Leri fu sori sakafasi ala ten
1 Wan yongu skapuman e frutrow tapu Yehovah èn a e wini wan tranga fetiman (1 Sam. 17:45-47). Nanga pasensi wan guduman e horidoro te rampu e miti en (Yob 1:20-22; 2:9, 10). Gado Manpikin e sori taki ala sani di a e leri sma e kon fu en Tata (Yoh. 7:15-18; 8:28). Na ini ibriwan fu den eksempre disi, a ben de prenspari fu sori sakafasi. Na ini a ten disi sosrefi, sakafasi de tumusi prenspari te wi kisi fu du nanga difrenti situwâsi.—Kol. 3:12.
2 Te wi e preiki: Nanga sakafasi, wi leki Kresten dinari e prati a bun nyunsu nanga ala sortu sma. Wi no e krutu den sma disi fu di den de fu wan tra ras, wan tra kulturu, noso fu di den kweki tra fasi leki wi (1 Kor. 9:22, 23). Efu sonwan fu den sma grofu, noso efu heimemre meki taki den no wani arki a Kownukondre boskopu, dan wi no e handri na a srefi fasi, ma nanga pasensi wi e go doro fu suku den sma di de warti (Mat. 10:11, 14). Na presi taki wi e pruberi fu sori sma o furu wi sabi, noso omeni skoro wi kisi, wi e poti prakseri na a Wortu fu Gado, fu di wi sabi taki a kan overtoigi wan sma moro leki iniwan sani di wi ben sa taki (1 Kor. 2:1-5; Hebr. 4:12). Neleki Yesus, wi e gi Yehovah ala glori.—Mark. 10:17, 18.
3 Na ini a gemeente: Kresten musu ’abi sakafasi sosrefi, den musu weri en neleki wan krosi te den e handri nanga trawan’ (1 Petr. 5:5). Te wi e si tra sma moro hei leki wisrefi, dan wi sa suku na sortu fasi wi kan dini den brada fu wi, na presi fu fruwakti taki den musu dini wi (Yoh. 13:12-17; Fil. 2:3, 4). Wi no sa firi taki wi hei tumusi fu du son wroko, soleki fu krin a Kownukondre zaal.
4 Sakafasi e yepi wi fu „frudrage makandra na ini lobi” èn na so a banti fu vrede nanga wánfasi na ini a gemeente e kon moro tranga (Ef. 4:1-3). A e yepi wi fu saka wisrefi na ondro den sma di kisi a wroko fu teki fesi na ini a gemeente (Hebr. 13:17). A e meki wi teki iniwan rai noso trangaleri di wi ben sa kisi (Ps. 141:5). Èn sakafasi e meki wi frutrow tapu Yehovah, te wi e du iniwan wroko di wi kisi fu du na ini a gemeente (1 Petr. 4:11). Neleki David, wi sabi taki efu wi wani taki sani waka bun gi wi, dan a no libisma, ma na Yehovah musu horibaka gi wi.—1 Sam. 17:37.
5 Na fesi wi Gado: A moro prenspari sani di wi musu du, na fu ’saka wisrefi na ondro a makti anu fu Gado’ (1 Petr. 5:6). Efu wi musu horidoro na ini muilek situwâsi, dan wi kan angri fu kisi a frulusu di a Kownukondre sa tyari kon. Ma fu di wi abi sakafasi meki wi e sori pasensi, aladi wi e wakti Yehovah di sa meki den pramisi fu en kon tru na a fasti ten di a poti (Yak. 5:7-11). Neleki Yob di tan hori en soifri retifasi, na so a moro prenspari sani gi wi na taki ’a nen fu Yehovah tan kisi blesi doronomo’.—Yob 1:21.
6 Fu di a profeiti Danièl ’ben saka ensrefi na fesi en Gado’, meki Yehovah sori en bun-ati èn a gi Danièl furu moi grani (Dan. 10:11, 12). Meki wi leri fu sori sakafasi na a srefi fasi tu, fu di wi sabi taki „a bakapisi fu sakafasi nanga a frede gi Yehovah, na gudu èn glori èn libi”.—Odo 22:4.