Yepi trawan fu gi Yehovah glori
1 Wan tumusi prenspari boskopu e meki bekènti na heri grontapu. „Frede Gado èn gi en glori, bika a yuru doro te a sa tyari krutu kon, èn fu dati ede, anbegi a Sma di ben meki hemel nanga grontapu nanga se nanga den watra fonten” (Openb. 14:6, 7). Wi abi a grani fu teki prati na a wroko fu meki a boskopu disi bekènti. San sma musu sabi fu Yehovah so taki den e frede en èn taki den e anbegi en?
2 A nen fu Yehovah: Fu di wi e gebroiki a nen fu a wan-enkri tru Gado, meki sma kan si taki a no de a srefi leki den furu falsi gado di sma e anbegi na ini a ten disi (Deut. 4:35; 1 Kor. 8:5, 6). Fu taki en leti, den man di skrifi a Bijbel, gebroiki a glori nen fu Yehovah moro leki 7000 leisi. Aladi wi musu abi a koni fu si o ten a fiti fu meki sma kon sabi a nen fu Gado, toku noiti wi musu kibri noso weigri fu gebroiki a nen. Gado wani taki a heri libisma famiri musu kon sabi en nen.—Ps. 83:18.
3 A fasi fa Gado de: Fu man gi Yehovah grani, sma musu kon sabi sortu Gado a de. Wi musu meki den kon sabi a bigi lobi fu en, a kefalek bigi koni fu en, a volmaakti retidu fu en, nanga a bigi krakti fu en. Boiti dati, wi musu meki sma kon sabi a sari-ati fu en, a lobi bun-ati fu en nanga den tra moi fasi fu en (Ex. 34:6, 7). Sma musu leri sosrefi fu frede fu du wan sani di Gado no feni bun, fu lespeki en èn den musu erken taki den eigi libi e anga fu a feni di Yehovah feni wi bun.—Ps. 89:7.
4 Tron mati fu Gado: Efu sma wani kisi frulusu te Gado en krutudei e kon, dan den musu kari Yehovah nanga bribi (Rom. 10:13, 14; 2 Tes. 1:8). Disi wani taki dati den sma musu sabi moro leki soso a nen nanga den fasi fu Gado. Wi musu yepi den sosrefi fu tron mati fu Yehovah, so taki den kan frutrow doronomo tapu en nanga den heri ati (Odo 3:5, 6). Te den sma e du san den leri, te den trutru e begi Gado na wan opregti fasi èn te den e ondrofeni a yepi fu Gado na ini den libi, dan a bribi fu den sa gro èn dati e yepi den fu tron mati fu Yehovah.—Ps. 34:8.
5 Meki wi tan meki Gado nen bekènti fayafaya èn meki wi yepi trawan tu fu frutrow dorodoro na en tapu, èn fu frede en trutru. Kande wi abi na okasi fu yepi furu sma ete fu kon leri sabi Yehovah so taki den kan gi en glori leki den „Gado fu frulusu”.—Ps. 25:5.