Den ’presenti ini libisma’ de klariklari fu tyari na ipi fu Gado
1 A gi di Yehovah gi wi „presenti ini libisma” nanga yepi fu en Manpikin, na trutru wan lobi-ati seti! (Ef. 4:8, 11, 12). Den abi difrenti frantwortu. Ala ten den musu de klariklari tu fu tiri na ipi fu Gado èn den musu wroko tranga fu tyari a frantwortu dati (1 Petr. 5:2, 3). Wi alamala e kisi wini fu a tumusi prenspari seti disi. Nanga den heri ati den brada disi wani yepi sma na ini a gemeente so taki na yeye fasi sani sa waka bun nanga den. Den wani yepi den wan di abi problema, den wan di de nyun na ini a gemeente, den wan di abi wan spesrutu swakifasi, noso den wan di lasi pasi.—Fil. 2:4; 1 Tes. 5:12-14.
2 Te den ogri sani di e pasa na grontapu e tapu skreki gi son sma na ini a gemeente, dan den brada di de leki skapuman ondro a tiri fu Yesus, e sori taki den de „leki wan kibripresi gi a winti èn wan kibripresi gi a sibibusi”. Te wi weri noso e tyari hebi lai, dan den e gi wi krakti baka. Den e yepi wi sosrefi te wi abi trowstu fanowdu. Na den momenti dati den de „leki watra di e lon na ini wan kondre sondro watra”, noso den de „leki a kowrupe fu wan bigi klepston di tanapu leti-opo na ini wan kondre di drei”.—Yes. 32:2.
3 Gi deki-ati na den wan di no e preiki moro: Den owruman e meki spesrutu muiti fu gi deki-ati na den wan di e no preiki ibri mun, noso den wan di no e preiki moro. Den e meki muiti fu yepi den fu tron fayafaya preikiman baka, di e wroko makandra nanga a gemeente na ini ala sani di a gemeente seti. Den owruman di de leki skapuman di e luku den skapu na wan lobi-ati fasi, ben yepi furu sma fu de na den konmakandra doronomo. Fu dati ede den sma disi kon tranga na yeye fasi, so taki den ben kan bigin teki prati baka na a preikiwroko. Ala den muiti di den owruman disi e du, e sori fa Yehovah e broko en ede nanga sma na wan lobi-ati fasi èn fa Yesus Krestes e tyari a frantwortu di a abi fu tiri a gemeente na ini a ten disi. Yesus tyari ensrefi na wan fasi di de leki wan eksempre gi owruman. A ben sori taki a e broko en ede krinkrin nanga iniwan fu den skapu fu en di lasi pasi.—Mat. 18:12-14; Yoh. 10:16, 27-29.
4 Den ondro-skapuman disi, e luku fu si efu sani de di e sori krin taki wan sma e go na baka na yeye fasi. Iniwan sma di sori taki a e lasi-ati abi yepi fanowdu na yeye fasi, èn dati de fu si te a sma no e kon na den konmakandra doronomo, noso te a no de so fayafaya moro na ini a preikiwroko. Den owruman de klariklari fu yepi iniwan sma di e bigin sori taki a wani de leki sma fu grontapu na ini a fasi fa den e sorgu den skin èn na ini a fasi fa den e weri krosi. Den wani yepi den wan tu di lobi fu krutu trawan na ini a gemeente. Fu di den owruman wani yepi trawan trutru èn fu di den abi safu firi fu lobi gi den, meki den de klariklari fu ’gi sosrefi den eigi sili’, fu man yepi den sma disi fu meki a lobi di den ben abi gi Yehovah fosi, kon tranga baka.—1 Tes. 2:8.
5 Na ini a ten di pasa, son dopu Kresten no ben go na den konmakandra moro èn den no ben preiki moro, fu di den kon siki, fu di den kisi problema na ekonomia sei, noso fu di den kisi kwinsi fu famiriman. Den owruman e pruberi fu yepi den sondro fu krutu den tumusi hebi. Na wan switi fasi, den e gi den sma disi a dyaranti taki Yehovah e broko en ede nanga den skapu fu en èn taki a sa tan horibaka gi den na ini tranga ten (Ps. 55:22; 1 Petr. 5:7). Te den skapuman de na ai fu luku na ipi fu Gado, dan den sa man yepi den sma disi fu frustan taki efu den ’kon krosibei na Gado, dan Gado srefi sa kon krosibei na den’, èn a sa trowstu den èn a sa gi den krakti baka.—Yak. 4:8; Ps. 23:3, 4.
6 Si den sikiwan leki sma di warti tu: Den lobi-ati ondro-skapuman disi e broko den ede tu nanga den wan di sma kan frigiti makriki. Pikinmoro ibri gemeente abi sma di siki, sosrefi sma di e tan na ini presi pe sma e sorgu gi owrusma, noso sma di kon swaki na skin sei so taki furu sani de di den no man du moro. A no de fu taki, dati den sma disi no man du so furu moro fu prati a Kownukondre boskopu. Kande a de so, taki den kan taki soso nanga den sma di e kon fisiti den, tra sma di de makandra nanga den na a srefi presi, noso sma di e sorgu gi den. Awansi na dati nomo den man du, toku wi musu si en leki wan tumusi warti sani bika a de wan pisi fu a preikiwroko di wi e du (Mat. 25:15). Srefi efu den ben preiki soso 15 miniti na ini wan mun, dan toku den musu meki wan preikiwroko raportu gi a gemeente. Den brada sa tan teri den sma disi leki Kownukondre preikiman di e teki prati na a preikiwroko doronomo.
7 Den brada di de leki „presenti na ini libisma”, sabi heri bun san na a yeye nowtu fu den brada nanga sisa fu den na a pisi ten fu a yari te a Memrefesa o hori. Fu dati ede a pisi ten disi na wan tumusi bun ten fu meki spesrutu muiti fu yepi den wan di lasi pasi. A de a moro bun ten fu yepi den fu nyan bun baka fu a prisiri nanga a kowru-ati di wan sma e ondrofeni, te a abi switi demakandra nanga a gemeente! Wi e prisiri fu si taki den wan di „de na ini a srefi bribi leki wi” e kon makandra nanga wi na den konmakandra. A e gi wi prisiri tu fu si den na ini a preikiwroko. Na den fasi disi den e bigin sori baka taki den e bribi trutru na ini a lusu-paiman.—Gal. 6:10; Luk. 15:4-7; Yoh. 10:11, 14.