A fisiti foe konmakandra — Wan serjoesoe frantiwortoe
1 O serjoesoe joe e teki a fisiti foe konmakandra? Dati de wan aksi foe ondrosoekoe finifini, a no so? Seiker foeroe foe wi e feni taki wi e warderi konmakandra. Ma, raport e sori taki no so langa pasa ini foeroe gemeente a fisiti foe konmakandra go na baka. San kan de a loetoe? Wan toe foe wi e gi pasi foe meki grontapoewroko di no de fanowdoe, a weri di wi e weri, oso-wroko, a firi di wi no e firi so switi, noso wan pikinso takroe weri e tapoe wi foe doe wi plekti foe fisiti den konmakandra doronomo? (Deut. 31:12) Foe di disi na wan bijbel markitiki, ibriwan foe wi moesoe go loekoe na aksi ondro begi: O serjoesoe mi e teki a fisiti foe konmakandra?
2 Son wan foe wi brada e waka foeroe joeroe langa tapoe pasi di lai nanga foegoefoegoe santi èn e koti liba abra di kefarlek nanga kaiman foe den kan fisiti konmakandra. Ini joe eigi gemeente getrow-wan sa de, di „noiti e mankeri” ala di den abi serjoesoe gosontoe problema, malengri na skinfasi, hebi wroko na den wrokope, noso den skoro-wroko di e aksi toemoesi foeroe foe den (Luk. 2:37). Foe san ede den e meki moeiti foe kon makandra? Bika den sabi taki, den no man basi den problema foe a grontapoe disi di lai nanga druk, nanga den eigi krakti. Den moesoe foe froetrow tapoe a krakti di Gado e gi. — 2 Kor. 12:9, 10.
3 Ini a ten disi wi e waka baka na eksempre di den fosi kresten poti, di ben e kon makandra doronomo, foe begi, prati ondrofeni tori, èn studeri a Wortoe foe Gado (Tori 4:23-30; 11:4-18; Kol. 4:16). Wi e kisi rai foe bijbel profeititori èn bijbel-leri, so srefi fa foe tjari wisrefi na a fasi di Gado wani èn foe kresten moraal, makandra nanga froemane di e kon biten foe wi meki wi libi kon moro boen now, foe di wi e gebroiki den hei gronprakseri foe bijbel na wan joisti fasi (1 Tim. 4:8). Moro fara, den e memre wi foe a howpoe di wi abi taki, wan kaba sa kon na problema nanga pina. A de toemoesi prenspari foe hori a howpoe disi libilibi. — Heb. 6:19.
4 O serjoesoe joe famiri e teki a fisiti foe konmakandra? A de wan pisi foe joe schema na a srefi fasi leki njanjoeroe noso grontapoe wroko de dati? Te a joeroe foe konmakandra doro, joe e taki-go taki-kon foe teki a bosroiti foe go noso foe no go, noso foe de doronomo makandra nanga joe brada na wan sani di de wan plekti gi joe osofamiri? Foeroe preikiman e memre na eksempre di den papa nanga mama di gi densrefi abra, ben gi den, di den ben e gro kon. „Wan sani foe mi papa,” wan owroeman e memre nanga prisiri, „ben de taki a ben wani foe de seiker ala ten dati na osofamiri ben go na den konmakandra. Efoe wan sma ben siki, wan foe wi ben tan na oso nanga en, ma den trawan ben go na den konmakandra!”
5 Ini den tra uitgave foe Wi Kownoekondre Dienst di e kon, wi sa taki foe a waarde foe ibriwan foe den gemeente konmakandra nanga a marki foe jepi bow a warderi gi den sani di seti na jejefasi. Efoe a go di joe e go na den konmakandra kan de moro geregeld, wi de seiker taki den artikel sa jepi joe foe froestan san joe e misi. Sosrefi den sa abi jepi foe memre sani gi den di e hori den konmakandra, sosrefi idea gi wi alamala di wi kan gebroiki te wi e sreka sani gi èn e teki prati na den konmakandra. Foe san ede wi leki famiri no e go sidon makandra èn e go loekoe a gwenti foe wi foe fisiti konmakandra ondro begi? Tjari dan ala fanowdoe kenki kon ini joe schema. A fisiti foe den konmakandra doronomo na wan prenspari pisi foe wi theokrasia leri èn foetroe, wi moesoe teki en toemoesi serjoesoe.