De tevrede nanga san yu abi
1 Den Buku fu Bijbel e frumane wi fu sorgu gi san wi osofamiri abi fanowdu na materia sei, ma a sani disi no musu tron a moro prenspari marki ini wi libi. Yeye afersi musu kon na a fosi presi (Mat. 6:33; 1 Tim. 5:8). Ini den ’muilek ten disi di tranga fu pasa’ a de wan tyalensi fu poti a moro prenspari sani na a fosi presi (2 Tim. 3:1). San o yepi wi fu du dati?
2 Si sani soleki fa Bijbel e si dati: Gado Wortu e warskow wi taki te wi e suku gudu nomo, dan dati kan pori a yeye fasi fu wi (Preik. 5:10; Mat. 13:22; 1 Tim. 6:9, 10). Ini a prenspari pisi ten disi a ben o tyari takru bakapisi kon gi iniwan fu wi, efu wi ben o broko wi ede so furu nanga grontapuwroko noso nanga moni tori taki yeye afersi no de a moro prenspari sani na ini wi libi. Den yeye afersi ben kan de den konmakandra, a studeri di wi e studeri Bijbel nanga a preikiwroko (Luk. 21:34-36). Na presi fu dati Bijbel e gi wi a rai: „Te wi abi nyanyan, krosi nanga wan presi fu tan, dan wi sa de tevrede nanga den sani disi.”—1 Tim. 6:7, 8.
3 Disi no wani taki dati Kresten musu libi na wan pôtifasi. Ma a rai dati e yepi wi frustan taki den sani na materia sei di wi abi fanowdu trutru na nyanyan, krosi nanga wan tanpresi di bun nofo fu libi na ini. Efu wi abi den sani di de fanowdu ini a libi, dan wi no musu feti baka moro sani fu kan abi wan moro bun libi leki san wi abi kaba. Te wi e prakseri fu bai wan sani noso fu teki ete wan wroko, dan wi musu aksi wisrefi: ’Mi abi a sani disi fanowdu trutru?’ Efu wi e du so, dan dati sa yepi wi fu gi yesi na a rai di skrifi nanga yepi fu santa yeye: „Meki a fasi fa unu e libi de fri fu a lobi fu moni, èn de tevrede nanga den sani fu now.”—Hebr. 13:5.
4 Efu wi e frutrow tapu Yehovah, dan a sa yepi wi (Odo 3:5, 6). Aladi wi musu wroko tranga gi den sani di wi abi fanowdu ala dei, toku den sani disi no de den moro prenspari sani na ini wi libi. Awansi wi abi wan tu sani nomo noso wi abi furu sani, wi e frutrow tapu Yehovah taki a sa gi wi san wi abi fanowdu (Fil. 4:11-13). A bakapisi fu dati de taki wi sa de tevrede nanga san wi Gado e gi wi èn taki wi sa kisi furu tra blesi.
5 Waka baka na eksempre fu bribi di trawan abi: Wan mama di de en wawan èn di ben kweki na umapikin fu en ini a tru anbegi, ben seti en libi so taki te fu kaba a ben abi soso den sani di de fanowdu trutru. Aladi a ben lobi den moisani di na oso fu en ben abi, toku a froisi go na wan moro pikin oso, èn baka dati a froisi go na wan moro pikin tanpresi srefi. Fu di a du dati, meki a no ben abi fu wroko so furu moro na en grontapuwroko, so taki a ben man gi moro ten na a preikiwroko. Baka di na umapikin fu a sisa gro kon bigi èn trow, dan a sisa ben go nanga pensyun fosi a ben doro a yari fu du dati, aladi dati ben wani taki dati a ben o kisi moro mendri moni. Disi na a di fu seibi yari now taki a sisa fu wi e dini leki wan gewoon pionier èn a no e firi lasi-ati fu den sani di a lasi na materia sei. Fu di a du disi, meki a ben man poti Kownukondre afersi na a fosi presi ini en libi.
6 Wan owruman nanga en wefi ben dini furu yari leki pionier aladi den ben e kweki dri pikin. Na osofamiri fu den ben leri fu de tevrede nanga san den abi fanowdu, na presi taki den du muiti fu kisi san den wani nomo. A brada e fruteri: „Wi ben musu leri fu de tevrede nanga san de fanowdu trutru. Aladi wi pasa wan tu muilek pisi ten, toku Yehovah ben gi wi ala ten san wi ben abi fanowdu. . . . Te mi e si fa mi osofamiri e poti yeye afersi na a fosi presi, dan mi abi a firi taki ala sani e waka bun nanga wi, èn mi e firi taki wi doro wan bun marki.” A wefi fu en e taki moro fara: „Te mi e si fa [a masra fu mi] e poti prakseri na yeye afersi, dan mi e firi bun srefisrefi.” Sosrefi den pikin breiti taki den papa nanga mama ben bosroiti fu dini Yehovah leki furuten dinari.
7 Bijbel e pramisi taki ala den sma di e gi densrefi fayafaya fu dini Gado na presi fu feti baka materia sani, sa kisi furu blesi ini a ten disi èn na ini a libi di musu kon ete.—1 Tim. 4:8.