Nyun Kring Konmakandra programma
Wan fu den sani di frede wani taki na „dipi lespeki, spesrutu gi Gado”. Disi e sori san na a bun sortu frede, èn den Buku fu Bijbel e taki dati a frede disi na „a bigin fu koni” (Ps. 111:10). Na a tra sei, wan tra sortu frede e basi a grontapu fu Satan pe wi e libi na ini. Fa wi kan sorgu taki wi no abi a sortu firi disi di no bun, ala di wi e suku fu abi lespeki frede gi Yehovah? A nyun Kring Konmakandra programma gi a dienstyari 2002 e taki fu na aksi disi. A thema na „Frede Gado èn Gi En Glori” (Openb. 14:7). Wi o kon frustan den furu fasi fa frede gi Yehovah abi wini gi wi èn sosrefi gi na organisâsi.
A kan taki frede wani taki dati wan sma abi broko-ede noso taki a lasi-ati èn sosrefi taki a e weigri fu kakafutu gi wan muilek situwâsi. Toku Bijbel e taki: „Koloku fu ibriwan sma di e frede Yehovah” (Ps. 128:1). A konmakandra programma o sori wi fa wi man kakafutu gi den tyalensi fu a tru anbegi. Wi o si fa fu yepi nyunwan fu kweki so wan bun frede gi Gado, san o gi den trutru deki-ati fu wani dini en nanga den heri ati, sili, frustan nanga krakti (Mark. 12:30). A fosi dei e tapu nanga a distriktopziener en lezing „Kisi wan Moro Tranga Banti Nanga Den Wan Di Yu Lobi”. A o fruklari fa wi kan tan na ai gi den muiti di Didibri e du fu puru wi na Yehovah, wi famiri, èn wi Kresten brada nanga sisa.
A thema fu a symposium di abi fo pisi na „Frede Yehovah, No Frede Libisma”. A symposium disi o hori na a di fu tu dei. A o fruklari fu san ede èn fa wi musu basi iniwan sortu frede di e tapu wi fu du wi diniwroko dorodoro noso di kan tapu wi fu tan opregti. A o fruklari sosrefi fa wi musu basi iniwan sortu frede di kan tapu wi fu tan abi wan bun konsensi na skoro èn na a wrokopresi. A publikitaki di nen „Frede Gado èn Hori den Komando fu En” abi fu du nanga den sani di e pasa a wan baka a trawan soleki fa Openbaring kapitel 14 e taki. A Kring Konmakandra o tapu nanga rai di sa gi wi deki-ati fu „Tan Waka na ini a Frede gi Yehovah”.
Tra heimarki fu a programma di yu no wani misi na a Theokrasia Diniwroko-skoro, a model Diniwroko Konmakandra, a dopu-lezing, èn a syatu takimakandra fu a Waktitoren-studie. Gi yu bijbelstudenti wan kari fu kon nanga yu. Iniwan sma di wani teki dopu musu taigi a fesiman opziener so esi leki a kan. Wi alamala wani fu sori taki wi abi a bun frede gi Yehovah èn wi wani gi en glori, fu di wi no o misi no wan enkri pisi fu a tumusi moi programma disi!