Wi sa kisi wini te wi o studeri a buku Kon krosibei na Yehovah
1 Wi ben breiti srefisrefi di wi ben kisi a buku Nader dicht tot Yehovah (Kon krosibei na Yehovah) tapu a „Fayafaya Kownukondre preikiman distrikt kongres”. Furu sma leisi a buku wantewante. A yaritekst fu 2003 ben gi moro sma a deki-ati fu du a srefi sani: „Kon krosibei na Gado, èn a sa kon krosibei na unu.”—Yak. 4:8.
2 Na ini maart wi sa bigin studeri a buku Kon krosibei na Yehovah na a Gemeente Bukustudie. San na a moro bun fasi fa wi kan kisi wini fu a studie disi? A de tumusi prenspari fu sreka wisrefi. Wi sa teki tu wiki fu studeri wán kapitel èn wi no sa poti prakseri na tumusi furu paragraaf ibri wiki. Disi sa gi yu nofo ten fu sreka yusrefi fu kan gi piki nanga yu heri ati fu di yu sa studeri bun èn fu di yu sa prakseri dipi fu den sani di yu leri. Boiti dati, wi sa taki fu moro mendri paragraaf ini den wiki pe wi o poti prakseri na a lasti pisi fu wan kapitel, so taki moro ten kan tan abra fu taki fu wan spesrutu sani na ini a buku.
3 Na ini kapitel 2 te go miti a lasti kapitel fu a buku yu abi wan faki di nen „Denki dipi fu den aksi disi”; a de na a kaba fu ibri kapitel. Baka te a Bukustudie opziener taki fu a lasti paragraaf na ini a kapitel, dan a kan taki nanga a grupu fu a faki disi. A sa gi den memre fu a grupu a deki-ati fu taki san den leri fu den tekst di kari, baka di den prakseri dipi fu den (Odo 20:5). Boiti den aksi di skrifi na ini a faki, dan ten na ten na opziener kan gebroiki den aksi di e kon now: „San den sani disi e leri yu fu Yehovah? Fa dati abi krakti tapu yu libi? Fa yu kan yepi trawan nanga den sani di yu leri?” A marki na fu gi a grupu deki-ati fu taki san de na ini na ati, no fu poti aksi fu luku efu den arkiman sabi ala sortu finifini tori di no de prenspari.
4 Kon krosibei na Yehovah na wan tumusi aparti buku. Aladi ala den buku fu „a getrow èn koni srafu” e gi Yehovah glori, toku a buku disi meki spesrutu fu poti prakseri na den fasi fu Yehovah (Mat. 24:45-47). Trutru, wan tumusi prisiri ten de na wi fesi! Wi sa kisi wini trutru te wi sa studeri den fasi fu Yehovah finifini. Meki a studie yepi wi fu kon moro krosibei na wi hemel Tata, èn meki wi yepi trawan moro bun fu du a srefi sani.