri fu ibriwan fu den aksi di poti na den paragraaf. Marki den piki ini yu buku. Den vers di den teki puru fu a buku Yesaya, skrifi nanga deki fatu letter. Leisi den bun. Suku den tra tekst di kari so taki yu kan kon sabi san den abi fu du nanga den sani di skrifi. Prakseri dipi fu den sani di yu e leri. Baka dati, taki nanga den sma fu yu bukustudie grupu fu den sani di yu ben kon sabi di yu sreka yusrefi.
4 A brada di e hori a bukustudie musu yepi ala sma di o de drape fu gebroiki Bijbel bun. A musu yepi den so srefi fu frustan sortu bun waarde den sani abi, di den e taki fu den. Efu yu fosi kisi wan beurt fu piki, dan gi wan syatu piki di krin. Efu wan sma du dati kaba, dan taki moro fara fu a penti dati. Kande yu kan sori fa wan prenspari tekst e horibaka gi a tori di e taki. Pruberi fu gi piki nanga yu eigi wortu, èn nyan bun fu a prisiri di a e gi fu teki prati na a takimakandra.
5 Meki wi go ondrosuku makandra a warti boskopu di de na ini a buku Yesaya èn meki wi du dati fayafaya. A o gi wi deki-ati èn ibri dei wi o tan fruwakti a frulusu fu Yehovah nanga prisiri!—Yes. 30:18.