Du a preikiwroko neleki fa Krestes du dati
1 Yesus ben sori wi fa fu du a preikiwroko. Na furu okasi èn na furu fasi, a ben sori taki a ben abi furu lobi gi Gado èn gi tra sma. A ben leri safri-ati sma tru tori di abi fu du nanga Gado, èn na wan lobi-ati fasi a ben du sani gi sma di ben e pina èn di ben e kisi kwinsi.—Mat. 9:35.
2 Na eksempre fu Yesus èn den leri fu en: Ala ten Yesus ben e hori na prakseri san a ben musu du. Dati meki a no ben e moksi ensrefi nanga politiek, èn a no ben e du bun sani soso fu tyari kenki kon na ini a libimakandra. A no ben meki taki tra bun sani di a ben man du, ben e puru en prakseri fu du a moro prenspari wroko (Luk. 8:1). A moro prenspari sani gi en ben de fu preiki fu a bun nyunsu fu Gado Kownukondre, a wán-enkri sani di ben o man lusu ala problema fu libisma. Yesus ben musu du wan prenspari wroko èn a no ben abi furu ten fu du dati. Di den sma na ini Kaperna-um ben wani taki Yesus tan drape, dan a taigi den disipel fu en: „Kon meki wi go na wan tra presi . . . so taki mi kan preiki drape tu, bika na fu dati ede mi kon.”—Mark. 1:38.
3 Baka di Yesus gi leri na den disipel fu en, dan fosi a seni den gowe, a gi den a spesrutu bodoi disi. A taki: „Te unu e go preiki, dan un musu taki: ’A kownukondre fu hemel kon krosibei kaba.’” (Mat. 10:7). Yesus leri den bakaman fu en taki den musu poti Kownukondre afersi na a fosi presi na ini den libi (Mat. 6:33). Den lasti wortu di Yesus taki fosi a opo go na hemel, ben sori krin san den disipel fu en ben musu du. A ben taki: „Fu dati ede, go na sma fu ala kondre èn meki den tron disipel”.—Mat. 28:19.
4 O prenspari a Kownukondre de: A moro prenspari sani di Yesus ben taki fu en, na a Kownukondre fu Gado, èn a ben gi den disipel fu en a deki-ati fu du dati tu. Awinsi omeni muiti libisma e du, toku den no man lusu den problema fu den kwetikweti (Yer. 10:23). Na Gado Kownukondre wawan sa meki a nen fu Gado kon santa, èn a sa tyari frulekti kon gi a libisma famiri fu têgo (Mat. 6:9, 10). Te wi e miti sma di „e soktu èn e geme fu ala den tegu sani di e pasa” èn wi e leri den fu den tru tori fu a Kownukondre, dan wi e yepi den fu abi wan koloku libi now, èn wi e yepi den fu kisi wan trutru howpu gi a tamara.—Esek. 9:4.
5 Yesus e du sani ete di abi fu du nanga a preiki di sma e preiki a bun nyunsu fu Gado Kownukondre, èn a e gi wi a dyaranti taki a e horibaka gi wi (Mat. 28:20). Wi e du a preikiwroko neleki fa Yesus ben du dati? (1 Petr. 2:21) Na ini den tumusi prenspari lasti dei disi, wi musu du ala muiti fu du a preikiwroko neleki fa Yesus ben du dati!