A de tumusi prenspari fu go na den konmakandra doronomo
1 Kresten osofamiri e go na den konmakandra doronomo fu di den e si den leki wan tumusi prenspari sani. Ma den frantwortu fu a libi kan de wan tyalensi gi wi. Yu e gebroiki a ten di yu poti na wan sei gi na anbegi fu Yehovah fu du wroko na oso, fu du grontapuwroko, noso fu du yu skorowroko? Te wi e si sani soleki fa Yehovah e si den, dan dati sa yepi wi fu poti den moro prenspari sani na a fosi presi.—1 Sam. 24:6; 26:11.
2 Wan man fu Israel no ben poti prakseri srefisrefi na a fasi fa Yehovah e si sani fu di a ben suku udu tapu a Sabadei. Kande a ben e prakseri taki a ben e du disi fu sorgu en osofamiri, noso kande a ben e si en leki wan pikin sani. Te wi luku fa Yehovah krutu a tori, dan wi e si taki Yehovah sori taki a e si en leki wan seryusu sani te wi e du grontapu sani na ten di poti na wan sei gi na anbegi fu en.—Num. 15:32-36.
3 Kakafutu gi den tyalensi: Gi furu sma di e du grontapuwroko a hebi fu kon na den konmakandra doronomo. Son sma ben man kakafutu gi a tyalensi disi fu di den taki nanga a basi fu den; trawan kenki wroko-yuru nanga tra wrokoman, trawan baka suku wan moro bun wroko, noso puru materia sani na ini den libi di den no ben abi fanowdu trutru. A no de fu taki dati a e plisi Gado trutru te a e si taki sma de klariklari fu du den sortu sani disi gi a tru anbegi.—Hebr. 13:16.
4 Skorowroko kan de wan problema sosrefi. Wan yonguwan ben taki: „Mi e du pikinso fu mi skorowroko fosi mi go na den konmakandra èn san tan abra mi e du baka te mi doro na oso.” Te den pikin no ben man du ala den skorowroko tapu konmakandra-dei, dan son papa nanga mama fruteri a skoromeester, noso skoromisi taki den Kresten konmakandra de tumusi prenspari gi na osofamiri fu den.
5 A de tumusi prenspari taki wan osofamiri seti sani bun na fesi èn taki den wroko makandra fu du osowroko, so taki den kan sreka densrefi fu doro biten na den konmakandra (Odo 20:18). Yu kan leri den yongu pikin sosrefi fu sreka densrefi na wan spesrutu ten, so taki yu kan komoto na oso biten. Nanga yepi fu na eksempre di papa nanga mama e gi, den kan leri den pikin fu si o prenspari a de fu go na den konmakandra.—Odo 20:7.
6 A libi na ini a seti fu sani fu a ten disi e kon moro hebi, fu dati ede a de tumusi prenspari fu go na den konmakandra doronomo. Meki wi tan si sani neleki fa Yehovah e si dati èn meki wi si en leki wan tumusi prenspari sani fu go na den konmakandra doronomo.—Hebr. 10:24, 25.