Wan seryusu kari fu poti prakseri na eksempre di de wan warskow gi a ten fu wi
Te wi e poti prakseri na a video fu a Bijbel drama di nen Warning Examples for Our Day (Eksempre di de wan warskow gi a ten fu wi), dan wi alamala kan meki a bosroiti di wi teki fu tan hori wi soifri retifasi kon moro tranga. Bifo yu luku a video, grantangi leisi Numeri kapitel 25 èn den sani di abi fu du nanga a tori disi na ini Inzicht in de Schrift, pisi 2, bladzijde 353, paragraaf 1-3. Baka dati, piki den aksi disi: Suma ben de den Moabsma, èn fu san ede Yehovah ben taigi Moses fu no go feti nanga den? (Deut. 2:9) Fa Bileam ben meki a takru plan fu gebroiki den Moabsma fu pori a nâsi Israel? Fu san ede wi no musu frigiti taki furu Israelsma no ben pasa wan tumusi prenspari tesi, leti bifo den ben go na ini a Pramisi Kondre?—1 Kor. 10:11, 12.
Te wi e luku a video disi, dan meki wi poti seryusu prakseri na fo sani na ini wi libi, pe wi musu sori efu wi abi bribi èn efu wi e plisi Gado. (1) Wi musu abi lespeki: Fa wan tu fu den Israelsma ben sori taki den no ben lespeki Yehovah èn den sani di a seti? Na presi fu dati, fa wi musu meki muiti fu sori lespeki? (2) Den mati fu wi: Fu san ede Yehovah no ben wani dati den Israelsma ben tron mati fu den Moabsma? (Ex. 34:12; Odo 13:20) Fu san ede wi musu suku wi mati nanga koni? (3) A fasi fa wi e tyari wisrefi: Na ini sortu seryusu sondu sowan 23.000 Israelsma ben fadon, fu di den ben abi takru kompe? (1 Kor. 10:8) San e meki sonwan fu a pipel fu Gado na ini a ten disi du hurudu èn fa wi kan kibri wisrefi gi dati? (4) Na anbegi fu wi: Fa den Israelsma ben kisi tesi tapu a soifrifasi fu a bribi fu den? Gi sortu triki fasi fu afkodrei wi kan broko kindi na ini a ten disi? Fa wi kan wai pasi gi dati?—Kol. 3:5.
Fa a drama sori taki Yamin ben kisi blesi fu di a ben tan libi na a fasi di Yehovah ben wani? Sortu seryusu kari a Tiri Skin e gi ala tru Kresten nanga yepi fu a video disi? Efu yu na wan osofamiri-edeman, dan fu san ede yu denki taki a de wan koni sani fu meki yu osofamiri luku a video disi ibri tron baka?