Aksi di opo kon

◼ Sortu Bijbeltekst wi wani hori na prakseri te wi ben o gebroiki wi cellulair na den konmakandra noso na ini a preikiwroko?

„Gi ala sani wan ten de” (Preik. 3:1): Sma kan gebroiki cellulair fu taki nanga trawan noso fu seni boskopu iniwan ten. Ma na son okasi Kresten no wani meki den telefon puru den prakseri. Fu eksempre, wi e anbegi Yehovah na den konmakandra fu wi, wi e kisi leri fu en, èn wi e gi makandra deki-ati (Deut. 31:12; Ps. 22:22; Rom. 1:11, 12). Wi ben o man kiri wi telefon te wi doro na den konmakandra èn leisi den boskopu fu wi baka a konmakandra? Efu wi no wani kiri wi telefon fu di wi sabi taki wi o kisi wan prenspari boskopu, dan wi musu seti en na so wan fasi taki a no e puru a prakseri fu trawan.

„Du ala sani fu a bun nyunsu ede” (1 Kor. 9:23): Son leisi wi kan gebroiki wan cellulair bun na ini a diniwroko. Fu eksempre, wan brada di e teki fesi na ini a diniwroko, kan gebroiki a cellulair fu luku fa a e go nanga den tra preikiman na ini a kontren. Son leisi den preikiman e gebroiki den cellulair fu taki nanga wan gobaka noso wan Bijbelstudie fosi den go na en, spesrutu efu a sma e tan bun fara. Efu wi abi wan telefon dan wi musu seti en na so wan fasi taki a no e puru wi prakseri te wi e taki nanga wan ososma (2 Kor. 6:3). Te wi e wakti wan tra preikiman aladi a e taki nanga wan ososma, dan a no ben o moro bun fu poti prakseri na a diniwroko èn na a sma di e wroko nanga wi, na presi fu bèl noso seni boskopu gi wi mati?

Hori trawan na prakseri (1 Kor. 10:24; Fil. 2:4): Noiti wi musu denki taki wi kan kon lati na a preikiwroko konmakandra fu di wi sabi taki ala ten wi kan bèl noso sms wan sma fu kon sabi pe a grupu e wroko. Te wi kon lati, dan nofo tron a brada musu seti a grupu baka. A no de fu taki dati sani kan pasa di kan meki taki wi e doro lati wanwan leisi. Ma te wi abi a gwenti fu doro biten, dan wi e sori taki wi e lespeki a seti fu Yehovah èn wi e hori a brada di e teki fesi nanga den tra preikiman na prakseri.