Go baka na ala sma di sori taki den wani sabi moro
1 Tide, furu fu wi de na ini a tru anbegi fu di wan sma ben si taki wi ben arki a Kownukondre boskopu, èn nanga pasensi, kande furu leisi srefi, den ben kon baka na wi fu leri wi moro sani. Na a srefi fasi, na wan opregti fasi wi musu go baka na ala sma di sori taki den wani sabi moro. Iya, a tyari fu gobaka abi fu du nanga a wroko di wi kisi fu ’meki sma tron disipel’.—Mat. 28:19, 20.
2 Luku efu wan sma wani sabi moro: Srefi te wan sma no wani teki wi buku, toku nanga a fasi fa a poti en fesi, a fasi fa a e taki, noso den wortu di a e taki, a kan sori taki a wani sabi moro fu a Kownukondre boskopu. Te wi e si dati, dan wi kan go baka na a sma. Wan brada ben tyari gobaka na wan sma feifi wiki langa baka makandra sondro fu prati buku. A di fu siksi leisi di a go, a sma teki buku, èn te fu kaba a bigin nanga wan bijbelstudie.
3 Te yu e si taki wan sma wani sabi moro, dan yu musu go baka wantewante, kande wan tu dei na baka. No gi „na ogriwan” na okasi fu hari a sani puru di sai na ini a sma ati (Mat. 13:19). Hori yusrefi na a pramisi di yu meki fu go baka na den sma na wan spesrutu ten.—Mat. 5:37.
4 Te wi e du stratiwroko: Yu e du muiti fu go baka na sma di yu miti te yu du stratiwroko noso okasi-preikiwroko? Te yu kaba taki nanga a sma, dan yu kan taki: „Mi lobi a takimakandra di wi ben abi. Pe mi kan miti yu fu man taki go doro fu a tori disi?” Efu a fiti, dan son preikiman kan gi den telefon-nomru na a sma di wani sabi moro, noso den kan aksi a telefon-nomru fu a sma. Te sma e si taki yu e du a stratiwroko na a srefi presi doronomo, dan kande den sa de klariklari fu gi yu a telefon-nomru noso na adres fu den. Srefi te den no wani taigi yu fa yu kan miti den baka, yu kan fruteri den moro sani na wan tra leisi te yu miti den na strati.
5 Te wi e si fa den bon di wi kweki na ini wan dyari e gro kon bigi, dan wi e prisiri. Na a srefi fasi, wi kan kisi furu prisiri te wi e go baka na sma fu yepi den fu kisi wan bun banti nanga Gado (1 Kor. 3:6). Du muiti fu go baka na ala sma di e sori taki den wani sabi moro.