Na ini a wiki fu 6 yanuari wi o studeri a buku Kon krosibei na Yehovah
1. San wi o du na ini a wiki fu 6 yanuari fu man kon krosibei na Yehovah?
1 Yehovah wani taki wi e kon krosibei na en (Yak. 4:8). Fu man yepi wi fu kon krosibei na Yehovah, dan na ini a wiki fu 6 yanuari, wi o studeri a buku Kon krosibei na Yehovah na a Gemeente Bijbelstudie. A fosi bladzijde fu a buku e taki fu san ede a buku disi skrifi: „Te wi e prakseri fa Yehovah e sori ibriwan fu den fasi fu en, te wi e si o soifri Yesus Krestes sori den fasi disi, èn te wi kon frustan tu fa wi kan kweki den srefi fasi dati, dan dati o yepi wi fu kon moro krosibei na Gado.” Den gemeente ben studeri a buku disi kaba na ini 2004 nanga 2005. Ma na ini den yari di pasa, sowan tu milyun sma tron Kotoigi. Fu dati ede disi o de a fosi leisi taki den o man studeri den moi fasi fu Yehovah finifini. Den wan di ben studeri a buku disi kaba, o kisi moro warderi te den o studeri den moi fasi fu Yehovah.—Ps. 119:14.
2. Fa wi o studeri a buku Kon krosibei na Yehovah?
2 Fa wi o studeri a buku disi? A brada di o hori a studie, o taki wan tu syatu sani na a bigin, kande wán noso tu zin. Den kapitel no e sori sortu tekst wi musu leisi, ma na a brada di e hori a studie musu luku sortu prenspari tekst musu leisi. Na a kaba fu ibri pisi, a brada kan poti wán noso tu aksi fu luku baka san wi ben leri. Efu a faki di nen „Denki dipi fu den aksi disi”, de na ini a pisi tu di wi musu studeri, dan a o gebroiki den aksi dati fu luku baka san wi ben leri. Efu ten de ete, dan a brada kan aksi wan sma fu leisi wan tu fu den tekst na ini a faki, èn a kan poti moro aksi so taki den arkiman kan gi piki.
3. Te wi o studeri a buku, dan san wi musu du èn fu san ede?
3 Fa yu kan kisi wini fu a studie? Sreka na fesi awinsi yu ben studeri a buku kaba. Gi piki fu di disi o gi Yehovah glori, a sa yepi yu fu no frigiti den sani di yu leri, èn tra sma kan leri wan sani tu (Ps. 35:18; Hebr. 10:24, 25). Te yu e denki dipi fu den tumusi moi fasi fu Yehovah, dan dati o yepi yu fu kon moro krosibei na en (Ps. 77:11-13). Dati o yepi yu fu de klariklari fu du ala san Yehovah aksi yu fu du èn yu o wani fruteri tra sma fu en.—Ps. 150:1-6.