Sori taki yu e broko yu ede nanga trawan—Fu di yu e prèise sma
1 Te wi e prèise sma na wan opregti fasi, dan dati e gi den deki-ati, a e gi den a krakti fu handri, èn a e gi den prisiri. Furu preikiman kon si taki te den e taki wan syatu sani fu prèise wan sma na wan opregti fasi, dan nofo tron dati e meki taki sma de klariklari fu arki den na ini a preikiwroko. Fa wi kan prèise sma te wi e suku fu preiki a bun nyunsu gi den?
2 Luku sani finifini: Yesus Krestes di kisi glori, ben e poti prakseri na den bun wroko fu den seibi gemeente na ini Pikin Asia (Openb. 2:2, 3, 13, 19; 3:8). Na a srefi fasi, te wi e broko wi ede trutru nanga den sma di wi e miti na ini a preikiwroko, dan wi sa suku okasi tu fu prèise den. Fu eksempre, kande wi e si taki a dyari fu na ososma krin, taki wan papa noso wan mama e sori trutru lobi gi den pikin fu en, noso taki wan ososma e taki wi odi na wan switi fasi. Disi na bun okasi fu prèise a sma. Yu de na ai fu si okasi pe yu kan prèise sma?
3 Arki bun: Te wi e preiki gi trawan, dan wi musu poti aksi di fiti, so taki den kan taki fa den e denki fu sani. Gi den grani, fu di yu e poti prakseri na san den e taki (Rom. 12:10). Kande den sma e taki wan sani fu san yu kan prèise den na wan opregti fasi, èn di yu man gebroiki fu taki moro fara nanga den.
4 Du sani na wan koni fasi: San wi musu du te wan ososma e taki wan sani di no e kruderi nanga den tru tori fu Bijbel? Na presi fu hari taki nanga na ososma, wi kan taki en tangi fu den sani di a taki, èn wi kan taigi en moro fara: „Mi kan si taki yu prakseri dipi fu a tori disi” (Kol. 4:6). Srefi te wan sma e suku fu hari taki nanga wi, toku nofo tron wi kan prèise en fu di a e broko en ede trutru nanga a tori. Son leisi a kan gersi leki sma no wani arki a bun nyunsu kwetikweti, ma te wi e taki na so wan safri-ati fasi nanga den, dan dati kan kenki a fasi fa den e denki.—Odo 25:15.
5 Efu wi wani gi sma deki-ati, dan wi musu prèise den na wan opregti fasi. Te wi e taki nanga sma na a fasi disi, dan wi e gi grani na Yehovah, èn kande a kan hari trawan fu arki a Kownukondre boskopu.