Aksi di opo kon

◼ Wi musu teri a yuru te wi hori wan osofamiri-studie?

Efu wan Kresten papa noso mama e hori wan osofamiri-studie èn den e studeri nanga pikin di no teki dopu ete, dan a papa noso a mama kan skrifi wán yuru na ini wan wiki, wán gobaka wan wiki, nanga wán bijbelstudie ini a mun. Disi de so, srefi te den e studeri moro leki wán yuru, èn srefi te den e studeri moro leki wan leisi na ini a wiki, noso te den e studeri aparti nanga den pikin.​—Luku a Bediening-buku, bladzijde 106.

Efu ala sma na ini na osofamiri teki dopu kaba, dan wi no musu teri a yuru di wi hori a studie (disi wi kan du soso te wan pikin e studeri a di fu tu buku baka di a teki dopu kaba). Disi de so, bika na a fosi presi a preikiwroko raportu fu a gemeente e sori fa a gemeente e preiki a bun nyunsu èn fa den e leri waarheid fu Bijbel na sma di no gi densrefi abra èn na sma di no teki dopu ete fu tron dopu bakaman fu Yehovah (Mat. 24:14; 28:19, 20). Ma disi no wani taki dati a no de so prenspari fu hori den bijbelstudie disi doronomo.

Kresten papa nanga mama abi a frantwortu fu studeri nanga den pikin fu den. Den sma di abi yepi fanowdu fu seti, noso fu du den osofamiri-studie moro bun, kan aksi den owruman fu yepi den. Efu wan situwâsi e meki taki a moro bun fu wan tra preikiman studeri Bijbel nanga wan manpikin, noso wan umapikin di no teki dopu ete, ma di de na ini wan Kresten osofamiri di e kon na a gemeente, dan den musu suku rai na a fesiman opziener, noso a dienstopziener. Efu den feni so wan studie bun, dan a sma di e hori a bijbelstudie kan teri a yuru disi leki fa a ben o du dati nanga tra bijbelstudie.

A e teki furu ten nanga muiti fu leri pikin fu waka tapu a pasi fu Yehovah. Den sani disi wi no kan si tapu preikiwroko raportu (Deut. 6:6-9; Odo 22:6). Kresten papa nanga mama de fu prèise fu di den e teki a hebi frantwortu na den tapu fu kweki den pikin fu den „na ini a trangaleri nanga a seryusu frumane fu Yehovah.”​—Ef. 6:4.