Pristeri na boen njoensoe — Foedi joe o go wantewante baka na belangstelling di joe feni
1 Na apostel Paulus ben gi Timotéus dek’ati nanga den wortoe: „préki na wortoe, hori joesrefi bezig nanga en leki nanga wan tranga fanowdoe afersi . . . doe na wroko foe wan evangelium-prékiman, doe joe wroko dorodoro” (2 Timotéus 4:2, 5). Na rai dati de na ini a ten disi wan sani di fiti srefsrefi.
2 A de tranga fanowdoe foe feni den laste-wan foe den sma di e „soktoe èn e geme” foe na porifasi di de na ini na kristenheid (Ezech. 9:4). Ija, „na heri grontapoe didon na ini a makti foe na godelowsoewan”, sodati sma na alape abi na Kownoekondre fanowdoe (1 Johannes 5:19). Wi kan jepi den foedi wi o tjari boen gobaka di e doro den marki. Go baka wantewante na belangstelling di wi ben feni, kan ferloesoe libi.
GO ESI BAKA
3 Efoe joe go esesi baka, baka na fosi takmakandra, dan na kans de bigi dati na oso sma sabi ete foe sortoe tori joe ben taki. Joe sa de dan na ini wan boen positie foe teki na tori baka foe taki en foe wiki a belangstelling go moro fara. Kande joe kan wiki na belangstelling bifo tra sma si kans, foe poti negatief prakseri go na ini na ferstan foe na ososma.
4 Di wan sisa ben e wroko wan moende mamanten ini na velddienst, a ben miti wan jongoe mama di ben lasi ati èn di ben broeja èn a ben gi kotoigi na en. A ben go na fodewroko dati baka èn opo wan bijbelstudie. A frow ben taki dati noiti sma ben piki den aksi foe en so krin nanga jepi foe bijbel. Fréda agen a ben kisi fisiti foe poti en prakseri na tapoe a tori di ben sa hori ini na Wachttoren-studie foe sonde. Na oema ben de tapoe na fosi komakandra tapoe sonde èn ben tan go na fesi tapoe jejefasi. Efoe wi wakti toemsi langa foe gobaka na sma di abi belangstelling dan na fosi belangstelling e kon kowroe kande esesi èn a kan de moeilek foe wiki disi baka.
5 Na a fosi fisiti wan spesroetoe mofo kan meki foe wan gobaka. Disi kan doe heri boen foedi joe kan poti wan aksi di e tjari a sma go denki èn dan joe kan pristeri foe go baka foe gi a piki. Meki wan mofo gi wan spesroetoe ten ini a tra wiki, bakaten ini asrefi wiki ofoe a tra dé efoe dati boen.
GO NA ALA BELANGSTELLING DI JOE FENI
6 Wi alamala e kisi dek’ati leki kristen foe meki discipel (Mattéus 28:19). Boiti den sma di e teki bijbellektuur, dan ooktoe trawan abi belangstelling gi na boen njoensoe. Son sma di no e teki bijbellektuur de kande klarklari foe abi takmakandra tapoe na bijbel. Efoe joe si belangstelling, efoe joe libi now lektuur ofoe no, go séker baka dan èn proberi foe wiki na belangstelling. Wi e soekoe na sma di abi belangstelling gi na boen njoensoe.
7 Wan speciale pionier sisa ini Korea ben si pikinso belangstelling na wan oema di alaten ben e wégri foe teki tijdschrift. Na pionier sisa ben poti den tijdschrift baka ini en tas èn a oema ben de klarklari foe taki foe wantoe foe den paragraaf foe wan foe den brochure. Na sisa ben kon baka dri dé baka foe wan di foe toe takmakandra. Baka ete wantoe fisiti na oema ben kisi toe tron ini wan wiki bijbelstudie. Bifo fo moen a ben man foe wini hebi gens foe na famiri èn a ben bigin foe préki na tra sma.
8 Efoe joe wani wiki belangstelling troetroe èn joe wani opo bijbelstudie, dan a de toemsi prenspari foe go baka wantewante na ala belangstelling di joe feni. Nanga disi joe sa kisi foeroe blèsi foe anoe foe Jehovah.