Wi o studeri na Anbegi Gado-buku

A buku Anbegi a wan-enkri tru Gado ben meki fu studeri nanga den nyunwan di kaba studeri a Sabi-buku. Te wi o studeri a buku disi na a Gemeente Bukustudie, dan disi sa meki wi de srekasreka fu man gebroiki en ini a preikiwroko. A sa meki a lobi nanga a warderi di wi abi gi Yehovah nanga en organisâsi kon moro bigi. Fa wi kan kisi trutru winimarki te wi sa studeri na Anbegi Gado-buku?

A fasi fa wi o hori a studie: Den bukustudie opziener sa prati a ten bun fu di wi sa studeri wan heri kapitel ibri wiki. Fu di den wani taki nofo ten tan abra gi den moro prenspari pisi fu a kapitel, meki den no sa taki tumusi langa fu den bigin paragraaf. Te den bukustudie opziener o taki syatu na a kaba fu ibri kapitel fu den aksi di de na ini den faki, fu luku baka san wi leri, dan disi sa yepi den wan di de drape fu memre den moro prenspari penti.

Na ini sowan afu fu den kapitel fu na Anbegi Gado-buku aksi de di skrifi pikinso moro fara fu a lanki na a kruktu-anusei fu a bladzijde. Wi kan prakseri dipi fu den aksi disi èn wi kan gi piki tapu den. Wan eksempre de fu feni tapu bladzijde 48 nanga 49. A no de fanowdu fu leisi den aksi disi makandra nanga den paragraaf. Te na opziener o luku den aksi nanga a grupu, dan a sa meki wan sma leisi den tekst di kari èn a sa taki fu den efu ten de ete.

Sreka na fesi: Fu sreka bun no wani taki dati wi musu hari strepi nomo na ondro den piki. Te wi sa prakseri dipi nanga yepi fu begi fu den tekst di kari ini a buku, dan disi sa yepi wi no wawan fu sreka den piki fu wi bun ma a sa yepi wi sosrefi fu du wan sani di de moro prenspari, namku fu sreka na ati fu wi (Esra 7:10). Wi alamala kan gi makandra deki-ati fu di wi e gi piki na wan fasi di fiti.​—Rom. 1:11, 12.

A studeri di wi sa studeri na Anbegi Gado-buku sa yepi wi fu kon krosibei na Yehovah èn a sa sreka wi fu yepi opregtiwan fu kon dini En makandra nanga wi (Ps. 95:6; Yak. 4:8). Meki wi alamala nyan bun dorodoro fu a moi yeye seti disi.