Yu kan abi gudu!
1. Fu san ede yu kan luku efu yu kan go na ini a gewoon pionierwroko?
1 Yu wani abi moro prisiri na ini yu libi? Yu lobi fu yepi trawan? Yu wani du moro na ini yu diniwroko gi Yehovah? Efu yu wani du iniwan fu den sani disi, dan kande yu kan luku efu yu kan go na ini a gewoon pionierwroko. A no de fu taki dati yu musu hori na prakseri tu sortu frantwortu yu abi na ini na osofamiri èn sortu tra Kresten frantwortu yu abi. A kan de tu taki yu musu hori a gosontu fu yu na prakseri noso o furu yu man du.
2. Kari wan tu yeye gudu di gewoon pionier e kisi.
2 Den wortu fu Salomo, di skrifi nanga yepi fu Gado en santa yeye, e sori taki den blesi fu Yehovah abi fu du nanga gudu (Odo 10:22). A moro prenspari fasi fa Yehovah e blesi wi na ini a ten disi, na den yeye gudu di a e gi wi. Gewoon pionier e kisi bun furu fu den sortu gudu disi. Fu eksempre, den e kisi wini fu di den no e feti fu du sani di kan tyari wini kon gi densrefi nomo, ma den e „gebroiki ibri okasi bun” fu yepi tra sma (Kol. 4:5; Tori. 20:35). Den sani di den e du e sori taki den lobi tra sma nanga Gado. Yehovah e si dati, èn a abi warderi gi san den e du. Den sortu ’gudu disi na ini hemel’, noiti e lasi waarde (Mat. 6:20; Hebr. 6:10). Boiti dati, fu di den pionier e hori den „ai krin” èn den e frutrow tapu Yehovah fu gi den san den abi fanowdu na ini a libi, meki a matifasi di den abi nanga en e kon moro bun.—Mat. 6:22, 25, 32; Hebr. 13:5, 6.
3. San na a difrenti te sma e du muiti fu kisi yeye gudu èn te sma e feti fu kisi gudu na ini a grontapu disi?
3 Te sma e feti fu kisi gudu, dan nofo tron disi e meki taki den e kisi „wan lo dondon èn takru lostu” (1 Tim. 6:9, 10; Yak. 5:1-3). Noiti disi e pasa nanga den blesi fu Yehovah. Fu di gewoon pionier e gebroiki furu fu den ten na ini a diniwroko, meki disi e yepi den fu tan abi wan bun matifasi nanga Yehovah, èn fu tan hori na prakseri san na den moro prenspari sani na ini a libi (Fil. 1:10). Wan brada, di ben abi wan bun grontapuwroko, libi a wroko fu en fu di a wroko ben e teki furu fu en ten. A brada disi ben taki: „A wroko di mi ben e du, ben gi mi furu broko-ede. Disi no de so nanga a pionierwroko. Now mi man yepi tra sma èn mi man gi den leri fu den tru tori fu Bijbel. A wroko disi gi mi moro prisiri èn mi lobi en moro, fu di mi man yepi sma fu leri sabi den tru tori fu Bijbel.”
4. Fa gewoon pionier e kisi blesi aladi den e meki trawan kisi blesi tu?
4 Den de wan blesi gi trawan: Na ini a ten disi ala sma abi fu du nanga ’muilek ten di tranga fu pasa’ (2 Tim. 3:1). A sani di sma na ala sei abi tranga fanowdu, na howpu. Kownukondre preikiman e prisiri fu si fa sma di no abi howpu, e kon de nanga prisiri baka, te den e gi yesi na a bun nyunsu. A prisiri di den gewoon pionier e kisi leki bakapisi fu dati, bigi trutru, fu di den e gebroiki moro leki 800 yuru ibri yari na ini a wroko di den e du fu yepi sma kisi libi.—1 Tim. 4:16.
5, 6. San kan yepi yu fu tron wan gewoon pionier?
5 Yu go sidon denki kaba efu yu o man dini leki wan gewoon pionier? Disi wani taki kande dati yu o abi fu „gebroiki ibri okasi bun”, èn kande yu no o du son sani di no de so prenspari (Ef. 5:15, 16). Furu sma du disi èn den e libi soso nanga den sani di den abi fanowdu trutru. Disi meki taki den no e wroko so langa moro na a grontapuwroko fu den, èn a ten dati den e gebroiki fu man du moro na ini a Kownukondre diniwroko. Yu man seti sani so taki yu man go tu na ini a gewoon pionierwroko?
6 Aksi Yehovah fu gi yu a koni so taki yu kan meki wan bun schema (Yak. 1:5). Sortu blesi yu kan fruwakti fu kisi te yu e go na ini a gewoon pionierwroko? Bun furu yeye gudu! Yehovah sa blesi yu tu nanga den sani di yu abi fanowdu na ini a libi (Mat. 6:33). Den wan di e tesi Yehovah na a fasi disi sa kisi „wan blesi teleki nowan sani e mankeri moro”.—Mal. 3:10.