Yu E Du San Yu Ben Leri na a „Leriman fu Gado Wortu” Distrikt Kongres?
1 Iniwan sma di ben kon na a distrikt kongres a yari disi ben kan si taki a pipel fu Yehovah wani du a wroko di den kisi fu de leriman fu Gado Wortu (Mat. 28:19, 20). Di yu drai go baka na oso, dan sortu spesrutu sani di yu leri yu ben wani gebroiki ini yu eigi libi èn ini a preikiwroko?
2 Den Buku fu Bijbel Di Gado Meki Sma Skrifi, Bun fu Gi Leri: A thema fu a fosi dei ben poti prakseri na 2 Timoteus 3:16. A thema taki di nen „Wi De Srekasreka fu De Leriman fu Gado Wortu”, ben sori wi taki wi musu abi furu lespeki gi Gado Wortu, moro leki iniwan denki noso gwenti di libisma abi. A thema taki ben sori wi tu taki wi musu gebroiki Gado Wortu ala ten. Wi musu begi ala dei tu taki santa yeye e yepi wi te wi e du wi diniwroko èn wi musu meki muiti fu kweki a moro prenspari froktu fu en, èn dati na lobi. Wi leki bedinari musu gi Yehovah organisâsi na grontapu na okasi fu gebroiki ala den gemeente konmakandra fu gi wi leri.
3 A symposium fu freida di nen „Wi E Leri Wisrefi ala di Wi E Leri Trawan” fruklari taki wi musu de wan eksempre gi trawan (1) fu di wi e hori wisrefi na Gado wet te a abi fu du nanga a fasi fa wan Kresten musu tyari ensrefi, (2) fu di wi abi a gwenti fu studeri fayafaya èn (3) fu di wi e puru firi, denki èn prakseri fu na ati di Didibri kan gebroiki fu meki wi sondu. Wi ben leri so srefi wan tu bun fasi fu kibri wi osofamiri gi den seksbuku nanga seksfelem di panya na heri grontapu. Papa nanga mama ben kisi deki-ati fu de leki wan eksempre gi den pikin fu den, fu di den e sorgu taki den no e luku srefi wan pikin pisi seks di e sori na telefisi. Den kisi a deki-ati tu fu luku fa den pikin fu den e gebroiki Internet èn so srefi sortu sani den e luku na telefisi. Sortu wan fu den penti fu a programa fu freida yu bigin gebroiki kaba?
4 A lasti lezing fu a dei ben meki taki wi abi wan moro fasti bosroiti fu warderi a leti fu Yehovah, fu tan krosibei na a grupu fu den getrow salfuwan di Gado teki, èn fu yepi taki a pipel fu Yehovah kisi moro vrede. Yu leri fu singi den nyun singi kaba fu a nyun singibuku di nen: Singi Prèise Singi gi Yehovah?
5 Wi Koni Nofo fu Leri Tra Sma: A thema tekst fu a di fu tu dei ben de 2 Timoteus 2:2. Di yu ben e arki a symposium fu satra mamanten, dan yu skrifi den rai di e sori wi fa fu (1) feni den wan di warti, (2) du muiti fu yepi den so taki den wani sabi moro, èn fa fu (3) leri den fu du ala sani di Krestes komanderi? Yu e du den sani di yu leri. Yu e sori sma awinsi wán sani nomo ini a Bijbel? Yu e seti sani so taki yu kan go baka?
6 A bakadina programa ben sori o prenspari a de fu du neleki a Bigi Leriman, Yesus. Na sortu fasi yu e pruberi fu de leki en? Te yu e prakseri den sani di yu ben leri fu a di fu tu symposium fu a dei, dan fa yu denki taki yu kan „Kisi Moro Wini fu a Leri Di Gado E Gi”? Sortu wan fu den rai yu gebroiki fu man poti moro prakseri na den sani di yu e leri te yu e studeri èn te yu de na den gemeente konmakandra?
7 Sondro tweifri, a yepisani di nen Trek voordeel van de theocratische bedieningsschool (Feni Winimarki fu a Theokrasia Diniwroko-skoro) sa kon èn a sa yepi wi fu tron moro bun takiman èn moro bun leriman fu Gado Wortu. A buku sa poti moro prakseri na a koni di den getrow futuboi fu Gado ini Bijbel ten ben abi leki takiman. Ibriwan fu den les fu a nyun buku abi faki di e sori syatu san wi musu du, fu san ede a de prenspari fu du dati èn sosrefi fa fu du dati. Bun sani di sma kan oefen de tu na ini a buku. Te den sisa musu hori wan toewijzing, den sa man hori en na 29 difrenti fasi. Baka wan pisi ten den kenki di ben kari sa kon na ini a fasi fa a skoro e hori. Yu abi a bun gwenti fu studeri èn sreka yusrefi èn nyan bun dorodoro na so wan fasi fu a Theokrasia Diniwroko-skoro ibri wiki?
8 Unu Musu De Leriman Nanga a Ten na Prakseri: Hebrewsma 5:12 ben poti a prakseri fu den arkiman na a programa fu sonde. A symposium di nen „A Profeititori fu Maleaki E Sreka Wi gi a Dei fu Yehovah” ben hori a mamanten dati, èn a gi wi deki-ati fu du ala san wi man du gi Gado. A gi wi deki-ati so srefi fu tegu gi iniwan sortu feradelekfasi, so taki wi kan pasa a dei fu Yehovah di e gi sma frede. A drama di nen „Abi Lespeki gi Yehovah En Tirimakti” ben sori na wan krakti fasi fa Korak nanga den mati fu en di ben libi na ini owruten, ben opo densrefi krinkrin teige Yehovah srefi. Den ben du dati fu di den ben abi bigimemre, fu di den ben feti fu kisi grani, fu di den ben dyarusu, èn fu di den no ben de getrow na a yoisti sma. A lezing di ben kon baka dati ben sori o prenspari a de na ini a ten disi taki wi musu saka wisrefi na ondro a tirimakti fu Gado ini na osofamiri èn ini a gemeente. A publikitaki „Suma E Leri Ala Nâsi a Waarheid?” gi nofo buweisi taki Yehovah Kotoigi e du dati trutru, ala di Krestenhèit e taki nomo dati den e leri sma Bijbel waarheid.
9 A de krin taki Yehovah e leri wi fu de moro bun leriman fu a Wortu fu en. Meki wi du san wi leri, ala di wi e ’poti prakseri doronomo na wisrefi èn na den sani di wi e leri sma, bika efu wi e du disi, dan wi sa frulusu wisrefi nanga den wan di e arki wi’.—1 Tim. 4:16.