Unu De „Leki wan Prei na ini wan Theater”!
1 Na apostel Paulus ben skrifi: „Wi de leki wan prei na ini wan theater gi grontapu èn gi engel èn gi libisma” (1 Kor. 4:9). San dati wani taki, èn sortu krakti disi musu abi tapu wi te wi e du a diniwroko fu wi na ini a ten disi?
2 Kande den wortu „wan prei na ini wan theater” ben meki wan Korentesma prakseri den lasti sani di ben e pasa na ini den ogri-ati strei di den fetiman na Rome ben e hori. Ini den feti disi, sma di ben kisi krutustrafu ben e tyari kon na fesi dusundusun sma, fosi den fetiman disi ben e kiri den na wan ogri-ati fasi. Na a srefi fasi, wan bigi grupu fu libisma makandra nanga engel, ben si fa den fosi yarihondro Kresten ben musu nyan pina, fu di den ben gi kotoigi fu a Kownukondre (Hebr. 10:32, 33). Neleki fa a soifri retifasi fu den, di den tan hori ben abi krakti tapu furu sma, na so a horidoro fu wi abi krakti na tapu furu sma na ini a disiten preigron. Suma e luku wi?
3 Grontapu Nanga Libisma: Son leisi nyunsuman e tyari nyunsu kon na doro fu den sani di Yehovah en pipel du. Wi e warderi den bun èn tru sani di den e taki fu a wroko di wi e du. Ma wi e fruwakti tu taki wanwan leisi den feanti fu wi o panya takru nyunsu tu. Ma toku wi musu tan rikomanderi wisrefi leki dinari fu Gado awinsi sma e panya „takru nyunsu noso bun nyunsu” (2 Kor. 6:4, 8). Opregti sma di e si dati, e kon frustan krinkrin taki wi na tru disipel fu Yesus Krestes.
4 Den Engel: Den yeye mekisani e luku wi tu. Didibri nanga den ogri yeye fu en e luku wi — ma nanga „bigi atibron”, ala di den e suku fu tapu „a wroko fu gi kotoigi fu Yesus” (Openb. 12:9, 12, 17). Getrow engel fu Gado e luku èn den e prisiri srefi te wán sondari nomo abi berow (Luk. 15:10). A musu gi wi deki-ati fu sabi taki den engel e si wi diniwroko leki a moro prenspari sani èn leki a moro bun wroko di e du na grontapu ini a ten disi!—Openb. 14:6, 7.
5 Te yu e kisi fu du nanga gens noso te yu e denki taki a diniwroko fu yu no e gi noti, dan memre taki ala ai de na yu tapu. A horidoro di yu e horidoro na wan getrow fasi e sori o opregti yu de. Te fu kaba, te yu „feti a tumusi bun feti fu a bribi”, dan dati o meki taki yu man „grabu a têgo libi bun steifi”.—1 Tim. 6:12.