A Kresten diniwroko​—A moro prenspari wroko fu wi

¹ Wi alamala abi difrenti wroko di wi musu du. Gado e fruwakti fu wan edeman fu na osofamiri fu sorgu gi en osofamiri (1 Tim. 5:8). Ma a frantwortu dati di Gado gi wi, no musu de moro prenspari leki a wroko fu preiki a Kownukondre èn fu meki disipel.​—Mat. 24:14; 28:19, 20.

² Yesus ben gi wi na eksempre fu „tan suku a kownukondre . . . fosi” (Mat. 6:33; 1 Petr. 2:21). Aladi a no ben abi furu materia sani, toku a ben de klariklari fu du a wani fu en Tata (Luk. 4:43; 9:58; Yoh. 4:34). A ben du ala muiti fu gi kotoigi na ala okasi di a ben kisi (Luk. 23:43; 1 Tim. 6:13). A ben gi den disipel fu en a deki-ati tu fu du ala muiti na ini a kotiwroko.​—Mat. 9:37, 38.

³ Waka baka Yesus na ini a ten disi: Wi kan teki na eksempre fu Yesus fu di wi e pruberi fu libi wan libi nanga soso den sani di wi abi trutru fanowdu, wan libi pe a Kresten diniwroko de tumusi prenspari. Te wi abi den moro prenspari sani di wi abi fanowdu fu man libi, dan wi musu gi yesi na a Bijbel rai fu no go suku moro nanga moro gudu na ini a grontapu disi (Mat. 6:19, 20; 1 Tim. 6:8). A moro bun fu suku fu du moro na ini a preikiwroko! Efu wi abi fu du nanga muilek situwâsi, dan meki wi du san Yesus ben du. Neleki Yesus wi no musu meki den broko-ede fu a libi tapu wi fu a moro prenspari wroko fu wi, namku fu preiki a bun nyunsu fu a Kownukondre.​—Luk. 8:14; 9:59-62.

⁴ Srefi den sma di abi furu frantwortu e si a preikiwroko leki a moro prenspari wroko san de fu du. Wan brada di abi wan bigi osofamiri, di abi wan wroko nanga furu frantwortu, èn di e dini leki wan owruman na ini a Kresten gemeente taki: „A preikiwroko na a moro prenspari wroko gi mi.” Wan sisa di e pionier taki: „A pionierwroko de moro warti leki wan bun grontapuwroko.”

⁵ Awansi fa a situwâsi fu wi de, meki wi teki na eksempre fu Yesus. Fa wi kan du disi? Fu di wi e teki a Kresten diniwroko leki a moro prenspari wroko fu wi.