Tapu a yeye nowtu fu yu
1 A „Fayafaya Kownukondre preikiman” Distrikt Kongres di e kon e gi wi wan moi okasi fu tapu a yeye nowtu fu wi. Neleki fa gosontu nyanyan e gi wi skin krakti, na so wi kan abi a frutrow taki „den wortu fu bribi” di wi sa yere na a programa fu a kongres sa gi wi krakti na yeye fasi (1 Tim. 4:6). A sa yepi wi fu tron moro bun mati fu Yehovah. Wi kan fruwakti sosrefi fu kisi rai nanga deki-ati di sa yepi wi fu pasa den tesi di e miti wi na ini wi libi. Yehovah e gi wi a dyaranti: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Ps. 32:8). A de trutru wan blesi taki a e tiri wi libi na so wan lobi-ati fasi! Meki wi luku wan tu rai di kan yepi wi fu kisi moro furu winimarki fu a programa fu a kongres.
2 Wi musu sreka wi ati: Ibriwan fu wi abi a frantwortu fu kibri na agersi ati fu wi (Odo 4:23). Disi wani taki dati wi musu man fu dwengi wisrefi fu du wan sani doronomo èn taki wi no musu kori wisrefi. A kongres na wan ten fu denki dipi fu a matifasi di wi abi nanga Yehovah. A de wan ten fu „luku finifini na ini a volmaakti wet di e meki wi kon fri”. Efu wi wani sreka wi ati so taki ’a wortu poti dipi na ini’, dan wi musu begi Yehovah fu ondrosuku wi, so taki A kan tyari kon na krin efu wi e waka wan „takru pasi” di wi musu kenki. Wi musu aksi en sosrefi efu A kan tyari wi na tapu „a pasi fu ten di no skotu”.—Yak. 1:21, 25; Ps. 139:23, 24.
3 Arki bun èn denki dipi fu san yu yere: Yesus ben prèise Maria taki Maria ben arki nanga ala en prakseri na den sani di a ben e taki. Yesus ben taki: „Maria, fu en sei, ben teki a bun pisi, èn sma no sa teki dati puru na en anu” (Luk. 10:39, 42). Efu wi e denki na a srefi fasi leki Maria, dan wi no sa gi pasi taki ala pikinpikin sani puru wi prakseri fu san wi e yere. Wi sa sorgu taki wi e sidon arki nanga ala wi prakseri na a pisi ten te a programa e hori. Wi no sa sidon takitaki, noso opo waka lontu fu soso èn wi sa luku bun taki wi no puru a prakseri fu tra sma nanga sani soleki cellulair telefon, kamera fu meki fowtow noso felem, noso iniwan tra sani di kan meki babari.
4 Te wi e arki den lezing, dan a bun fu skrifi syatu san na den edepenti. Na so fasi wi kan yepi wisrefi fu frustan moro bun san den difrenti pisi fu a takimakandra abi fu du nanga makandra. Wi musu moksi san wi e leri nanga san wi sabi kaba. Disi sa yepi wi fu frustan a tori èn fu memre den sani di wi e yere. Te wi e luku den edepenti baka di wi ben skrifi, dan wi musu du dati nanga a marki fu fiti den tori dati na ini wi aladei libi. Ibriwan fu wi kan aksi wisrefi: ’Sortu krakti a sani disi abi tapu a matifasi fu mi nanga Yehovah? Sortu kenki mi musu tyari kon na ini mi libi? Fa den sani di mi leri kan yepi na ini a fasi fa mi e libi nanga trawan? Fa mi kan wroko nanga den sani disi na ini mi diniwroko?’ Taki nanga trawan fu den sani di yu ben lobi spesrutu. Te wi du den sani disi, dan dati sa yepi wi fu hori den sani di Yehovah taki ’dipi na ini wi ati’.—Odo 4:20, 21.
5 Meki wi du san wi e leri: Baka wan distrikt kongres, wan brada ben taki: „A programa ben abi fu du langalanga nanga ibriwan sma di ben de drape. A gi ala sma deki-ati fu ondrosuku den eigi ati èn fu luku sosrefi fa a de nanga na ati fu den memre fu na osofamiri fu den, so taki na wan lobi-ati fasi den kan gi yepi di de fanowdu nanga yepi fu Bijbel. A meki mi kon frustan moro bun sortu bigi frantwortu mi abi fu gi moro yepi na a gemeente.” A no de fu taki dati furu fu wi ben firi a srefi fasi. Ma a no nofo fu go na oso nanga a firi nomo taki wi ben kisi krakti nanga deki-ati. Yesus ben taki: „Efu unu sabi den sani disi, dan koloku fu unu te unu e du den” (Yoh. 13:17). Wi musu wroko tranga sosrefi fu du den sani di abi fu du nanga wisrefi (Fil. 4:9). Disi na a prenspari sani di o yepi wi fu tapu a yeye nowtu fu wi.
[Faki na tapu bladzijde 5]
Denki dipi fu den sani di yu e yere:
■ Sortu krakti a abi tapu a matifasi fu mi nanga Yehovah?
■ Sortu krakti a abi tapu a fasi fa mi e libi nanga trawan?
■ Fa mi kan fiti den sani disi na ini mi eigi libi èn na ini mi diniwroko?