Sma e kisi krakti baka, te wi e prèise den
1 Di wan pikin meisje ben de fu go sribi, dan a aksi nanga watra-ai: „Mi no tyari misrefi na wan bun fasi tide?” Na aksi dati ben meki a mama fu en fruwondru. Aladi a ben si fa a pikin meisje ben meki muiti fu tyari ensrefi na wan bun fasi a dei dati, toku a no ben prakseri srefisrefi fu prèise a meisje gi dati. A watra-ai fu a pikin meisje disi musu memre wi taki wi alamala — yonguwan nanga owrusma — musu kisi prèise. Wi e meki den wan na wi sei kisi krakti baka fu di wi e prèise den gi den bun di den e du?—Odo 25:11.
2 Wi abi furu reide fu prèise den Kresten brada nanga sisa fu wi. Owruman, dinari ini a diniwroko, nanga pionier e du ala san den man fu du a wroko fu den na wan bun fasi (1 Tim. 4:10; 5:17). Mama nanga papa di abi frede gi Gado, e du ala muiti fu kweki den pikin fu den akruderi den markitiki fu Yehovah (Ef. 6:4). Kresten yonguwan e strei wan hebi strei fu man kakafutu gi „a yeye fu grontapu” (1 Kor. 2:12; Ef. 2:1-3). Trawan e dini Yehovah na wan getrow fasi, aladi den owru kaba, abi problema nanga a gosontu fu den, noso abi fu du nanga tra tesi (2 Kor. 12:7). Ala den sortu sma disi e frudini en fu kisi prèise. Wi e si taki a de fanowdu fu prèise den gi a muiti di den e meki?
3 Prèise a sma gi san a du: Wi alamala e prisiri trutru te a heri gemeente e kisi prèise. Ma a de wan moro prisiri sani te wan sma e prèise yu gi wan sani di yu du. Fu eksempre, na ini kapitel 16 fu en brifi gi den Kresten na ini Rome, Paulus ben prèise Feibe, Preska nanga Akwila, Trifeina nanga Trifosa, nanga Perses, èn trawan fu den spesrutu sani di den ben du (Rom. 16:1-4, 12). Den wortu fu en trutru ben gi den getrow sma disi krakti baka! Den sortu prèise disi e gi den brada nanga sisa fu wi a dyaranti taki wi abi den fanowdu, èn disi e sorgu taki wi e kon krosibei na makandra. Yu prèise wan sma no langa pasa fu wan sani di a du?—Ef. 4:29.
4 A musu komoto fu wi ati: Efu wi wani meki trawan kisi krakti baka trutru, dan wi musu prèise trawan na wan opregti fasi. Sma kan sabi efu wi e taki komoto fu wi ati, noso efu na kori wi e kori en nanga switi wortu (Odo 28:23). Te wi e pruberi ala ten fu si den bun sani di sma abi, dan disi sa pusu wi ati fu prèise den. Meki wi de klariklari ala ten fu gi prèise, fu di wi sabi taki „wan wortu di taki na a yoisti ten, dati bun srefisrefi!”—Odo 15:23.