Joe e gebroiki a njoen boekoe?
1 Tapoe na „Kownoekondrewánfasi”-districtscongres di ben ori tradé oen ben kisi nanga bigi prisiri a njoen boekoe Bondroe kon na wan na ini na anbegi foe na wan troe Gado. Wan es’esi loekoe foe na boekoe disi no de foe sma di bigin njoen, di sabi pikinso nomo ofoe noti foe na bijbel. A de gi den di sabi den gronprakseri foe na bijbel-waarheid. A kan jepi wi tapoe praktis fasi foe njan boen foe a tranga jeje njanjan foe Gado Wortoe. A boekoe disi kan jepi wi foe kon bradi wi sabi foe a Bijbel èn foe meki en moro dipi èn gebroiki a bijbel dorodoro ini oen libi. — Hebr. 5:13; 6:1.
2 Joe abi persoonlek wini foe den boen disi? Joe e lési na boekoe? Efoe a de so, teki joe ten foe soekoe den bijbeltekst di no skrifi ini a boekoe èn go prakseri foe den fa den e fiti na ini den tra tekst di skrifi lontoe a wan èn loekoe fa joe kan tjari den kon na ini joe libi. No djompo den abra. Joe kan meki pas wan boen gebroiki foe den tori ini a boekoe te joe man foe tak-go-tak-kon foe en nanga jepi foe a bijbel.
3 Joe e meki sosrefi toe gebroiki foe den studi-aksi na ini den paragraaf èn na ondrosé foe den bladzijde? Soleki fa joe sa si kande, dan foeroe foe den aksi disi abi na méne foe meki joe poti prakseri tapoe joe égi libi èn meki san joe e studeri abi krakti na tapoe. A no de foe taki dati bakaten wi sa gebroiki na boekoe disi tapoe den gemeenteboekoestudi, ma efoe now kaba joe e studeri en persoonlek, dati sa jepi joe foe kisi moro bigi wini-marki te djonsro wi sa studeri a boekoe makandra.
4 Tapoe a congres ben kon na krin dati a boekoe disi kan abi foeroe waarde foe jepi jongoewan di de tini foe gro kon lepi. Ala di den sabi den fosi waarheid kaba èn kande e teki prati wan moi pisiten kaba na a prékiwroko, dan o moro den sa kon froestan den réde foe san Jehovah e aksi foe wi, o moro den prisiri sa gro èn den sa abi moro prisiri foe poti den rai foe a bijbel na ini den libi. Na Bondroe kon na wan na ini anbegi-boekoe kan jepi en. A e gi den dek’ati foe taki na waarheid nanga den égi wortoe, foe redeneer nanga jepi foe den bijbeltekst èn foe kan si fa den disi kan jepi den foe teki boen bosroiti. Foe di jongoewan e firi moro esi foe teki na waarheid te wan sma studeri persoonlek nanga den, dan oen leki mama nanga papa, a no kan tra fasi de den joisti sma foe doe dati nanga oen tini pikin. — Teki gersi Genesis 18:19.
5 Bondroe kon na wan na ini na anbegi foe na wan troe Gado na a boekoe di wi e gi tranga now foe stoeka nanga sma di sori pas taki den abi belangstelling, baka te den studeri na Waarheid-boekoe ofoe a boekoe Joe kan libi foe tégo na ini wan paradijs na grontapoe. Efoe joe e ori wan bijbelstudie nanga wan sma di de so fara dati a kan bigin nanga a di foe toe boekoe, gi en a njoen boekoe èn no draidrai foe gebroiki en wantron.
6 Meki a de so taki oen ala gebroiki a njoen wrokosani disi tapoe wan boen fasi (1) foe kan jepi dati tapoe jeje fasi oensrefi nanga oen osofamiri go na fesi èn (2) foe jepi trawan di studeri den fosi bijbelwaarheid kaba, foe kon lepi.