Aksi di opo kon

◼ San wi musu hori na prakseri te wi e gebroiki cellulair nanga tra sani tapu san sma kan bel wi?

Den sani disi kan yepi wi fu meki kontakti nanga trawan na pikinmoro ala presi pe wi de. A bun efu wi kan gebroiki cellulair nanga tra sani tapu san sma kan bel wi, ma wi musu luku bun taki wi no e gebroiki den na ten di no fiti, so taki den e puru wi prakseri fu wi preikiwroko noso fu den Kresten konmakandra fu wi. Fa dati kan pasa?

Prakseri san ben kan pasa efu a cellulair fu wi noso wan tra sani tapu san sma kan bel wi, bigin meki babari aladi we e teki prati na a preikiwroko èn e fruteri wan sma fu a bun nyunsu. San na ososma ben o denki? San na ososma ben o prakseri efu wi ben o tapu a takimakandra nanga en fu kan teki a cellulair? Wi no ben sa wani du nowan sani kwetikweti di ben kan tapu trawan fu arki a Kownukondre boskopu (2 Kor. 6:3). Fu dati ede, efu wi e waka nanga wan cellulair noso wan sani tapu san sma kan bel wi, dan wi musu seti den so, taki den no musu broko a takimakandra di wi noso wan trawan abi te wi e preiki gi wan sma.

Wi kan gebroiki a cellulair noso tra sani tapu san sma kan bel wi te wi musu wakti wan brada noso sisa di e preiki gi wan sma? Efu wi poti wan ten na wan sei gi a preikiwroko, dan wi musu hori wi prakseri na a wroko dati, a no so? Grantangi, meki wi sori taki wi e lespeki wi santa diniwroko, fu di wi e gebroiki wan tra ten fu du sani di no prenspari so, soleki fu taki fu den bisnis afersi fu wi noso fu abi switi takimakandra nanga trawan (Rom. 12:7). A no de fu taki dati a no fowtu fu gebroiki a telefon fu fruteri wan sma a bun nyunsu moro fini noso fu meki wan mofo nanga en fu du dati.

Wi musu luku bun spesrutu efu wi wani gebroiki wan cellulair te wi e rei wagi, fu di wan tu ondrosuku ben tyari kon na fesi taki efu wan sma e bel aladi a e rei wagi, dan a tyans moro bigi taki wan ongoloku kan pasa. Wi musu hori wisrefi ala ten na iniwan wet di e taki dati wi no musu gebroiki cellulair te wi e rei wagi.

Wi e go na den Kresten konmakandra, den kring konmakandra noso den kongres fu anbegi Yehovah èn fu kisi leri fu en. Fu di wi e warderi den santa okasi disi, meki wi musu seti den cellulair nanga tra sani tapu san sma kan bel wi na so wan fasi taki den no e puru wi prakseri, noso a prakseri fu trawan, a no so? Efu wan prenspari afersi de di wi musu poti prakseri na dati wantewante, dan wi musu du dati dorosei fu a konmakandra presi. Efu a tori no de so prenspari, dan wi musu seti sani so, taki na wan tra ten wi e poti prakseri na wi eigi afersi èn na tra afersi di no abi noti fu du nanga a bribi fu wi; a sani dati no musu pasa na a ten di wi poti na wan sei gi na anbegi fu wi.—1 Kor. 10:24.

Meki a de so taki a fasi fa wi e gebroiki cellulair noso tra yepisani, e sori ala ten dati wi e hori trawan na prakseri èn dati wi e warderi yeye afersi trutru.