Yu Kan Dini Pe Moro Wrokoman De Fanowdu?
1 Oiti yu denki fu froisi go na wan presi pe moro Kownukondre preikiman de fanowdu? Efu yu ben kisi a kari fu „abra kon . . . èn yepi”, yu ben o du neleki san na apostel Paulus ben du? (Tori. 16:9, 10) Ini furu gemeente moro osofamiri noso pionier di lepi na yeye fasi de fanowdu fu yepi wroko a gebied. Moro bekwaam owruman nanga dinari ini a diniwroko de fanowdu tu fu yepi fu teki fesi. A kan taki wan lo pikinpikin foto de na ala sei fu den bigi boiti presi di de na ini a gebied. Kande a moro krosibei Kownukondre zaal de bun farawe. Kande furu grontapu wroko no de fu feni. A kan taki a weer no moi ala ten. Yu ben sa wani teki so wan tyalensi? Fa yu kan meki sani waka bun te yu du dati?
2 Bribi Nanga Frutrow De Fanowdu: Di Gado ben gi Abram bodoi, a ben libi en mamakondre Ur èn teki waka 1000 kilometer go na Haran makandra nanga en wefi, en neef, nanga en owru papa Tera (Gen. 11:31, 32; Neh. 9:7). Baka di Tera dede, Yehovah ben taigi Abram di ben abi 75 yari now, taki a musu gowe libi Haran nanga den famiri fu en èn teki waka go na wan kondre di Gado ben o sori en. Abram, Sarai, nanga Lot „ben teki pasi” (Gen. 12:1, 4, 5). A no de so taki Abram ben froisi fu dini pe moro dinari ben de fanowdu. Ma toku wan sani ben de fanowdu fu a ben kan froisi. San ben de a sani dati?
3 A ben wani taki dati Abram ben musu abi bribi èn frutrow fu du so wan sani. A ben abi fu kenki a fasi fa a ben denki èn a fasi fa a ben libi. A ben abi fu gowe libi a seikerfasi di a ben abi di a ben de nanga den famiriman fu en. Ma a ben frutrow taki Yehovah ben o sorgu en nanga en osofamiri. Furu sma fu a ten disi sori taki den e frutrow tapu Yehovah na wan srefi sortu fasi.
4 Go Yepi wan Pisi Ten: Oiti yu nyan bun fu den furu blesi di sma e kisi te den e wroko kontren di no de fu no wan gemeente? A yari di pasa 5699 preikiman fu 48 krosibei foto na ini Amerkankondre wroko so wan 163 fu den 174 kontren di no de fu no wan gemeente. Èn so wan 5676 preikiman na ini a kondre dati ben yepi 380 gemeente fu wroko kontren pe den e preiki wanwan leisi nomo. Gi son wan dati ben wani taki fu reis farawe. A ben warti a muiti?
5 Wan brada fu Kalifornia di ben go na Utah ben skrifi: „Di den ben aksi mi a fosi leisi fu tyari wan grupu go preiki na ini wan kontren pe den e preiki wanwan leisi nomo, dan mi ben tweifri. Ma mi ben teki a bosroiti fu du dati. Mi no sari noiti taki mi du dati; boiti dati, na ondrofeni disi kenki mi libi tu. Ibri dei mi e taigi Yehovah tangi gi a grani di mi ben abi fu ben kan go nanga a grupu disi.” Dyaso na ini Sranan wan brada di e dini leki gewoon pionier ben froisi go na Brownsweg fu go dini pe moro preikiman de fanowdu. A yari disi 51 sma ben kon na a Memrefesa, san e sori taki moro sma fu a kontren dati kan kon tron preikiman. No so langa pasa, wan grupu ben seti tu na Poeloegoedoe, na owstusei fu Sranan. Wi ben prisiri fu si taki a yari disi 105 sma ben kon na a Memrefesa na ini a farawe kontren disi. Furu preikiman feni taki, srefi di den dini wan syatu pisi ten pe moro wrokoman de fanowdu, toku dati gi den moro warderi gi a diniwroko. Taki nanga den wan di ben du dati. Yu o si taki den ben kisi krakti na yeye fasi èn taki den wani du dati baka efu den kisi na okasi.
6 Te yu teki na okasi fu dini wan pisi ten pe moro wrokoman de fanowdu, dan dati e gi yu wan tra okasi tu. Den wan di e du dati kan kisi bun bodoi di kan yepi den fu „teri den kostu” fu froisi go na wan tra pisi fu a kondre.—Luk. 14:28.
7 Yehovah teki a fasti bosroiti taki a bun nyunsu musu meki bekènti „na heri grontapu pe sma e libi” bifo a kaba e kon (Mat. 24:14). Efu yu frustan disi èn efu yu man yepi, dan yu no ben o wani froisi go pe moro wrokoman de fanowdu? Yepi de fanowdu na furu presi.
8 Froisi Go Pe Moro Wrokoman De Fanowdu: Yu go nanga pensyun kaba? Yu e frudini moni ala mun? Efu dati no de so, dan yu kan sreka sani taki yu na yu eigi basi? Yu kan wroko moni na ibri presi pe yu de, fu di yu e gebroiki telefon noso computer? Efu yu no man froisi, yu kan yepi wan tra memre fu a famiri fu go dini na wan tra presi?
9 Efu baka di yu begi seryusu fu a tori disi, yu e si taki yu man teki a tyalensi fu froisi go pe moro wrokoman de fanowdu, dan taki a tori disi nanga na osofamiri fu yu èn nanga den owruman ini yu gemeente. Dan skrifi wan brifi èn gi den owruman a brifi disi so taki den kan skrifi tu fa den feni a tori, bifo den e seni en go na a bijkantoro.
10 San yu musu skrifi ini yu brifi? Yu musu skrifi omeni yari yu abi, o ten yu dopu, sortu frantwortu yu abi ini a gemeente, efu yu trow noso efu yu no trow èn efu yu abi yongu pikin. Kari den nen fu den presi pe yu wani go dini, baka di yu luku a situwâsi fu yu. Fu eksempre, yu man go dini na ini wan tra gemeente noso grupu pe yu musu leri taki wan tra tongo? Yu man go dini na ini wan farawe gemeente noso grupu na ini wan distrikt noso na ini wan dorpu na tapusei? Yu wani leri tyari boto fu man du a wroko disi?
11 Yu de fayafaya èn yu wani bigin du wan sani? A situwâsi fu yu e gi yu pasi fu dini pe moro wrokoman de fanowdu? Efu dati de so, dan luku fa Yehovah e tan gi furu blesi na den wan di e frutrow tapu en te den e sori taki den wani gi densrefi!—Ps. 34:8; Mal. 3:10.