Teki na eksempre fu den getrow engel

1-2. (a) Fa wi e difrenti fu den engel? (b) Na sortu fasi wi de leki den engel?

DI YEHOVAH hari yu kon na ini a waarheid, dan yu kon na ini wan lobi famiri fu sma di e anbegi en. Den sma disi na wi brada nanga sisa na heri grontapu èn sosrefi milyunmilyun engel (Dan. 7:9, 10). Te wi e prakseri den engel, dan nofo tron wi e prakseri fa den e difrenti fu wi. Fu eksempre, Gado ben meki den engel langa ten fosi a meki libisma (Yob 38:4, 7). Den makti moro wi. Boiti dati, den santa èn den bun moro wi fu di wi na sondu libisma.​—Luk. 9:26.

² Ma aladi furu fasi de fa wi e difrenti fu den engel, tòg furu fasi de tu fa wi de leki den. Fu eksempre, neleki den engel, wi kan sori den moi fasi fu Yehovah. Neleki den engel, wi kan teki wi eigi besroiti. Neleki den engel wi alamala abi wi eigi nen, wi alamala abi tra fasi, èn wi alamala e du difrenti wroko gi Yehovah. Èn neleki den engel, wi e angri fu anbegi wi Mekiman.​—1 Petr. 1:12.

3. San wi kan leri fu den getrow engel?

³ Fu di furu fasi de fa wi de leki den engel, meki a bun eksempre fu den kan gi wi dek’ati èn wi kan leri furu prenspari sani fu den. Na ini na artikel disi wi o luku fa wi kan sori sakafasi neleki den getrow engel, fa wi kan sori lobi gi trawan, fa wi kan hordoro, èn fa wi kan du ala san wi man fu hori a gemeente krin.

DEN ENGEL ABI SAKAFASI

4. (a) Fa den engel e sori sakafasi? (b) Fu san ede den engel abi sakafasi? (Psalm 89:7)

⁴ Den getrow engel abi sakafasi. A tru taki den abi ondrofeni, taki den makti srefsrefi èn taki den abi furu koni, ma tòg den e gi yesi na Yehovah (Ps. 103:20). Te den e du a wroko di Yehovah gi den, dan den no e meki bigi fu den sani di den e du èn den no e gebroiki a makti fu den fu meki sma poti prakseri na den. Den de klarklari fu du iniwan sani di Yehovah e aksi fu den, awinsi trawan noiti no e gi den grania (Gen. 32:24, 29; 2 Kow. 19:35). Den e weigri fu kisi a grani di Yehovah musu kisi. Fu san ede den engel abi so furu sakafasi? Fu di den lobi Yehovah èn fu di den abi furu lespeki gi en.​—Leisi Psalm 89:7.

5. Fa wán engel sori sakafasi di a ben pir’ai gi na apostel Yohanes? (Luku a prenki.)

⁵ Prakseri fa a tori di e kon now e sori taki den engel abi sakafasi. Na a ten fu a yari 96, wan engel di Bijbel no e kari en nen, sori na apostel Yohanes wan tu kfalek sani (Openb. 1:1). Fa Yohanes ben feni den sani di a si? A pruberi fu anbegi na engel. Ma a getrow engel dati tapu pasi gi en heri esi. A taigi en: „No du dati! Mi na wan srafu nomo neleki yu èn neleki den brada fu yu . . . Anbegi Gado” (Openb. 19:10). Na engel dati ben abi sakafasi trutru. A no ben e suku grani gi ensrefi. Wantewante a taigi Yohanes fu anbegi Yehovah Gado. Na engel no ben denki tu taki a ben bun moro Yohanes. Aladi na engel ben e dini Yehovah moro langa leki Yohanes èn aladi a ben makti moro en, tòg a ben abi sakafasi èn a taigi na apostel taki a ben de wan srafu neleki en. Èn aladi na engel ben musu pir’ai gi Yohanes, tòg a no taigi na owru apostel hati sani. Na presi fu dati, na engel taki switi nanga en. Kande a ben ferstan taki Yohanes ben e ferwondru srefsrefi fu den sani di a ben e si.

6. Fa wi kan sori sakafasi neleki den engel?

⁶ Fa wi kan sori sakafasi neleki den engel? Neleki den engel wi wani wroko tranga tu gi Yehovah sondro fu meki bigi fu den sani di wi e du èn sondro fu du neleki wi kfalek (1 Kor. 4:7). Boiti dati, efu wi e dini Yehovah moro langa leki trawan, dan wi no musu denki taki wi bun moro den. Fu taki en leti, o moro frantwortu wi abi, o moro wi musu saka wisrefi (Luk. 9:48). Neleki den engel wi wani dini trawan. Wi no e pruberi fu meki trawan denki taki wi prenspari moro den.

7. Fa wi kan sori sakafasi te wi musu gi wan sma rai noso pir’ai?

⁷ Wi kan sori sakafasi tu te wi musu gi wan sma rai noso pir’ai èn dati kan de wan brada, wan sisa, noso wi pkin. Te wi musu gi rai, dan a kan taki wi o abi fu taigi a sma krin san a no musu du. Ma neleki a engel di ben gi Yohanes rai na wan switifasi, wi kan taigi a sma krin san a no musu sondro taki wi e meki a firi brokosaka. Te wi no e denki taki wi bun moro trawan, dan wi o man gebroiki Bijbel fu gi sma rai na wan lespeki fasi èn na wan lob’ati fasi.​—Kol. 4:6.

DEN ENGEL LOBI SMA

8. (a) Soleki fa Lukas 15:10 e sori, dan fa den engel e sori taki den lobi sma? (b) Fa den engel e yepi wi na ini a preikiwroko? (Luku a prenki na tapu a kafti.)

⁸ A no de so taki den engel no e broko den ede nanga libisma noso taki libisma no prenspari gi den. Den engel breiti te wan sma di du wan seryusu sondu e sori berow, noso te wan sma di ben stop fu dini Yehovah e drai kon baka na en. Wi srefi breiti te wan sma e kon leri sabi Yehovah èn e besroiti fu kenki en libi so taki a kan tron wan anbegiman fu en. (Leisi Lukas 15:10.) Den engel e yepi wi tu na ini a preikiwroko (Opb. 14:6). A tru taki den no e preiki gi sma, ma den kan yepi wan preikiman fu feni wan sma di wani leri sabi Yehovah. A no de fu taki dati wi no kan taki seiker taki na den engel yepi wi fu feni wan spesrutu sma. Te yu luku en bun, dan difrenti fasi de fa Yehovah kan yepi sma fu kon leri sabi en èn fa a kan yepi den futuboi fu en fu feni den sma disi. Fu eksempre, a kan gebroiki en santa yeye (Tori 16:6, 7). Tòg a e gebroiki den engel fu en fu yepi te wi e preiki. Sobun, te wi e preiki a bun nyunsu, wi kan de seiker taki den engel de drape fu wroko makandra nanga wi.​—Luku a faki „Yehovah piki a begi fu den”.

9. Fa wi kan sori lobi gi sma neleki fa den engel e du dati?

⁹ Fa wi kan sori lobi gi sma neleki fa den engel e du dati? Te wi e yere taki wan sma kon baka na ini a waarheid, dan wi kan prisiri neleki den engel. A bun te wi e meki wi brada noso sisa kon sabi taki wi lobi en èn taki wi breiti taki a e dini Yehovah baka (Luk. 15:4-7; 2 Kor. 2:6-8). Wan tra fasi fa wi kan teki na eksempre fu den engel, na te wi e du ala san wi man fu preiki a bun nyunsu (Preik. 11:6). Èn neleki fa den engel e horbaka gi wi te wi e preiki a bun nyunsu, na so wi kan suku fasi fu horbaka gi wi brada nanga sisa na ini a preikiwroko. Fu eksempre, kande wi kan meki mofo fu wroko nanga preikiman di no abi so furu ondrofeni. Noso kande wi kan yepi brada nanga sisa di owru noso siki, so taki den kan teki prati na a preikiwroko.

10. San wi kan leri fu na ondrofenitori fu Sara?

¹⁰ Ma fa a de efu a situwâsi fu wi e meki taki wi no man du so furu? Efu dati de so, dan tòg wi kan feni fasi fu wroko makandra nanga den engel na ini a preikiwroko. Luku na ondrofenitori fu Sara,b wan sisa na ini India. Baka di a pionier sowan 20 yari, a kon siki èn a no ben man kmoto na bedi moro. Wi kan ferstan taki a ben e firi brokosaka srefsrefi. Ma den Kresten brada nanga sisa fu en sori lobi gi en èn den leisi Bijbel makandra nanga en ibri dei. A sani disi meki taki safsafri Sara bigin kisi prisiri baka. A no de fu taki dati a ben musu fiti ensrefi na a nyun situwâsi fu en. Fu di a no ben man sdon srefi fu skrifi brifi, meki a ben man preiki soso nanga yepi fu telefon. Dati meki a ben e bel den gobaka fu en èn den ben e taigi en fu tra sma di ben wani sabi moro. San ben de a bakapisi? Baka wan tu mun nomo, Sara ben abi 70 Bijbelstudie. Fu di en srefi no ben man yepi den alamala, meki a aksi son sma na ini a gemeente fu studeri nanga wan tu fu den Bijbelstudie dati. Furu fu den studenti e kon na den konmakandra now. Den engel musu fu breiti fu wroko makandra nanga brada nanga sisa leki Sara di e du ala san den man na ini a preikiwroko.

DEN ENGEL E HORDORO

11. Fa den getrow engel hordoro awinsi san psa?

¹¹ Den getrow engel e hordoro awinsi san psa. Dusundusun yari langa den hordoro aladi di sma libi takru nanga trawan èn du wan lo ogr’ati sani. Den si fa Satan nanga furu tra engel di ben e dini fosi makandra nanga den, opo densrefi teige Yehovah (Gen. 3:1; 6:1, 2; Yud. 6). Bijbel e taki fu wan getrow engel di ben musu feti omeni dei langa nanga wan ogri yeye (Dan. 10:13). Boiti dati, sensi a ten fu Adam nanga Eva, den engel si taki furu sma no e besroiti fu dini Yehovah. Ma ala den sani disi no tapu den fu tan dini Yehovah fayafaya èn nanga prisiri. Den sabi taki Gado o tyari wan kba kon na kruktudu na yoisti ten.

12. San kan yepi wi fu hordoro?

¹² Fa wi kan hordoro neleki den engel? Neleki den engel wi kan si sani di no reti, noso kande sma no e libi bun nanga wi. Ma neleki den, wi e bribi taki Gado o tyari wan kba kon na ala ogridu. Sobun, neleki den getrow engel wi no e „tapu fu du san bun” (Gal. 6:9). Èn Gado pramisi taki a o yepi wi fu hordoro (1 Kor. 10:13). Wi kan begi Yehovah fu gi wi en santa yeye, di o yepi wi fu abi pasensi èn fu de nanga prisiri (Gal. 5:22; Kol. 1:11). Ma san yu musu du te yu e kisi gens? Fertrow tapu Yehovah nanga yu heri ati èn no frede. Yehovah o yepi yu ala ten èn a o gi yu krakti.​—Hebr. 13:6.

DEN ENGEL E YEPI FU HORI A GEMEENTE KRIN

13. Sortu prenspari wroko den engel musu du na ini den lasti dei? (Mateyus 13:47-49)

¹³ Na ini den lasti dei, Yehovah gi den engel wan prenspari wroko. (Leisi Mateyus 13:47-49.) Milyunmilyun sma na heri grontapu wani yere a bun nyunsu. Sonwan fu den sma disi e du san de fanowdu fu tron tru Kresten, aladi trawan no e du dati. Den engel kisi a wroko fu „puru den ogriwan na mindri den reti-ati sma.” Disi wani taki dati den kisi a wroko fu hori a gemeente krin. Disi no wani taki dati ala sma di e tapu fu moksi nanga wi, awinsi sortu reide den abi gi dati, noiti no kan drai kon baka. Disi no wani taki tu dati noiti problema o de na ini a gemeente. Tòg wi kan de seiker taki den engel e wroko tranga fu yepi hori den gemeente fu wi krin.

14-15. Fa wi kan sori taki wi wani hori a gemeente krin, neleki fa den engel e du dati? (Luku den prenki.)

¹⁴ Fa wi kan sori taki wi wani hori a gemeente krin, neleki fa den engel e du dati? Wi musu du ala san wi man fu sorgu taki wi e tan bun mati fu Gado. Wi e du disi te wi e suku bun mati di lobi Yehovah èn te wi e tan fara fu sani di kan pori a matifasi di wi abi nanga en. Na so wi e yepi fu hori a gemeente krin (Ps. 101:3). Wi kan yepi wi Kresten brada nanga sisa tu fu tan gi yesi na Yehovah. Fu eksempre, san wi musu du efu wi e kon sabi taki wan brada noso wan sisa du wan seryusu sondu? Fu di wi lobi a sma dati, meki wi musu gi en dek’ati fu go taki nanga den owruman. Efu a sma no e du dati, dan wi musu taki nanga den owruman fu a tori. Wi wani taki wi brada noso sisa kisi yepi heri esi, fu di a matifasi di a ben abi nanga Yehovah kon pori.​—Yak. 5:14, 15.

¹⁵ A sari taki den brada musu puru son sma fu a gemeente fu di den du seryusu sondu. Te disi e psa, dan wi „no musu bumui” nanga den sma datic (1 Kor. 5:9-13). A seti disi e yepi fu hori a gemeente krin. Boiti dati, te wi no e bemui nanga sma di puru fu a gemeente, dan fu taki en leti wi e sori taki wi lobi den. Wi no e bemui nanga den sma disi fu di wani gi yesi na Yehovah. Disi kan yepi den fu ferstan taki den musu drai kon baka na Yehovah. Efu den drai kon baka, dan wi e prisiri makandra nanga Yehovah nanga den engel fu en.​—Luk. 15:7.

16. Na sortu fasi yu o du muiti fu de leki den engel?

¹⁶ A de wan bigi grani taki Yehovah e gi wi okasi fu kon sabi sani fu den engel èn fu wroko makandra nanga den. Meki wi sori den moi fasi fu den: a sakafasi fu den, a lobi di den abi gi sma, a fasi fa den e hordoro, èn a fasi fa den e sorgu taki a gemeente e tan krin. Efu wi e teki na eksempre fu den getrow engel, dan fu ala ten wi kan tan na ini na famiri fu Yehovah.