Bun Maniri—Wan Spesrutu Eigifasi fu Sma Di Gi Densrefi na Gado
1 A muilek fu feni sma nanga bun maniri na ini a ten disi. Fu san ede? Sma e hasti densrefi sote taki furutron den no e prakseri srefi den fondamenti sani di den musu taki soleki „Grantangi”, „Mi e taigi yu tangi”, noso „Pardon”. A Wortu fu Gado ben taki na fesi kaba taki na ini den lasti dei, den maniri fu sma ben sa kon moro takru. Bijbel e sori dati sma ben sa ’lobi densrefi nomo, ben sa de asranti, ben sa abi heimemre, ben sa de sondro tangi, taki den no ben sa abi natuurlijk firi fu lobi, no ben sa man dwengi densrefi, no ben sa lobi bun sani, èn taki den ben sa tranga-ede’ (2 Tim. 3:1-4). Ala den sortu eigifasi disi e kweki takru maniri. Leki sma di gi densrefi na Gado, Kresten musu luku bun fu no teki a fasi disi fu grontapu abra fu no sori lespeki gi trawan.
2 San Na Maniri? Bun maniri wani taki dati yu man frustan heri bun fa trawan e firi, a man di yu man libi na ini vrede nanga trawan. Eigifasi di abi fu du nanga bun maniri na a hori di wan sma e hori trawan na prakseri, switifasi, lespeki, a sabi di wan sma sabi taki den yoisti sani na a yoisti momenti. Den eigifasi disi e kon fu a lobi di wan sma abi gi Gado èn gi tra sma (Luk. 10:27). Den eigifasi disi no e aksi tumusi furu fu wi, ma den de tumusi prenspari te wi wani meki a matifasi fu wi nanga trawan kon moro bun.
3 Yesus Krestes gi wi a moro bun eksempre. Ala ten a ben handri akruderi a Gowtu Lin di e taki: „Soleki fa unu wani taki sma musu du nanga unu, na a srefi fasi unu musu du nanga den tu” (Luk. 6:31). Wi no e fruwondru fu a fasi fa Yesus ben e hori trawan na prakseri èn fu a lobi di a ben e sori te a ben e handri nanga den disipel fu en? (Mat. 11:28-30) Den bun maniri fu en no ben komoto na markitiki di ben skrifi poti na ini buku di e sori fa wan sma musu tyari ensrefi. Den ben komoto fu wan ati di opregti èn di lobi fu gi sani. Wi musu pruberi fu waka na baka a tumusi moi eksempre fu en.
4 O ten Kresten musu sori bun maniri? Soso na spesrutu okasi, te wi wani meki trawan denki bun fu wi? Wi e sori bun maniri soso te wi e pruberi fu drai trawan ede? Nôno! Wi musu sori bun maniri ala ten. Na ini a fasi fa wi e handri nanga trawan na ini a gemeente, wi musu sori taki wi e broko wi ede nanga a pisi tori disi. Na sortu spesrutu fasi wi kan du dati?
5 Na a Kownukondre Zaal: A Kownukondre zaal na a presi pe wi e go fu anbegi Gado. Wi de drape fu di Yehovah Gado gi wi wan kari. Te yu luku en na a fasi dati, dan wi na fisitiman (Ps. 15:1). Wi na fisitiman di de wan bun eksempre te wi e go na a Kownukondre zaal? Wi e luku bun fa wi e weri krosi nanga fa wi e sorgu wisrefi? A no de fu taki dati wi no musu weri krosi di e gersi leki na koiri wi e go koiri noso krosi di de tumusi aparti. Efu na wan Kongres wi e fisiti noso wan fu den alawiki gemeente konmakandra, sma sabi a pipel fu Yehovah na a fasi fa den e weri krosi èn a fasi fa den e sorgu gi densrefi; wan fasi di fiti sma di e taki dati den e lespeki Gado (1 Tim. 2:9, 10). Na so fasi wi e sori taki wi e lespeki a Sma di de na hemel, a wan di gi wi a kari èn wi e sori taki wi e hori en na prakseri. Wi e sori dati so srefi gi den tra fisitiman di ben kisi wan kari.
6 Wan tra fasi fa wi kan sori bun maniri na te wi de biten na den konmakandra. A tru taki disi no makriki ala ten. Kande son sma e tan moi fara noso kande den abi wan bigi osofamiri di den musu yepi fu teki sreka. Ma toku a sori taki na ini wan tu fu den gemeente, so wan 25 procent fu den preikiman abi a gwenti fu doro baka a fosi singi nanga begi. Disi na wan seryusu tori. Memre taki bun maniri abi fu du nanga a hori di wi e hori a firi fu trawan na prakseri. Yehovah, a Sma di kari wi kon nanga switifasi, seti den yeye fesa disi fu a tanbun fu wi. Te wi de biten dan wi e sori taki wi e warderi en èn taki wi e broko wi ede nanga a fasi fa Yehovah e denki. Boiti dati, te wan sma e kon lati na den konmakandra dan disi e puru a prakseri fu trawan na a programa èn a e sori taki a no abi lespeki gi den wan di de na tapu a konmakandra kaba.
7 Wi e poti prakseri na den wan di kon fu a fosi leisi te wi e kon makandra? Te wi e gi den wan switi kon, dan disi na wan fasi fu sori bun maniri (Mat. 5:47; Rom. 15:7). Wan switi odi, a seki di wi e seki wan sma anu na wan switifasi, wan switi lafu — ala den sani disi na pikinpikin sani nomo, ma na sani di e meki sma kon sabi tu taki wi na tru Kresten (Yoh. 13:35). Wan man di ben fisiti a Kownukondre zaal fu a fosi leisi ben taki baka ten: „Na ini wan dei nomo mi ben miti moro sma di abi trutru lobi, sma di mi no ben sabi srefisrefi, leki mi ben miti oiti wan ten na ini a kerki pe mi gro na ini. A ben de krin taki mi ben feni a waarheid.” Leki bakapisi fu dati a ben kenki a fasi fa a ben e libi, èn seibi mun baka dati a ben teki dopu. Iya, bun maniri kan abi tumusi moi bakapisi!
8 Efu wi e sori taki wi abi maniri te wi miti wan sma di wi no sabi, dan wi musu abi a srefi fasi dati „spesrutu gi den wan di de na ini a srefi bribi leki [wi]”, a no so? (Gal. 6:10) A gronprakseri di e fiti dyaso na: „Yu musu sori taki yu e hori na owru man [noso uma] na prakseri” (Lef. 19:32). Noiti wi musu frigiti den sortu sma disi na den konmakandra fu wi.
9 Arki Nanga Ala Yu Prakseri: Na den gemeente konmakandra, Kresten bedinari fu Gado e gi leri fu man fruteri wi fu wan tu yeye presenti di e gi wi deki-ati (Rom. 1:11). Wi no ben sa sori bun maniri efu wi e dyonko, e kaw bubblegum na so wan fasi taki sma kan yere wi, e syusyu ibritron baka nanga wan sma di sidon krosibei fu wi, e opo go na toilet ala di a no de fanowdu, e leisi sani di no abi noti fu du nanga den tori di e taki, noso te wi ben sa poti prakseri na tra afersi ala di a konmakandra e hori ete. Owruman musu de wan eksempre ini a pisi tori disi. Bun Kresten maniri sa yepi wi fu sori a yoisti sortu lespeki gi a takiman nanga gi a Bijbel boskopu di a e tyari, fu di wi sa arki nanga ala wi prakseri.
10 Boiti dati, wi musu sorgu taki wi beeper nanga wi cellulair no hendri a konmakandra. Na so wan fasi wi e sori taki wi e hori a takiman na prakseri nanga den sma di e arki en.
11 Pikin Musu Leri Maniri Tu: Papa nanga mama musu luku ala ten fa den pikin fu den e tyari densrefi. Efu wan yongu pikin bigin krei noso e bigin stowtu èn disi e hendri trawan, dan a de wan bun sani fu komopo na ini a zaal so esi leki yu man, fu kan meki a pikin tan tiri. Son leisi disi kan tranga pikinso, ma memre taki disi e sori taki yu e hori den firi fu trawan na prakseri. Furutron, papa nanga mama di abi yongu pikin di e stowtu ibritron baka, wani sidon na bakasei fu a zaal. Na so wan fasi den no e hendri so furu sma te a de fanowdu fu opo fu den sidonpresi ala di a konmakandra e hori ete. A no de fu taki dati den tra sma di de na a konmakandra, kan sori tu taki den e hori den sma di de nanga pikin, na prakseri. Den kan du dati fu di den sa libi den sturu na bakasei gi den osofamiri dati so taki den kan sidon drape, efu den wani.
12 Papa nanga mama musu luku bun so srefi fa den pikin fu den e tyari densrefi fosi a konmakandra bigin nanga te a konmakandra kaba. Pikin no musu lon na ini a zaal, fu di disi kan meki den kisi mankeri. Fu lon na dorosei fu a Kownukondre zaal kan abi takru bakapisi tu, spesrutu na mofoneti te a e bigin dungru kaba. Efu wi e taki tranga te wi tanapu na dorosei, dan a kan hendri den birtisma èn a kan tyari pori nen gi wi anbegi. Wi musu prèise papa nanga mama di e meki opregti muiti fu luku den pikin fu den te den de na inisei èn na dorosei fu a Kownukondre zaal, fu di disi e meki a libi di wi e libi makandra na ini wánfasi kon moro switi.—Ps. 133:1.
13 Na a Bukustudie: Wi e warderi en te wi brada nanga sisa e ontfanga wi na den oso fu den gemeente konmakandra. Te wi de na a Bukustudie, dan wi musu sori taki wi abi lespeki èn taki wi e broko wi ede nanga den sani fu den. Fosi wi go na inisei wi musu figi wi futu bun, so taki wi no e doti a gron noso a karpet fu den. Papa nanga mama musu sorgu taki den pikin fu den e tan na ini a pisi fu na oso di seti fu hori a Bukustudie. Ala di a grupu pikin kande èn a situwâsi e meki yu firi leki yu de na oso, toku wi no kan du san wi wani na ini na oso fu a trawan, soso fu di wi e denki taki den no sa abi trobi nanga dati. Te wan yongu pikin abi fu go na toilet dan en papa noso mama musu fu go nanga en. Moro fara, fu di a Bukustudie na wan gemeente konmakandra, wi musu weri krosi leki te wi e go na a Kownukondre zaal.
14 Bun Maniri De Tumusi Prenspari: Te wi abi a gwenti fu sori Kresten maniri, dan a no sa de fu si nomo na ini wi diniwroko, ma a sa yepi wi fu abi moro bun matifasi nanga trawan (2 Kor. 6:3, 4, 6). Leki anbegiman fu a koloku Gado a no musu tranga gi wi fu lafu pikinso, fu de wan prisiri gi trawan, èn fu du den sani di gersi leki den no abi waarde, ma di na switi sani di e gi trawan prisiri. Den eigifasi disi di e sori taki wi abi maniri, e gi moro prisiri na a libi fu wi leki wan pipel di gi densrefi na Gado.