Wroko di e gi krakti baka
1 A boskopu fu Bijbel e gi krakti baka na ala den sma di e teki en èn di e fiti san den leri na ini a libi fu den (Ps. 19:7, 8). A e yepi den fu kon fri fu falsi leri èn a e yepi den fu no du sani di abi takru bakapisi gi den. A e gi den wan trutru howpu tu taki den sa abi wan bun tamara. Ma a no den sma nomo di e teki a bun nyunsu e kisi wini fu dati. Den sma di e prati a moi Bijbel waarheid nanga trawan e kisi krakti sosrefi.—Odo 11:25.
2 Kisi krakti baka fu a diniwroko: Yesus ben taki dati den sma di wani teki a tyatyari fu en fu dini leki en disipel, sa „kisi krakti baka” fu di den sa musu du a preikiwroko nanga a wroko fu meki disipel (Mat. 11:29). Yesus srefi ben kisi krakti baka te a ben e gi kotoigi na trawan. A ben de leki nyanyan gi en (Yoh. 4:34). Di a ben seni den 70 disipel go preiki, den ben prisiri fu di den ben si taki Yehovah ben e horibaka gi a muiti di den ben e meki.—Luk. 10:17.
3 Na ini a ten disi furu Kresten e kisi krakti sosrefi te den e teki prati na a preikiwroko. Wan sisa ben taki: „A diniwroko e gi mi krakti baka fu di a e meki mi tyari misrefi na wan bun fasi èn a e gi mi wan marki na ini mi libi. Te mi de na ini a preikiwroko, dan mi no e prakseri mi eigi problema èn den broko-ede fu a libi.” Wan tra fayafaya preikiman ben taki: „A preikiwroko . . . e meki mi si Yehovah leki wan trutru sma ibri dei baka èn a e gi mi vrede. A e meki mi feni koloku tu di mi no kan kisi na nowan tra fasi.” A de wan bigi grani trutru fu „wroko makandra nanga Gado”!—1 Kor. 3:9.
4 A tyatyari fu Krestes no hebi: Aladi Kresten e kisi a rai fu ’span densrefi bun tranga’, toku Yesus no e aksi moro fu wi leki san wi man du (Luk. 13:24). Fu tru, na wan lobi-ati fasi a e gi wi a kari fu ’go makandra nanga en na ondro a tyatyari fu en’ (Mat. 11:29, futuwortu). Den wan di de na ini muilek situwâsi, kan sabi seiker taki Gado e feni en bun te den e du a diniwroko fu den nanga den heri sili, awansi den no man du so furu.—Mark. 14:6-8; Kol. 3:23.
5 A e gi wi krakti fu dini wan Gado di e warderi ala sani di wi e du fu en nen ede! (Hebr. 6:10) Meki wi du muiti ala ten fu dini a Gado disi nanga ala wi krakti.