O ten wi musu go baka na sma di wani sabi moro fu Bijbel?
1. San wi musu du fu man meki disipel?
1 Fu man meki disipel, wi musu go baka na iniwan sma di e sori taki a de klariklari fu kon sabi moro fu a Kownukondre seti fu Yehovah (Mat. 28:19, 20). Nofo tron a de na a schema fu wi èn na a di fu a sma fu sabi san na a moro bun ten fu go baka na en. Fu san ede wi no musu wakti langa fu go baka na wan sma di wi miti?
2, 3. Fu san ede wi musu pruberi fu go baka so esi leki wi man?
2 Fu san ede wi no musu wakti langa fu go baka? A wroko fu preiki „a bun nyunsu disi fu a kownukondre”, o kon na wan kaba heri esi, èn a kaba fu a sistema disi kon krosibei (Mat. 24:14; 1 Petr. 4:7). Fu dati ede, fu di „wan dei fu frulusu sma” de ete gi den wan di wani sabi moro, meki wi musu poti prakseri na a rai di wi kisi fu ’preiki a wortu fayafaya’. Dati wani taki dati wi musu go baka so esi leki wi man na sma di wani sabi moro fu Bijbel, so taki wi kan yepi den.—2 Kor. 6:1, 2; 2 Tim. 4:2.
3 Satan de nomonomo fu pori iniwan Kownukondre siri, di wi ben kan sai na ini na ati fu wan sma di wani kon sabi moro fu Bijbel (Mark. 4:14, 15). Nofo tron famiriman, sma na wrokope, nanga tra sma e spotu den sortu sma disi. Te wi no e draidrai fu go baka, dan wi o man taki moro fara fu den sani wi ben taki a fosi leisi. Na so fasi tra sma no o feni na okasi fu puru na angri di a sma abi fu kon sabi moro fu Bijbel.
4. Te wi taki nanga wan sma a fosi leisi, dan fa wi kan seti sani fu go baka na en?
4 Meki mofo fu go baka: Te yu taki nanga wan sma fu a fosi leisi, dan a moro bun fu taigi en wantewante o ten yu o drai go baka. Poti wan aksi di yu sa piki te yu go baka na en. A de prenspari fu skrifi fu san unu ben taki na a fosi takimakandra, èn sosrefi o ten yu musu go baka. Efu yu man, dan yu kan aksi a sma efu yu kan go baka na en a tra dei, noso syatu baka dati. Efu na wan satra noso sonde yu ben miti wan sma di wani sabi moro fu Bijbel, èn a sma e wroko mindriwiki, dan kande a sma o agri taki yu go baka a tra satra noso sonde. Te yu meki mofo fu go baka, dan sorgu taki yu du dati.—Mat. 5:37.
5. Te wi e tyari gobaka so esi leki wi man, dan fa dati o yepi wi fu klari a wroko di Yesus gi wi fu meki disipel?
5 Wi abi bun reide fu go baka so esi leki wi man na sma di wani sabi moro fu Bijbel. Fu dati ede, meki mofo nanga a sma, èn no wakti langa fu drai go baka, fu di „a ten di tan abra kon syatu” (1 Kor. 7:29). Te wi no e wakti langa fu go baka na sma di wani sabi moro fu a Kownukondre boskopu, dan wi kan abi moro bun bakapisi.