Wan brifi fu a bijkantoro

Lobi Kownukondre preikiman,

„Gado ben tan meki sani gro” (1 Kor. 3:6). A moi srefisrefi fu si fa a diniwroko na ini Sranan e go na fesi! Na ini maart fu a dienstyari 2003, moro leki 3000 bijbelstudie ben hori. Disi na wan sani fu prèise trutru.

Yehovah e blesi a wroko di den gemeente nanga grupu e du. Na ini wan pikin gemeente na wan farawe kontren na a Westsei fu a kondre, pe 22 preikiman nomo de, 160 sma ben de na a Memrefesa fu a dede fu Krestes. Wan grupu fu 7 preikiman nomo ben skrifi taki 32 sma ben de na a Memrefesa. Meki wi alamala meki muiti fu fisiti ala den 6536 sma di ben de na a Memrefesa.

Fu man tyari lektuur kon na doro gi den so furu sma na heri grontapu di wani sabi moro fu a waarheid, meki a Tiri Skin ben bosroiti fu meki a drukkerij na a Waktitoren boerderij, di de krosibei fu a foto Wallkill na New York, kon moro bigi. Sani e waka bun nanga a wroko fu meki a drukkerij kon 1,4 hectare moro bigi. Disi bigi leki te yu ben sa poti sowan 30 Kownukondre zaal sei makandra! Sani seti so, taki tu bigi nyun drukpers kan kon na ini a bigin fu a yari 2004. Ibriwan fu den drukpers disi sa man druk sowan 25 tijdschrift na ini wán sekonde. Na ini a yari 2004 nyun wrokosani fu meki buku èn fu seni sani gowe sa poti. A bakapisi sa de taki moro buku sa meki èn moro mendri wrokoman sa de fanowdu.

Now di wi bigin a dienstyari 2004, dan neleki unu, wi e begi Yehovah fu ’meki sani tan gro’.

Un brada,

Bijkantoro fu Sranan